Uralistica

Мокшетнень и эрзятнень ила-кърдань ярхцамбяльсна: мезе ванфтовсь тячимс

Эрь народть культуранц эса аф аерфтови пяльксокс ащи ярхцамбяльсь. Эсонза этность исякоц, промозоц  и эрь шинь эряфоц. Ломанць тяфта ни тиф – теенза, штоба эрямс, ярхцама. Народть смузец тяфтама питне максси ярхцамбяльти: «Ули ярхцамбяль – ули эряф», «Эряфсь и ярхцамбяльсь ряцок якайхть». Мокшэрзятне эсь пекозост кизоста кизос путнезь сянь, мезе касфнесть переса да паксяса, мезе макссесть теест вирьсь и ляйсь, вирень и кудонь жувататне, мешне.

Но ярхцамбяльсь ульсь пеконь топафтома аф аньцек эрекненди. Сон нолявсь тевс эрь кодама ила-кърдаса, ульсь эсь кодяма сотксокс тя и тонашить ёткса. Мокшэрзясь эряфонц квалмоста ётафнесь лама эрь кодама озкс и ила и пингстост фалу ингольце вастти путневсь кодама-бъди ярхцамбяль. Тячити ужяль кържа мезе ванфтовсь, но аф сембось юмась арась шаржу кизотнень потмоса.

 

КШИ

Кунардонь пингстакиге мокшетне и эрзятне ярхцсесть кшида. Сон ульсь эсь кодяма символокс сотксти эряйхнень и кулотнень ёткса. Кшись фалу ащекшнесь шра лангса, мезсь няфнезе кудонь уликсшить, инжиень седи ваксста примамать. Эрь кодама озкста кшись васенце вастсоль. Вельденза Шкайть кядьста анцевсь козя сёронь касома, жуватань раштама, цебярь уша.

Кшись лувондовсь шумбрашинь и пара эряфонь символокс, а сяс вельхкссонза озонкшнесть одс шачфть павазонц и шумбрашинц инкса. Илать тяфта и лемоцоль: "Кшинь озондома". Тячи ни сон ламода полафтсть но лемоц лядсь.  Кой кона велетнень эса (кепотьксонди Инсара аймакса) идять шачфтома кудста ускомдонза меле семьясь пуромкшни  "Кшинь озондома", хушь озксста тя иласа мезевок ни аш.

Павазонь и козяшинь символкс ульсь кшись и од кудс ётамста.  Кудса эрямань ваймепожфсь эвондакшнесь  аньцек эста, мъзярда азоравась пянакудса панцезе васенце кшить.  Тячивок кой мезе ванфтовсь тя илакърдатнень эзда. Сиретне сашендыхть "новоселияс" копша мархта. И озондыхть вельхкссонза Шкайти.

Ашезь ётне кшифтома фкявок свадьбань ила. Кшиса-салса бъславсезь оттнень, путнесть кши рьвянянь парьти. Мъзярда рьвяяйхне озсесть шра вакс  теест васендакиге макссесть тустста почердаф салса равжа кши кочам. Сон, арьсематнень коряс, и сотнекшнезень марс стирть и цёрать.   Мъзярда кудатне сашендсть стирть ладяма  синь казендсть тряензонды копша "Шумбра кши". Къда сятнень мяльс сембось туфоль, синьге макссесть кудатненди копша и эста ни конацка ширьхнень эзда ашезь сязенде ладямать, пельсть Шкаень кяжда. Тячивок рьвяямаса ули вастоц кшить. Мархтонза бъславсесазь оттнень ЗАГСта меле цёрать тядянзон-алянзон кудозсот сувамста. Нинге ули тяфтама рахсемань кой: рьвянясь и цёрась фатнихть копшать кафта пяльде и ускихть, кие сязи сяда оцю пакш ся и ули азорокс кудса.

Нинге кшить мархта сотфтольхть кардамат, конань эзда атянь атяньконь арьсемаснон коряс ащесь ломаттнень павазсна, шумбрашисна и уликсшисна. Тяфта:

- ашезь мярьгондев кадондомс кши сускомцень. Арьсевсь, бъта тянь мархта тон кадондсак эсь вийцень. - Макссемс кшить шра лангста пиненди. Тянь мархта куду сай ашушись. 

- Аделсемс киньге мельге сускомонц. Тяфта сявови виец, павазоц и шумбрашиц. 

 Тя сембось ули тячимска. Нъльне од ломаттневок, аф содамок мес тяфта тиендихть, тяряфтыхть аф кадондомс сускомснон и карнесазь пиже идняснога, конат кунара пряснон лувондсазь рузкс.

Кшинь керсемась ульсь инь сире алять или атять тевоц. Сон явондозень кши кочапнень шра ваксса озафненди. Панць кши аньцек инь сире авась –кудазоравась.  Пантьф кшиста фалу керсесть кочам, тустста почерязь салса и путнезь атянь атятненди. Кшинь панеманди лемтьфол башка очка. Конац мезендивок оду ашезь ноляв.

 

ЯМСЬ

Кунардонь ярхцамбялехнень ёткса япневок. Мокшетне и эрзятне пицезь синь снавста, люкшяста,  суроста. Кшить мархта марса путнезь рьвяямань иласта. И озондомать пингста оттненди анасть сняра жа паваз и козяши, мъязяра ямса ямкскада.  Оцю пяльксокс рьвяямань ила-кърдатнень эса ульсь "стирень ямсь". Сон тиендевсь мекольце шиста, конань стирьсь ётафнезе тядянь алянь кудса. Койть коряс сембе ава вайме раднянза каннесть рьваксс максовити сяканя ям. Стирти эрявсь эрть кантфонц варжамс и шнамс.

Суронь ямть мархта сотфоль башка озкс – бабань ям.  Нинге койть коряс кудонь путомста поталаконь нежень (маткань) ладямста азорсь ётнезе кудть суронь ямса, мезть мархта тердсь юрхтозонза лама кизос шумбраши. Кстиндаманди пицесть лофца мархта суронь ям. Сон кода и алхне лувондовсь раштамшинь символокс. Эрь инжись, конац варчсезе  тя ямть поздравондакшнезень раштайхнень семьянь касомать мархта и арьсесть одс шачити сняра кизода, мзяра ямкскада сяканяса. Тячи ня койхне, улема, прокс юмафтф.

Ямсь сувсесь и поминандамань ярхцамбяльхнень ёткска. Тяса тефне латцевихть сяда лац. Тячивок поминка  пингста шъра ланс путневи снавонь ям, суронь или люкшя ям. Православияв ётамада меле мокшетне и эзятне эсь ила-кърдазост сувафтсть лия народонь пялькстка. Кепотьконди Инсара и Ардатова аймаконь  велетнень эса фкявок поминандамань ила аф ётни кутьяфтома. Инголи сон тиендевсь стамка пидеф рисста и шра лангса ни почеряфоль сахарса, штоба афоль видюя. Тяни кутьяти путнихть изюм, курага, мармелад, цукатат.

 

МЕДСЬ

Оцю васта мокшэрятнень эярфса занцесь медсь.  Сон сувсесь кода эрь шинь, стане и илань ярхцама и симомбяльхнень эс. Тиендсть мархтонза  пуре и поза. Медсь лувондовсь инь ару ярхцамбяльхнень эзда фкакс. А сяс сонь пяк почитандазь. Ульсть кой кодама койхть конат сотфтольхть медень сатомать и тевс нолдамать мархта. Христианствати ётамада меле синь юкстафтольхть. Но мешне тячимс  оцю почётсот. Нльне онцтонга шавф межсь луводови кальдявонди. Тячимс поминкатнень эса путневи шра лангс медь. Арьсеви, што вельденза поминць атянь атятненди пачкоди сяда вишкста. Нинге медти лемтьф башка ши. Лемоць медьта ярхцама. Етафневи сон омбоце августста, "Ильгоньцта". Тя шити мокшетне и эрзятне рамсекшнихть медь, а сят кие кирди мешт, стакта каванякшнесазь шабраснон.

 

 

 

 

КЪСЕЛЬ

Пицесть мокшэярзятне късельхтьке. Розьста, снавста, пинемста. Ярхцсезь кельмоста. Стане жа нолявсть тевс ила-кърда пингста. Тячимс  соньфтомонза аф уленди фкявок поминка. Пицеви сон тустста, кайсеви тарелкас и ярхцсеви куцюса. Нинге ульсь кунардонь пингста тяфтама кой. Тялоть ушетксста кудазорвась пицесь акша късель. Путнезе сонь вальмя лангс, тяфта каванясь Якшама Атять. Мезь мархта эняльдьсь теенза, штоба ся пяк афроль кяжиякшне тялоть къвалмоста и афоль кучсе лангозост вишке якшапт. Тячимс тя койсь ашезь ванфтов.

 

 

 

 

 

 

 

ПАЧАТ

Пачатне – кунардонь ярхцамбяльхнень эзда фкясь. Синьфтомост тячимс аф ётни аф ила, аф поминка, аф озкс. Пачат пицихть Масланцяста. Пачаса тернесазь тунадать.

Пицесть пачат и свадьба ётктьке. Мархтост каванякшнезь рьвянять стирьялганзон, конат сашендсть ширезонза рьвяямань илада инголе казнянь анокламаса лездома. Каванязь стирьхнень пачаса и цёрать раднянза, мъзярда сашендсть кудонь ванома. Пачат панцесть и рьвянянь симомативок. Синь мархтост усксезь инжихне. Свадьбань омбоце шиня пачат ни панць сонць од рьвянясь, штоба раднятне няялезь кодама сон азоравась. Сяка жа шиня сонь содафнезь мирденц кулоф раднянзон мархта, конань сон казендезень эрь кодама казнеса, тяконь ёткса пачасовок. Тячимс пачафтома аф ётни фкявок поминка. Синь каннесазь калмолангс кода мокшетне стане и эрзятневок. Пачань пидема рецепттне покс аф фкя лацоннеть. Суроста, манкаста, розь и тозер почфста. Эчкт и шуванят, ёмланят и оцюфт. Но аф ваномок тянь лангс тячимс пачась ляткшни инжиень васьфтемань васенце каванямбялекс и атянь атянь поминандамаса пяк эрявикс ярхцамбялекс.

 

 

 

 

 

 

ПЯРЯКАТ

Аш кода ётамс пярякатнень вакскавок. Синьге оцю вастсна ила-къдатнень эса. Квалмаст морсевихть морот. Оцюль вастсна пярякатнень свадьбаса. Тяса синь няфнезь кафта юропнень сотксснон. Тиендсть пярякат эрь кодма озксонди.  Нолязь тевс кода магиянь средства,  кона максы  раштама вий и козяши. Свадьбань пряфт пярякать сидеста лемнелезь раштамшинь кирдить Норовавать лемса. Эрь кодама васта свадьбанди панцесть вете – вейхкса пярякат. Эрть сонцень лемоцоль и сонцень танадоцоль.

1-цесь инь оцюсь и эрявикссь. Лемоц Лукш – лувонь кши. Сон покаряволь, перьфканза тиендевсь керонь шаркс. Потмоц пярякать ащесь кемгафтува слойста. Алуцесь – суронь ямста, омбоцесь мичкста, колмоцесь алста, нилецесь тага ямста, ветецесь тага мичкста и стак тов. Вярьце – кемгафтувоце слойсь ащесь ниле апак ваткак алста. Лукшить лангоц мазопневсь шапаксонь ронгоняса. Тиендевсть кафта наромоннят, конат няфнезь рьвянять и од цёрать. Пярякать кучкас пезфневсь марлюнь тарадкя. Сон мазопневсь эрь кодама тюсса парьхциняса. Тарадкять перьфке пезфнефтольхть ёмла байдеконят, конань пряс щафневсть пяштенят. Тя пярякась лемневсь рьвянять алянцты стиренц инкса. А стане жа кудонь кирдихненди, юрхтонь ванфтыхненди. Сивондезь тя пярякать рьвянять раднянза, мъзярда инжихне тушендсть кудстост.  Тячимс тяфтама пярякат тиендихть Большеберезниковскяй районца эряй эрзятне.

Омбоцекс питнес коре улсь "Сувамань прякась". Кудавась путнезе сонь пяште мархта стирьхнень инголи и шнась эсонза мороса. Нинге фкя эрявикс пярякакс, конац усксевсь рьвяяйть ширде – "Ава Ловцо". Сон лемтьфоль рьвянять тядянцты стиренц мяштьса андоманкса. Пярякать казендезе или од цёрать тядяц или кудавась. Пярякать мархта казендевсь пряруця и пракстат. Свадьбань пярякатнень ёткса нинге "Од авань мяште". Сонь потмозонза марсевсь мичке. Пярякать мархта од цёрать кудса ётафневсь озкс, конань пингста эняльдсть Нишкепазти, штоба од авать улель лама лофцоц, штоба сафтоволь теенза раштамс и андомс сисем цёрат  и тняра жа стирь. Тячи тя сембось ни аф тиенькшневи.  Сяда сидеста свадьбанди паньцевихть курникт (Атяшевань аймакса), конань потмос марсихть рис мархта изюм. Тянь мархта арьсихть оттненди лама лама кизос шумбраши.  

 

ЛАПШАТ

Оцю вастсна коень ярхцамбяльхнень эса лапшатнень. Тиендезь синь ведь лангса розень, а сяда меле тозеронь почфста, или крахмалста почф мархта. Шонгар шапаксть кайсезь пси пачкалга лангс, и путнелезь пянакуду. Лисьф пачать керсезь шуваня китькскас и меле пицезь. Тячивок, аф ваномок сянь лангс што лапшат ули кода рамамс лавкаста, поминканди сяда сидеста тяряфнихть тиендемс синь  эсь кядьса. Крахмалста или почфста и алста.  Пицевихть синь лофца потмоса или ведьса.  А Атяшевань видеса  пидеф лапшатне шорсевихть ал мархта. Лемоц тя ярхцамбяльть лапшерник и тиендеви сон стане жа аньцек поминкань иланди.

 

 

СИМОМБЯЛЬХТЬ

Симомбяльста тячи тиендихть сяда сидеста поза и аньцек поминканди, или тяфтама иланди кода Очижись, Петрусь. Рьвяямаста и лия иласта сон ни прокс юмась.  Позать мокшетне анелязь сядот киза. Тя симомбяльсь алкогольфтома. Ульсь нинге брага. Тя кшинь симомбяль. Тиендевсь сон ламбавтома лангса. Иласта симондсть пуреда. Сон тиендевсь медь лангса. Путневсь сусласта. Эзонзоль комля. Пуресь тиентьфоль аньцек шуфтонь парняса или сёвонненеса. Сяс мес якамста теенза кирдема стенанятненди куцемок вяри. Шра лангс путомда инголе сонь тага одонзакшнезь медьса. Мезть эзда пуресь шовияй.

Эрь шинь симомбялькс мъзярда бъди ульсь къвась. Тяни сонь стане жа тиенькшнесазь аньцек поминканди. Симондсьсазь тяфтак и лангсонза тиендихть окрошка – сал ведь.  Тиендьсазь квазть розьбочфста. Тевсь мольфтеви аф пяк куватьс. Ши-кафта. Улема сяс и ванфтовсь  симомбяльсь тячимс.

 

 

 

 

 

 

Сембонь тянь эзда ули кода лихтемс вов мезе. Тячи кунардонь мокшень и эрзянь кой кона ярхцама и симомбяльхне тяфта или станя ванфтовсть. Но ламода кирьсь тевс ноляма видесна. Сяда сидеста синь аноклакшневихть поминканди, атянь лятфнема шинди. Меле молихть рьвяяматне. А лядыкс эряфонь видетнень эса юкставсть кода синць илатне, стане  и ярхцамбяльхневок конат пицевсть панцевсть тянь сюнеда. Койсон, тячи кунардоннесь ули кода вельмофтемс аньцек национальнай культурань центратнень эса. Или къда, кепотьксонди, эводай ресторан мокшэрзянь кухня мархта. Конац кармай кирдема пидемань панемань кунардонь  койхнень.

Просмотров: 1077

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Олю, Ноябрь 17, 2014 в 11:49am

Ялгат, кода арьсетяда, кода мокшекс мярьгома "безквасной хлеб" али "пресный хлеб"?

Комментарий от: Numulunj pilgä, Май 17, 2012 в 6:13pm

Кроме названия молодого сыра "мичке" есть названия сыра "топо" и "сюзма".

мичке теперь называют творог, топа - просто начинка, а ещё упоминался сорт сыра крут.

Комментарий от: Numulunj pilgä, Май 17, 2012 в 10:47am

очень интересно, Михаил. а мы тут спорили, как по-мокшански "сыр". остановились на сузмафкс. а вам что известно?

Комментарий от: Numulunj pilgä, Май 15, 2012 в 10:03pm

шачемац - ям мархта. ям мархта - тонашис ильхтемацка

пара азфсь!

Комментарий от: Ortem, Май 14, 2012 в 11:58pm

а поза?

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования