Uralistica

Москуса шачемась аф шёряй мокшень кялень содамати

Кунара ётасть ся пинкне, мъзярда фкя юромонь ломаттне эрсесть аньцек синць, лия кялень лия коень апак сотцек. Сембось полафни. Полафтсь тявок. Тячи шовордавсть нароттне, шовордавсть культуратне. Ошнень, да и велетненьге эса кие аньцек аф эряй. Кие-бъди мяляфтсы китольхть атянь-атянза, тяряфни тяфта или стане ванфтомс юрснон, кяльснон, обуцяснон. Лиятнень тя прокс аф пичефти. Синь эряйхть тячи, сянь эса, мезе ули перьфкаст. И сидеста, аньцек щятямок тя тналть ёткс, ширде сафсь эряскоды юкстамс сонценнеть. Арамс кода ламотне. Тяфта тиендихть, ужяленди, мокшетневок. Лисемок юрхтстонк ошка-куване, минь кенордатама керомс семботь мезе соты эсонк юромоньконь мархта. Васендакиге, шарьхкотьф, юксневи кяльсь. И пяк дивандафты, мъзярда тяфтама оцю ошса кода Москусь, васьфнят ломань, ошэряй, ошса шачф-касф, конац содасы щавань-щетень кяльть, конац афкукс седи ваксста таколды сонь сяда тов ванфтоманц инкса.

Ялгат, ёран содафтомс тинь Дмитрий Чекмаевонь мархта. 

Дмитрий, тон шачеть-касоть Москуса, а сатомшка лац содасак мокшень кяльть. Азк, кода тяфта лиссь, въдь тячи велесовок, аф корхтамок ни ошнень колга, од ломаттне кенордайхть юкстамс тядянь алянь кяльснон.

Мокшень кяльть тонафнемс лездсь ся, мес тядязе алязень мархта кудса корхтнесть мокшекс. Ёмласта эрь кизонда якань вели (Сире Сомайсь, Ковылкинскяй районса). Тоса бабатнеть мархта рузкс аф пяк корхтават.   А ёмласта кяльсь сонць тонафтови, кда эрь шине кульсайть од валхнень…

Содат ли тон тага киньге  Москуста, или лия оцю ошста, (эсь кизоват стирьхть и цёртат), кие стане жа тяряфни корхтамс мокшекс, и лемнесы прянц мокша ломанькс апак визтть?

Мон содан кафта-колма ломатть, конат апак визтть корхтайхть мокшекс. Арсян, тя мяльсь сотневи тядятнеть-алятнень ширде. Ламоц ломаттне сашендсть велеста Москуву или лия ошу и  виздсть эсь мокшень юрснон эзда. Кодама тон москвичат, кда аф рузат? Нинге, лама мокшеда рьвяйсесть и тусть рьвакс рузонди (и лия национальностень ломаненди). Синь шабасна ёмла пингста фалу кульсть рузонь кяльть.

Тячи Россиянь ламоц ошнень эса улихть (коса аньцек кагод лангса, коса афкукс покодихть) эрь кодама мокшэрзянь землячестват, или лия организацият. Улихть тяфтамот Москусовок. Тон кирдят мархтост кодамовок соткст?

Мон ашелень вестенге стама пуромксса.

Мезе эряволь ба теест нинге тиемс, штоба шарфтомс Москувонь од ломаттнень мяльснон мокшень кяльть и культурать тонафнеманц лангс? 

Москувонь од ломаттненди эряви няфтемс мокшень культураса од интерест, няфтемс кодама мазы кяленьке. Культурась ащи аф анцек велень кштиматнень лангса… Тонафнемать, историять, литературать вельде ули кода касфтомс народть национальнай мяльёженц.

Мон аф содаса, улихть ли Москуса вастт, коса ломаттне тонафнихть мокшень (эрьзянь) кяльть. Улель пара, кда Мордовиянь правительствать ширде кеподеволь мяльсь, анокламс Москуса школа, коса ёмласта киге шабатненди улель кода тонафнемс  мокшень кяльть. Арсян, мувихть лама од ломатть, кит афольхть атказа ётамс мокшень кялень курст.

Койсот, мезенди тячи оцю ошса од ломаттненди содамат эсь юрсна, мяляфтомат атянь койхне, содама тядянь-алянь кяльсь? Или тя прокс аф эряви?

Тя пяк стака кизефкс. Сяс мес минь аш стама таза  национальнай эрьгяньке, мяльёженьке. Минь кунара эрятама руснень, татархнень мархта фкя вастса. Минь культураньке шоряф лиятнень мархта. Кяленьконди аф ламос иляды, кда аф козякофтови од мокшень валса. Кемоньшка кизода меле минь карматама корхнемс фалу рузкс, кда мезевок аф тихтяма. Койсон, минь поколенияньконь лангса культураньконь и кяленьконь одктоптомац и вихонзафтомац. Къда минь мезевок аф тихтяма, эста ни иденьке оду вестевок аф кармайхть корхтама мазыдонга мазы мокшень кяльса.

Просмотров: 659

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Numulunj pilgä, Октябрь 14, 2012 в 7:48am

Аф эряви путнемс учемат  мадьярхнень, соомитнень лангс  од валонь лийхтема тевса. 

Эряви путомс вийхть: кадык мокшень кяльсь трясамазь! Кадык сон арай

Ялгат, тяни интернет потмоса ули кода кочкамс кодама кяльса морафтомс од кулят, ваномс эрьгярькст, морафтомс сёрматфкст и меле корхнемс колгаст. Кепотьксонди ванды полафтк рузонь кяльть суоминнес телефонцот, компьютерсот, сёрматфтк интернетса пара суоминь кулялопати, эрь кодама суоминь youtube каналти, суоминь интернет ТВ-ти, суомикс корхтай форумти, мук эстейть интернетста суоми корхтай ялгат FB-са, VK-са и ва тон мярьгат Суомиса эряят. Стака тиемс тяфта мокшень кяльти? Аф. Минь ули эсь вики-еньке мокшеннеса, ётафттама VK интерфейс мокшеннес, минь улихть мокшень корхтай ялганьке, мзярс кулят аф сатыхть, а меле синьге улихть. Сашендода лездома и тисаськ эсь мокшень кялень перьфпяленьконь сяда курок! ;)

Комментарий от: Pokononj Mikaj, Октябрь 12, 2012 в 8:36am

Кода ашезе полафта...велетне эрь кизоня шавалгодыхть, а ошса киндиге тя кяльсь аф эряви. Аш стама оштт, конатнень эса мокшетне ламонцнелесть. Сянкса руз гяльть прьмсазь.

Комментарий от: Numulunj pilgä, Октябрь 11, 2012 в 11:25pm

Къда минь мезевок аф тихтяма, эста ни иденьке оду вестевок аф кармайхть корхтама мазыдонга мазы мокшень кяльса.

маряйне тянь лаамоксть. 25 кизот. мезеге изь полафтов. 

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования