Uralistica

Шумбрачи, вечкевикс ловныцят! Течи минь мартонк поладсынек пильгеоска (футбол) налксеманть коряс кортамонть.

Пильгеоскасо налксеманть вечксызь весе масторонть келес. Неть читнестэ ютыть Польшасо ды Украинасо «пси» налксематне. Россиянь курось ливтясь эсензэ группастонть, мейсэ пек ризнэвтизе минек масторонь весе сэредицятнень. Ансяк течи кортамось карми тунь аволь те ланга…

 Малав кемень иеть мон сэредян «Зенит» пильгеоскань куронть кис. Мейсь мон карминь кисэстсэредеме? Вечкевиль весе: налксема обуцяст, куронь тюстнэ, Петербург ошось… 

     

Ней монь сэредемам аволь истямо покш икелень кондямодонть те оскакуронть кис. Тувталось ашти минек Республикасо пильгеосканть кепедемасо. ПК «Мордовия» пек парсте налксесь ютазь ФНЛ (васенце дивизион) чемпионатсонть ды 100 очка марто васенце таркасто лись сехте верев – Россиянь пильгеоскань Премьер-лигас.

 

                                                                                                                                                                                                     

Ф.А. Щербаченко кепедизе кубоконть!

Покш таликазо те изнямосонть куронь ветиенть, Федор Анатольевич Щербаченконь.

Сон колмо иес кепедизе «Мордовиянь». Васняяк омбоце дивизионсто ФНЛ-с. Весе пильгеоскань содыйтне сестэ кортасть минек куронть одов алов прамодонть. Ансяк васенце сезонстонть цёратне кепедевсть мик 6-це таркас, мезе зярдояк арасель минек Республикань пильгеоскань историясонть. 2011-2012 сезононь ушодовомсто фаворитэкс лововсть ПК «Алания», «Сибирь», «Шинник». Минек куронть прявтнэ чатьмонезь тейсть эсь тев ды эрьва чи кепедсть налксицятнень ёрокчист ды ёжовчист. Истя, газетасо ды сайтнэсэ минек пильгеоска куронть лемдсть «Саранск ошонь Реал», «Мордовиясто Барселона». Вана кодашка питне максозель налксемантень. Бути васня дивакс марявсь «Мордовия» куронть васенце таркасо ютамозо, мейле содыйтне ве вайгельсэ кортасть – сехте виевть!


Эряви ледстямс сехте паро налксицятненьгак. Воротасо сезононть ушодызе Евгений Фролов, конань мейле «манизь» московонь содавикс «Динамо» курось. Сондензэ мельга кемекс ульнесь Давид Юрченко аштиесь, кона рамазель «Крылья Советовсто» . Омбоце аштицякс, полавтыцякс ульнесь Александр Агапов.

   Е. Фролов                                                                                         Д. Юрченко                                                                                                                         

                                                                                                                                 

                                                                                    

Идема таркасо кемекс ды кевекс аштесть Алексей Мулдаров капитанось. Александр Симчевич идеманть марто истяжо свал флангованть яксесь икелев оскань максомо ды чавомо.

А. Мулдаров капитанось                                            А. Симчевич (Сербонь Мастор)                                                          

                      

Сынденст башка идема таркасот Максим Будников, Евгений Осипов, Владимир Пономарев, Павел Степанец. 

Куншкасо пек парсте пряст невтсть Юрий Кулешов, Рустем Мухаметшин, Андрей Горбанец, Андрей Пазин, Максим Рогов, Герсон Асеведо ды Сергей Кузнецов.

                                                  Ю. Кулешов - кеместэ куронь налксеманть кирдиця

М. Рогов - минек куронь креатив                                            Г. Асеведо (Чили Мастор)

 

Икеле налксить Руслан Мухаметшин, Анатолий Герк, Кирилл Панченко.  Руслан ютазь сезононть перть чавсь 31 оскат!!! Кирилл - 15! 

Р. Мухаметшин - сехте ламо

оскань "совавтыця",                                                           К. Панченко - минек кемеманок

ФНЛ-нь сехте паро налксиця

Сынст полавтнеме тия-тува лиснесть Михаил Маркин ды Максим Жестоков одтнэ.Ульнесь оште Александр Минченков, конась велявтсь арендасто тиринь «Локомотив» пильгеоска куронтень. 

Те куросонть монь улить вечкевикес налксицянгак. Сынст ютксо Давид Юрченко, Юрий Кулешов, Александр Симчевич, Максим Рогов, Герсон Асеведо, Руслан Мухаметшин.
 Чарькодеви, Премьер-Лигасо налксемась веши кемекстамо эрьва кодамо налксема таркасо, позициясо. Ней минек кис кармить налксеме налксеме Антон Бобер («Крылья Советов») ды Игорь Коронов. Берянь сеяк: минек пильгеоска куросонть арась (а паряк мон а содан) вейкеяк эрзя ды мокшо. Кемдяно, шкань ютазь тосонь налксицятне кармить пшкалеме вейкест-вейкест туртов эрзянь кельсэ ды лиятне а кармить чарькодеме арсезь комбинациядонть.


                                                                                                                                                                                     

Ней Саранскоев кармить сакшномо содавикс налксицят ды содавикс курот. Васенце турось «Мордовиянень» ушодови медьковонь 22 чистэ «Старт» стадионсо ПК «Локомотив» каршо налксемасо. Эряви меремс, миненек пек карми стака налксемс истят содавикстнэнь каршо. Ды «Локомотив» куронть прявтокскак аравтозь весе масторонь келес содавикс маштыесь, Хорватонь масторонь куронь прявтось Славен Билич. 

                                                                                                       С. Билич

Эрзянь атрибутика

 

 

 

             Футболкат                                                                              Нудейть                                                                                                                        

Эряви покшолгавтомс-кемелгавтомс сэредицятнень куронтькак. Миненекак, эрзятненень, футболонь вечкицятненень, а эряви лиялемс экшсэ. Ушодовить налксематне. Мон оршаса эрзянь панаром, сайса кедезэм нудеенть. Сан стадионов ды покш мельспаросо серьгедян «икелев!», тевс нолдаса нудеенть.Истя карман «сэредеме». Сэредеме эрзякс!

Од валт:

аштиця - вратарь

идиця - защитник

куншкасо налксиця - полузащитник

чавиця - нападающий

Учеваткин Сантяй.

Просмотров: 870

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Эрзянь Мель, Июнь 26, 2012 в 11:09am

Нудеесь пек паро бас максы. Вувузелась оймси))) 

Комментарий от: Кувакань Азор, Июнь 26, 2012 в 11:02am

Сантяй, сюкпря! Паро мельсёрмадксось. А нудей гайсэ гайги? Южной Африкасо (ЮАР) вузузеллт ульнесть, пек гайсэ стадионсо гайгисть. :)

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования