Uralistica

Неологизмъёслэн министрзы: Анатолий Мурзинэн интервью

Анатолий Мурзин - удмурт кыл активист. Вордскемын Бигер улосын, нош али Эстониын улэ. Миым Анатолий "Малпа выль кыл" нимо ӵошатсконын вормиз, со сяна но ӵемысь выль кылъёс кылдытон бордын ужа. Алигес со ӟуч идиомаослы удмурт аналогъёс утчан ужзэ быдтӥз.

Удмурт Элькунын выль удмурт нимкылъёсын вырись министерство луысал ке, Анатолий соин кивалтыны тужгес но тупасал. Жаль, сыӵе ужъюрт кылдытымтэ на.

Малы со сокем руз, мыло-кыдо неологизмъёс кылдытон бордын ужа но удмурт кыллэсь вуонозэ кыӵеенгес адӟе, героймылэсь юалляським.

Толик, малы выль кылъёс кылдытон бордын сокем мыло-кыдо ужаськод? Малы сокем зол тунсыкъяськыса берыктон ужъёсы пыриськиськод?

Туж тунсыко потэ та удысын вырыны, соин ик мон но палэнэ ӧй кыльы та ужлэсь. Туала удморт кылмы жагӟемын «ӟуч но бигер жаген», соин ик кылмес чылкытгес кароно: удмурт кыл вылэ пыкиськыса выль кылъёс малпано. Вань кылъёсты улляны уз луы, со кулэ но ӧвӧл, дыр, озьы конкретно удмуртаны ваньзэ, мае ке воштоно, мае ке воштытэк ик кельтоно.

Тон кемалась ини выль кылъёс кылдытонэн выриськод. Вань-а тынад кыӵе ке выль кылъёс кылдытон ласянь огъя принципъёсыд?

Кылдэм кыл валамон мед луоз калыклы, пӧрмем кыллэн инъетэз одно ик удмурт луыны кулэ. Но таиз нимаз кыл малпаку-лэсьтыку. Мукет сямен луэ фразеологизмъёсын, соосыз ӟуч кылысь удмурт кылэ берыктыку калька пӧрме.

Вань-а выль кылъёслэн перспективазы? Ку соосыз огшоры удмурт кылъёс сямен уже кутозы ни?

Мон малпасько, выль кылъёслэн перспективазы вань. Каллен-каллен уже кутыны одно ик кутскозы на, оскисько озьы луоз шуыса. Радиоын, телевидениын, газет-журналъёсын ужасьёс, кылысь кылэ берыктӥсьёс, гожъяськисьёс тросгес вераськоназы но текстъёсазы мед кутозы вылэм та неологизмъёсты.

Кызьы выль кылъёсты кыламы ӝоггес пыртыны луэ? Со понна кыӵе амалъёс уже кутыны кулэ?

Кызьы верай ни азьлогес, СМИ вылын бадӟым кылкутон со удысын. Радио пыр нимаз передача нуыны луэ со выль кылъёсъя: кылсярысь, тазьы нимаса «Ойдолэ дышетом выль кылъёсты!». Удмурт кылъя урокъёсын дышетӥсьёслэн выль кылъёсты вӧлмытэмзы луысал.

Малпамедъя, воштӥське-а удмуртъёслэн, удмурт мерлэн выль кылъёс шоры учкемзы?

Тани кемалась ӧвӧл «Вконтакте»-ын удмурт кылэ берыктонъя выль огин усьтӥмы вал. Вакчи дыр куспын туж трос адями отчы пыриз: со возьматэ калыклы тунсыко со удыс, со тунсыкъяське со ужен, огшоры гинэ уг пырало отчы, сётэм кылъёсты берыктыны но тыршо, пиналъёс гинэ ӧвӧл, арлыдоосызгес.

Кыӵе выль кылъёсты кылдытон амал, тон сямен, тужгес но пайдаё но эффекто луэ? Шуом, куке выль кылъёсты удысъёсысь ӧнерчиос кылдыто, куке кылтодосчиос соосыз малпало яке куке вань мылкыд карисьёс та процессэ пырисько, “Малпа выль кыл” ӵошатсконын музэн?

Мон сямен, тужгес но пайдаё та уж соку, куке мон кадь энтузиастъёс тыршо, малы ке шуоно кылтодосчиос та ужен ялан уг выро, ӵошатсконъёс но вакчидыръемесь. Кыӵе ке яланужась комисси кылдытоно вылэм асьмелы, отын кылтодосчиосмы мед ужасалзы. Коньдон гинэ мед сюрысал. Тани Эстониын кылтодонъя, кылазинтонъя быдэс институтсы вань. Асьмелы соолэсь адӟем кароно вылэм.

Кулэ-а эскерыны кылкылдытонон удысысь мукет калыкъёслэсь опытзэс? Кинлэсь ужзэ удмуртъёслы лыдэ басьтоно?

Одно ик кулэ мукет калыкъёслэсь но опытзэс эскерыны. Со туж юрттэ. Дырысь дыре мон ачим тани эстон кыл шоры ӵемгес учкылӥсько, шергес финн но мадьяр кылъёсты учкылӥсько. Комиос туж азинлыко ужало кылкылдытонын, соослэсь но адӟем кароно, озьы ик мултэс уз лу мукет асьмелы ӵыжы-выжы луись калыкъёслэсь опытсэс но эскерыны.

Кыӵе коми но эстон неологизмъёс кельшо тыныд?

Коми кылысь: лэбöг - самолёт; сюраныр - носорог; жбырган - вертолёт кылъёс кельшо. Эстон кылысь: nutitelefon - смартфон, sülearvuti - ноутбук. Эшшо кельше на pilvelõhkuja кылзы, "небоскрёб".

Та возьматосъёс (примеръёс) вылэ пыкъяськыса выль удмурт кылъёс кылдытыны луэ-а?

Оглом луэ. "небоскреб" кылзэс кылсырысь эстонъёслэсь. Буквально пилемез люкись/таркась, смартфон кылзэс: визьмопелепон. Удмурт сямен но умой кылӥське.

Мар малпаськод, кызьы выль кылъёсты огазе вуттоно? Кызьы соосыз стандартоно (стандартизировать кароно)? Вань ук 2-3 вариант одӥг кыллы.

Кыллэн трос ке но вариантэз, со урод ӧвӧл кыллы. Узыргес луоз удмурт кыл - синонимъёс но кулэ ук!

Кулэ-а выль кылъёс понна кыӵе ке огъя база? Кулэ ке, кыӵе со луыны кулэ?

Выль кылъёсын огъя база сярысь ке верано, комиослэсь ик учконо-эскероно со удысын лэсьтэм ужзэс. Соослэн туж бадӟым опытсы - асьмелы но мед верасалзы, кызьы умойгес луоз лэсьтыны.

Туала удмурт кыллы мар уг тырмы?

Тросгес радио но телеэфир мед луысал, кӧня ке час висъямзы со туж ӧжыт! Тросгес удмурт кылэн вераськисез мед луоз, сое дышетӥсез но солы дышетскисез!

Туала вераськон удмурт кылэз чылкытатон но удмуртан понна мае лэсьтыны дэмласькод?

Та берыктон ужез куштоно ӧвӧл – соку ваньмыз пӧрмоз! Тросгес калык мед пыриськоз вылэм со уже – ӵошен трос уж лэсьтысалмы!

Просмотров: 449

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Ortem, Март 19, 2015 в 4:37pm

гажасько Анатолиез! со бадзым зечок

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования