Uralistica

Шадыковонь кеветиеце шиста православнай христиаттнень оцю и валда иласна – Очижись.  И хушь мокшэрзятне тячи ётафнесазь сонь, кода Христозти кемайхть, лемть эзда ни шарьхкодеви: илась эряфозонк сась аф православиять мархта, а ульсь нинге сяда инголи. И меле аньцек сявсь  эсьэзонза лия культурань пялькст, апак ёрдак прокс минценнетьке, сяда кунардоннеть. Тяконь квалма корхтай ся, што ламоц мокшень и эрзянь велеса тячимс Очижиста яксихть калмолангс (кой коса нльне пялевеста). А въдь православиясь тянь кардай.  Сонь койсонза Пасхась – тя эрекламань ила.  Валда недяляста аф лятфнесазь кулфонень, штоба аф сюнерьгофнемс Христость вельмоманц инкса кенярьдемать.  Атянь –атяньконь эряфса, мекланкт, Очижиень койхнень эса тонашить мархта сотфоль  пяк лама. Мокшэрязтне  кунцезь кулофенень лемснон.  Озондсть, штоба атянь-атятне кучельхть сембонди кеме шумбраши, штоба шачеза сёрось и перень имошне, штоба афольхть урада жувататне. Семьянь келеса яксесть калмолангс. Тоза сявондсть мархтост ярхцамбяльхть.  Тернезь кулоф раднятнень «баняса штама», «ярхцама». Очижиень карша ёткшиста раднятнень эзда киньге кудса путнесть атянь пуре. Медть атянь пурень тиемс рамсезь келеса. Ярхцамбяльсь кудса кочксевсь кафта шъра лангс. Шкай ужети шърать путнезь атянь-атятнень лемс. Сяда мърга шири – кулоф бабатнень лемс. Кърьвяснезь атянь штатолть. Эрь юромсь ванфнезе сонцень атянь штатолонц. Паломста ваксозонза путнесть вазь, коза кайсесть ярмак, путнесть алхт. Эняльдсть Очижити, эняльдьсть кулоф раднятненди, штоба синь арьсельхть пара.  Озондсть фкя кудса, меле ётнезь юромонь  лия кудтненьге. Од рьвянятне сотнекшнесть атянь штатолть видес нардамат, руцянят. Тяфта петнезь тонашистоннетнень мяльснон. Шоподембяли ни сембе марса лисендсть веле пети, тяфта «първажсезь» инжикс саф тонашистоннетнень. Ся шири ляцендсть ружьяса, тяфта панцезь атянь-атятнень киськстост шяйтаттнень. Кулоф шабатнень лемс калмолангонь шири кеворесть пидеф алхт.

Кой кона вастова ётафневсть лия илат. Алятне пуромкшнесть тя или тона юромонь куду, симсть очижиень пуреда. Тя илати сембонди эрявсь самс аф ялга, а лишмоса. Пуреса валондозь алашаснонга, штоба синьге улельхть шумбрат и афольхть сизсе сокамста.

Эста, мъзярда мокшэрзятне нинге аф кстиндафтольхть, Очижиень васенце шиня ётафневсть оцю озкст Вярдень Шкайть лемс. Тяфтама озкснень пингста пичксесть ваша, конань рамсезь инголькиге, полас-полас касфтсть эсонза раднянь пирьфова, а меле ни вельденза анасть Шкайть кядьста пархт.  Ётафневсть тя шиня озкст башка кудсовок. Кудазоравась кайсесь куцема пети пуре, уштф пянакудонь седьвальмянятнень лангс ёрясь сускопт. Тяфта петнезень тонашистоннетнень мяльснон. А тяда башка сон явондсь сембонди пидеф алхт.

Пачкодсть азкст, бъта мокшэрзятне ётафнесть Очижиень «васьфтемань» и Очижиень «прважамань» илат.  Очижикс наряжакшневсь стирь или цёра. Синь озафневсть лишме лангс. Инь пароль, къда алашась зърнянь тюссоль. Но кодавок аф равжа.  Наряжафне сашендсть вели шинь стяма ширде. Синь васьфнемост лисендсть пуре мархта, каванякшнезь, сюконякшнесть теест. Ня наряжафне и велень лия од ломаттне Очижиень иласта ётнесть кудста кудс. Тя якафтомась кой мезьса стамкаль, кода калядамань койсь.

Кудста кудс ётнихне арьсесть кудазорхненди пара шумбраши, штоба козяшисна аньцек ламонзаль и лия мезе цебярь. Азорхне тянкса каванякшнезь рядс ётайхнень, симнезь-аннезь, макссесть алхт, ярмак. Сембе очижиень недялять стирьхне-цёратне веле песа кштикшнесть-морсесть, налхксесть. Сидеста тяфтама вастова тиендевсть оцю нюряпт. Лангсост люксекшнесть Очижиста сявомок  сёксеть самс.

Николай Кошелев "Очижиень алонь кевори итть" 1855 кизось.

Очижить «първажама» лисендсь сембе велесь. Тяфтама илати нолясть поза, тиендсть пуре. Ульцяса каванязь сембонь. Очижись тушендсь шинь мадома шири.  Кунардонь мороса тя илать лемнезь Вярьдень шкайти стирькс или цёракс. Очижить «първажамста» мокшетне и эрзятне пълхнесть толхт. Кепотьксонди, Саратова аймаконь мокшетне тяфтама илань пингоня ёрясть ляи палы шужярьхть, тише. Самарань аймакса тяфтама иласта шарондозь велеснон палы тол мархта, нолясть пандоня пряста палы шарыхть. Арьсематнень коряс толсь лездсь ароптомс перьфпяльть кальдяв вийхнень, урматнень-меснень эзда.

Нинге Очижи недяляста или недяляда меле ётафневсь Авонь авань озкс. Пингстонза кудазорхне озонкшнесть Авонь авати, штоба сон кучель лама сёрода и ванфтольхце сёроть ёндолда, пяляз толда. Озксу пуромфне симондсть кеченя пуре и ёрязь кеченять вяри. Ёрдамок корхнесть: «Кадок тянь сереса касы сёрось!».

Мокшэрзятне тячимс лувондсазь «Очижить» пяк оцю илакс. Сидеста ни аф мяляфтомок тя или тона ила-кърдать танадонц, сякокс тиендьсазь семботь, мезти тонафтозь атясна-бабасна. И церькавса батюшкать валонза, къле Очижиста калмолангс аф якама, тоса аф ярхцсема, крёснень лангс ярхцамбяль аф кадондома, мокшень и эрзянь  седити-ваймоти аф пяк кенордайхть пидемс. Минь стаки пицетяма алхт, макссесаськ синь алонь кочксихненди – алалайхненди. Якатама калма лангс ярхцамбяль мархта, Очижи недялять озондомста кунцесаськ кулофнень лемснон, вештяма кядьстост лезкс. Кой коса тячимс ванфтовсь «първажамань» койське. Тя сембось сяшкава ни сувамазь, што юмай, улема аньцек мокшэрзятнень мархта. Карматама надияма ули тя нинге пяк аф курок.

 

Сембонь валда илать – ОЧИЖИТЬ мархта.

Просмотров: 523

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Numulunj pilgä, Апрель 16, 2012 в 5:17pm

Шадыков тя сонь эрзянь лемоц. Мокшекс шудиков.

Комментарий от: Pokononj Mikaj, Апрель 15, 2012 в 7:53pm

Очижись... лемть эздавок шарьхкодеви пяк оцюволь илась. "Очижи" кафта валт эзда моли "Оцю ши" = "Большой день"... Тя лемоц няеви, кода мярьгомс "почитание предков" ульсь инь оцю илась мокшетнень ёткс.

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования