Uralistica

Кода ни сёрматкшнеме «Мокшень валгярьксса», ётай 2012-це кизоть ушетксста Мордовияса нолдафтольхть мокшень кяльса терминонь валкст. «Пинге кочксемс од валхт» постса минь ваноськ цебярьснон и сялдоськ афсатыксснон. И вов кизоть песта лиссь нинге фкя «радостеньке». Тинь, улема, кизефтьсасть: мес мон тевс нолдайне тя рузонь валть, въдь ули вастозонза  прокс мокшенне. Афкукс, ули. Но нолдайне прокс аф стак.  Аньцек тяфта койсон сяда видеста няфтеви   Н. П. Огарёвонь лемса университетть видеса нолдаф «Рузонь-мокшень валкссь».  Мярьктяда, и мезе ина, пара тевсь. Тянь кодяма валкссь учендовсь кунара ни. Сон лезды школаса и вузса тонафнихненди, журналисттненди – кинди. Но вов кенярькшнемс пяк аш мезти. Од валкссь прокс ашезь цебярьгода терминонетнень коряс.  Сяка рузонь да лия кялень валхне –«сь» валмельгакс мархта. Варжакстомок «смузю» книгать потмос аф шарьхкодьсак, мезенди тя тиф? Мокшетнень шамаса  пеедеманди или руснень ди нинге киньге лиянь сельмоса кяленьконь нолдаманди?  Кати …

Кода содавсь валксть нолдамс республикань бюджетста максфоль фкя миллион цалковай. Тняра жа рузонь-эрзянетивок. Ярмаксь кода корхтаф сявф и сонь эряви  нолдамс тевс. А пингта кода фалу кържа. Тяса тёжянь кизонь илась,  тоса тага мезевок. Сембось вишконяста, кенордазь. И вов мезе инголенк. Васенце лопастакиге сельмозт прай тяфтама сёрматфкс: «В мокшанском языке буква Ъъ используется как для обозначения разделительного знака (разъзд, подъезд), так и для обозначения гласного среднего ряда среднего подъёма: кърга, пъсьмар». Кода корхнихть цитатать пец.  Вов тяфта.  И разъездське и подъездське тя валксть коряс, нят  мокшень валхт и сяда товонь лопатнень эсовок сембось станяк.

Мольхтяма сяда тов: «А» тяшкссь.   И туй…. Абажур – абажур, абзац – абзац, абонемент – абонемент, авантюра – авантюра, авария- авария…. И стак тов, и стак тов. Аньцек тяса-тоса повондыхть сельмос шура мокшень валнят: авангард – инголи молема, адаптация – тонадома, айсберг – эйпанда, аллея – шуфтонь ёткова киня и стак тов…  Къда улель пинге, афолень иренде – луволине, мъзяра тя рузонь мокшень валксса мокшень валда. Тяфтак сёрматф, эсонза валда колмогемонь ниле тёжятть и васень ваномать коряс афкукс ётафтф улема аньцек пялешкасна или цють сяда лама.

Но аф аф аньцек сялдомат азондомат тонафнеф аляньконь и аваньконь ширес -  улихть таки тя валксса  афкуксонь мокшень валхт: обездоленный – сюдоф, изнурение – пульзяма, оробеть – таярдомс, петля - килькш и стак тов. Валксса рузонь валда башка лама эльбятькста. Шоряфт валхнень танадсна. Нанять служанку – сиводемс ванни, а ваннись, кода содаф – тя няня. Начать накрапывать – ушедомс пиземс; мокшетне тяфта аф корхнихть! Ситерьгодсь пизем, кармась ситердема. И стак тов. И кода ни ульсь терминонь валкссовок пелихть мес бъди лингвистоньке тяшнемс мокшень валть ськамонза. Рузонь валда мельге моли нинге фкя рузонь вал, аньцек мокшень валмельгакс мархта, а тоса ни сонць афкуксонь мокшень валсь.  Москвич – москвич, москунь ломань. Наводка – наводяма, видеста ладяма. Начитанность – начитаннайши, ламонь содай. Неквалифицированный – аф кавалифицированнай, эсь тевонь аф содай. Тяфтама кепотькста ули кода лама лопас сёрмадомс. Улихть эрзянь кяльста сявф валхтка:  пенчкорь – куцю  васта, обнова – од оршамопель. Ну тя ни аф сяшкава керы сельме, кода рузоннеста или лия кяльста путфсь.

Пичефти нинге лияське. Таки сувафневихть эряфс валом, кашт аф молезь сёрмадомань од койхне.

Сёксеть песта Саранскяйса, Мокшэрзянь драмань национальнай театраса ульсь валкснень ломаненди няфтемасна. Сафне няфтьсть пуроптыхненди эльябтьксснон лангс, тердсть покодемста тернемс лезксонди журналисттнень и сёрмадыхнень, сяс мес синь сяда марясазь валть танадонц-таньфонц. Валксонь пуроптыхне нинге весть виденцясть пингсна ашезь сата, штоба пуроптомс сяда лама мокшень вал. Ашезь ноля тевс Шкай вал мархта книгатнень, конат аф кунара ётафтфтольхть, и конань тиемста арьсефоль лама од термин. Улема учёнаеньке стане жа ашесть варжаксне Паасоненонь валксозонза, и лия сире валкснендивок.  Ну надияфтсь ня эльбятькснень петемс валкснень од нолдамста.  Улема, мъзярда правительствась максы тага миллиотт. Тяфтама ни минь Россияса промозоньке. Тевоньке весть кярьмодезь аф тиендеви. Тарксесаськ сонь  аш ни ков ламос. А меле то пинге тееньк аф сатни, то тага мезевок.

 

Просмотров: 576

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Numulunj pilgä, Январь 15, 2013 в 6:28pm

пяк лама од валда нолдайхть тевс эрь ётафтомаса, аньцек эрявихть синь кочксема, ванондома. 25 кизот ётасть. тя тевсь киндиге аф тиеви. а монь мялезон тусь валкссь. сяс мес аноклайхне тяряфнесть мезевок тиемс

Пусъёс

© 2017   Created by Ortem.   При поддержке

Эмблемы  |  Сообщить о проблеме  |  Условия использования