Мускоысь удмуртьёслэн пикниксы "Кырӟаса лэзём али..."

14-тӥ пӧсьтолэзе Мускоын улӥсь удмуртъёс выльысен люкаськизы. Пумиськонамы удмурт но мукет финн-угор кырӟанъёсты дышетӥм, эктыны вырим, сиим-вераським, ог-огенымы тодматским-марам. Пӧламы, удмуртъёс сяна, белорус, эстон но ӟуч мылкыдчиос но вуизы. Шунды шорын пыжиськыса, Коломенское паркын пуким, Дьяково городище вырйыллэн выжыяз. Тодады вайиськоды, луоз, татын ик Акашка нуналэ эшъёсыным курегпуз питыръямы. Тани татысь шедьтэмды луоз: 1 но 2-тӥ видео.

Пумиськонмес фризбиен шудыса кутскем бӧрсьы, "ӝӧк" сьӧры пуксимы, Лена милемыз Алнаш палъёсысь бичам узы-борыен но турынъёсын, юн ческыт зын но шӧмо чаен сектаз. Кӧня ке кӧтмес тырем бере нош кырӟан но мытӥм ини. "Кинъёс, кинъёс лыктӥллям" кырӟанэн кутским, кырӟамлэсь азьло нош удмурт куараос сярысь мадим, капчиенгес кылмес тодӥсьтэмъёслэн лыдӟемзы но кырӟамзы мед луоз.

Шумпотымон, туннэ выльысен чузъяськиз та интыосын финн-угор кылъем кырӟан но выль муртъёс бордамы итӥськизы! Али ке но лӧптэм мылкыдын гожъясько! Кӧттырымон кырӟай кадь, но вань кырӟанъёсмес но кырӟаса ӧм быдтэ, ява. Дасяса, нимаз бырйиса вайим вал кырӟанъёсты. Удмурт луисьтэмъёслы каллен, ӝож, 2 куараен кырӟам гуръёс яраськизыгес. Со калык кырӟанъёсын гурез но, кылъёсыз но макем чебересь! "Куар ву пыдсы выйытозь", "чылкыт ошмес - уно бӧрдэм синвуосы" но мукет - макем чебер, ӧвӧл, шат?

Та пумиськонмы пумысен Мускоысь иворъёс

Настя но Лена.

Выль адямиос ми пӧлын - Лида но Аня

Белоруссиысь Светлана но Наталимы. Наташаен ми "Зорай" нимо ансамбльын ӵош кырӟаллямы вал, Ижкарысь лицейын дышетскыкумы. Тау Розита Андриановналы но Ангелина Ефремовналы, куке-соку дышетэм кырӟанъёсты али ке но уже кутӥськом, тужгес но "Бусъёсын шобырскизы" кык куараен нёжъяны яратӥськом.