Uralistica

Ётай кизоть Европань Орамть* и Европань Сотксть* проектснон видеса эряфс сувафтфоль тяфтама мялень салай арьсемка: «Россиянь финно-угратнень эряма регионца марстоньтонафнемань школатненди национальностень кяльхнень эса терминологиянь валксонь тиемась».  Июль ковста Венгрияса Бадачоньтомай ошса ётась сатфксонь ваномань семинар, конанди вятикс ульсь сонць, валксонь нолдамать коряс мялень максысь, Янош Пустаи.

Тевсь ушетфоль. Тевсь тифоль. Кадок аф оцю тиражса, но печатлафтольхть валкскятне историять, литературать, информатикать, математикать, физикать, химиять, биологиять, географиять, ломаньтналонь содамать, лингвистикать коряс. Эрьть эса вете сядоть малава термин.  Аф содаса кода латцевихть тевсна лиятнень, но мокшеннетнень лувомста кодамовок весяла мяльхть пряс аф сашендыхть. Эсток афи шарьхкодьсак: кати рахама, кати аварьдема. Фкя пяльде мокшень валксонь тиихненди сюкпря азома. Аф ваномок нюрьхкяня пингть лангс, а максфоль аньцек ков, синь мезе аф мезе кочкасть-ётафтсть. Но омба пяльде юкстафтольхть нльне афкуксонь мокшень валхне: омутсь лядсь омутокс, хушь атяньке да бабаньке сонь фалу лемнелезь томбакс.

Кой кона валксне сяда удалафт. Пуроптысна тяряфнесть кочксемс лия кяльса сявф валхненди мокшень лепт. Но тиендевсь тя кода бъди пелезня. А сяс кержи китьксти  сёрматкшневсть кафцьке варианттне марса, рузоннесь  -сь валмельгакс мархта  и мокшеннеське. (Кепотьксонди литературань терминонь валксса: повествованиясь – азондомась,  постмодернизамась – модернизмада мельденнесь, прибауткась – пеетькссь и стак тов). Греконь, латинонь кяльста сявфсь сяда сидеста катф тяфтак. Но повондыхть стама васттка, коса пуроптыхне прокс ашезь сярятьфне пряснон. Марасть рузонь валкснень эзда сёрматф валхнень пес «-сьт» и сембе. (Кепотьксонди историянь терминонь валксса: глобальные проблемы – глобальнай проблематне, хушь литературань валксса проблематне ётафтфт кода прябалат; европейский союз – европейскяй союзсь, интенсивное земледелие - интенсивнай земледелиясь и стак тов). Афкукс, од валонь максомась пелькс. Арьсемс синь вишкста стака. Ну хушь рузонь валмельгакснень сяда мокшекс шарфтолезь. Тя вдь аф сяшкава оцю сталмось тяштемс аф крестьянскяй дворсь, а крестьянинонь пирьфсь, аф греческяй полиссь, а греконь полиссь. (Сембе терминонь валкснень ули кода лувомс вов тяса: http://komikyv.ru/blog/dictionary/42.html).

Улема Янош Пустаи, финнонь-угрань содаф учёнайсь, мъзярда арьсесь терминонь валкснень колга, учсь, што эвондайхть афкуксонь од термитт.  Синь кармайхть нолявома тевс школаса химиять, физикать, биологиять тонафнемаса. Тя лезды вихонзафтомс кяленьконь, няфтемс: синьге лангсост ули кода корхтамс наукать колга. Но кода содаф «пара тяряфтомаса ацаф кись аду». Валксне лиссть. Синь школатнендивок пачфтевихть. Шабатне  тонафтыснон мархта рахсихть-тиихть лангсост, и ёрдасазь ковга пулю ужети, штоба оду ни вестевок аф сявондемс кядезост. И тя нинге аф инь пелькссь. А сембода кальдявсна тяфтама «тефнень», койсон, вов мезьса: мокшень да и лия юромонь шабатне кармайхть седи ваксста кемама, што минь кяленьке - тя ашу кяль. Конац аньцек и кондясти велень бабанди корхнемс. Вдь эсонза аф азови тяниень пингонь од ломантть мялец. А сяс мокшень кяльтьке вастоц – пулю ужеса. И прокс аш местема ётафнемс пингцень сонь тонафнеманцты.

И нинге пяк таколфты туфтал: хушь валом валом, но эряфс сувафневихть сёрмадомань од вешфксне. Валксонь лувихне, дивандакшнемок "пялес пиф" термиттнень лангс, улема, ашесть шарфта мяль сянди, мезе сёрматф таблицатнень пряса. А тоса ялгат тяштьф аф «мокшень ЛЕПНЕ» – кода минь тонафтомазь васенце класста сявомок, и кода анай кяленьке корхтамста, а «мокшень ЛЕМТНЕ». Хушь мезевок мокшенне тяса аш. Улема марстонь кялень тиемась стаки мольфтеви. Но тя ни лия корхтама.

Валонь арьсемась – тевсь аф тёждя. Фкя ломаненди сон аф сяськови, кодама ба лац тонафнеф филологокс ся афоль уле. Эрь кодама видень терминонь пуроптомста эряви кирдемс соткс тя или тона наукаса шарьхкоди ломань мархта. Тага и тага лувондомс тяда инголе кочкаф валкснень и литературать. Тянди эряви аф фкя ков и нльне аф фкя киза. Но тарксемс пингть аш ни кода. Сят, кие тяфта или стане сотфт мокшень кяльть мархта,  покодихть вельденза, или аньцек корхнихть мокшекс кудъёткса, улема кунара ни няезь: кяленьконди аф сатнихть од валхт. Эряфсь аф ащи фкя вастса. Шиста шис эсонза эвондакшни мезе-бъди од. И тя одть сонцень лемонза. Лама киза ни минь тонадоме сявондемс ня лепнень рузонь кяльста, конанди синь састь коста бъди тага. И тя тапай мокшень кяльть афкуксонь таньфонц. Кода няйсаськ, ялгат, учемс лезкс пяк аш коста. Сави эстееньк арьсемс-пуроптомс од валхт. А меле нолямс синь тевс корхтамаса и сёрмадомаса. Минь кяленьке аф ашу. Лангсонза ули кода корхтамс эрь мезть кувалма.

Од валонь лангса покодемась  мольфтеви ни «Уралистика» финнонь-угрань социалень кярьмоса, «Мокшень валлувкс» полгаса. Нежетькшнеда, кинь ули мялец, марстонь тевти. И нюрьхкяня пинге ётазь, шять, эвондайхть миньцень валксоньке, конань ули аф визькс няфтемс кода мокшети, стане и лия юромонь ломанттивок.

*Европань Советсь.

*Европань Союзсь.

Просмотров: 518

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Numulunj pilgä, Март 15, 2012 в 11:54pm

Арьсян аф эряви  молемс Янош Пустаить арьсемканц каршес. Ули кода сёрмадомс теенза сёрма эльбятькснень колга. Минць эльбятькснень петьсаськ? Курок карматама путома од валхнень кярькссна башка сайтса. 

Комментарий от: Pokononj Mikaj, Март 15, 2012 в 9:26pm

Визькс !!! Тя проблемать нильзе кадомс, мон думандан эряви отправондамс письма, сятненди кит тя  терминологическяй словарьсь тиезь... нужна шум кеподемс! Тя аф мокшень кяль...наверна тя самай ни мордовскяй языксь.......... Кядьсон "Мокшень правда" кизонь аль сёксень нолдамац, конать эса улсь ва тя кизефкссь, од правилатнень мархта. Няеледе мъзяра эсонза тонафтыхнень сюцемаснон ульсть... сяка нолдазь тевти...

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования