Uralistica

Эрзянь раськесь сюпав пингеде пингес ванстозь койсэ-кирдасо, конатнень ютксо Озкстнэ. Сынь эрсить кудонь, буень, велень. Сехте покшось ды сюпавось - те Раськень Озксось. Сонзэ сюпавдояк–сюпав домкачизэ. Те Озкстонть башка лиятатне эрьсить эрьва иестэ, кой-конататне натой мик знярыяксть  иезэнзэ. Раськень Озксось ютавтневи аволь сеедьстэ, колмо  иес весть.

Ветить те ине вастовоманть Озксава ды Озксатя. Ушодови весемесь Раськень штатолонь кирвазтемасто.

Таркась пурназь а стяко. Игнатбуень Чукалы велень вакссо Маардонть улить ламо пелькстамот. Веенстнэ кортыть, тесэ ногайтнень марто тюремадонть мейле калмазь малав 11 тёжат идицят: эрзят, мариецт, чувашт ды удмуртт. Вейсэнь калмось теезь курганонь кондямокс, конань ало ашти ловажа марто кевень саркофаг. Омбоцетнень мелест коряс те Маарось теевсь икелень Озкстнэнь пингстэ пуромозетнень модань кандомань кувалт. Улить и лия пелькстамот, нама, те шкас те таркатнесэ апак ютавт кодаткак археологической ванномат, секскак мертяно ансяк -те Мааронть вакссо Раськень Озкстнэ ютавтовить коень коряс, конатнень ундокстнэ аштить куншка пингетнесэ.

      Мааронть лангсо кевкень лазось

Умонь шкатнестэ, Раськень Озксось ютавтневсь 20-30 иес весть. Царьтнень  меремаст коряс, Ине кенярксчинть ветямозо кардазель.

Покшигнатбуесэ, 370 иень ютазь Чукалонь Эрямопандосонть 1999 иестэ Раськень Озксось вельмевтезель. Тосо васенцеде эрзятнень историясост кочкавсь Эрзянь Иназорось-Кшуманцянь Пиргуж. Седе мейле коесь поладозель.

Эрзянь раськень Инязорось. Фотось Олёшень

Кочкавсь сон Атянь Эзементь пингстэ, кекшезь вайгелень максомасо. Истямоль уш коесь. Атянь Эзементень  кезэрень пингстэ саезь пурнавильть сыре, превей мельванома ломантне, тесэ, арсевильть ламо кевкстемат. Ладявильть буетнень ды раськетнень ютксо модань явома пелькстамотне, каявксонь покшолматне. Тесэ весемезесь ульнесь ливтезь лангс, кемевсь,  соньсь Инешкипазось, покштятне-сэрдятне, кирдийтне-аштийтне ульнесть озксов сыцятнень марто. Весемезесь арсевиль мирём. Те ульнесь Ине промкс, Инекужо.

Раськень Озксонь инжеть

Паро коесь Раськень Озксонь пингстэ-те эрзянь Ине ломанень ледстемась. Христианствадо икеле эрзятнень ульнесь кой: лемень кундамочистэнть вастомс Тоначистэ кулозенть. Тень кисэ малавиксэнзэ эйстэ вейкесь оршнилинзе кулозенть оршамонзо ды сыль ёвтазь шкастонть. Озксонть пингстэ истямо лувсо вастовить Тюштя, Йовлань Оло, Арзамасонь Олёна, Степан Эрьзя ды лията содавикстнэ.

Седе тов, кода икеле шкатнестэ, Мааронть малава сокас кильдезь алашанть ветить од цератне, таргить кикс. Сонзэ эйс  эрьвась каи паргинестэнзэ, пацине потстонзо эрямотаркастост туезь моданть. Истя тееви  Ине сюлмавксось покштятнень, Инешкипазонть, ды пертьпельксэнь кирдийтнень марто, раськесь вейсэндяви весе эрзянь ломантнень марто. 

Мааронь одкстомтома шкасто

Мейле Мааронть перька пуромозетне кундыть кедте-кедьс ды пурнави  вейке покш петнявкс- инекужо. Ломантне ютыть паксянть перька ды пуромить  куншка куронтень, кутморить, теевсть содавиксэкс. А ёвтавикс вий  те шкастонть, зярдо вейке раськень ломантне кедте кундазь. Оймесь пешкеди Раськенть кисэ каштанчисэ! Маряви, а изнявтано мейсэяк! Мезеськак таркасонзо а ашти, эряви поладомс кенярксчинть, явома те кеме рисьменть.

Раськень Озкссо ве кужосо ютамонть пингстэ

Аламо шкань ютазь Озксось поладови. Мааронть ве ёно од цератне пурныть пелькстамот торонь ёртнемасо, бороцямосо. 

 Омбоце ёнксось мазыгавты эрзяватнень мазый оршамопельсэст,  тосо ютавтови оршамопелень невтемась. Зярыя иень перть сонзэ пурны «Руця» вейсэндявксось.

Эрзянь коень ярсамопельть кандыть инжетне.  Лемень кундамонь ям пидеви свал Раськень Озксонть пингстэ.

Эрзянь коень ярсамопелть. Фотось Олёшень

Кода уш сермадынь седее вере, икеле, Раськень Озкстнэ ютавтневильть седе  чуросто, секскак вастовоматне поладовильть кавто-колмо чинть перть. Те шкастонть кемекстазельть микшнемань-рамамонь ды мик семияньгак сюлмот.

Оят, кода ютавтовсь те иень  Раськень Озксось, теде домкасто  ловнодо седее тов молиця сёрмадовксстонть, а монь тевем ульнесь- ёвтнемс те Ине вастовоманть историясто саевкстнэде.  Арсян, вития меленк. Бути арась, нолдынк чумом. 

Valda

Просмотров: 456

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Santjai, Июль 17, 2013 в 9:00pm

Сюкпря Валданень!

Комментарий от: Erush Vezhai, Июль 17, 2013 в 7:08pm

Сюконямот паро сёрмадксонть кис, ялгай.

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования