Uralistica

Моронзо лексить тундонь чисэ. Евгений Самаркин

 

Течи ули мелем ёвтнемс вечкевикс ловныцян туртов валдо моротнень морыцядонть, чевте эрзянь ломанде. Те ломанесь – Евгений Самаркин (отец Евгений), Орданьбуень Чукал велень эрзянь цёрась.

Шумбра чи, Евгений. Мон эрзянь кунсолыцятнень пельде ёвтан седейшкава сюкпря тонть валдо моротнень кисэ. Теке марто чачсть прясон кевкстемат. Кода ды зярдо весе ушодовсь? Мейстэ весе кармась?

Шумбратадо, вечкевикс ялгат, оят. Сюкпря тыненк паро валонк кисэ. Весе ушодовсь «Слава Богу за всё» васенце нолдавксонть эйстэ. Тозонь совасть акапеллань морот, духовной кантат. Сеске мерян, неть моротне аволь эсень, аволь авторонь. Омбоце ноллдавксось, конанть лемезэ «Русь жива» лиссь 2009 иестэ. Те альбомонтень совасть зяроя эсень лацевкс моротнеяк. 2010 иестэ мастор лангс лиссь «Божий храм» моропусмось. Лиятнень эйстэ сон явови сеньсэ: эсень ды лия моротне эйсэнзэ теезь-чапозь аранжировка марто. Весемезэ нолдазь колмо моропусмот рузонь кельсэ.

OtecEvgenijSamarkin Daruj nam Bozhe blagodat.mp3


Кода чачсь арсемась сёрмадомс морот эрзянь кельсэ?

Неть арсематне свал ульнесть седейсэнь. 11 иестэ саезь карминь сёрмадомо стихть эрзякс. Колмоксть савкшнось  ульнемс эрзянь од сёрмадейтнень семинарсо. Минек сёрмадома тевсэ ёрокчисэнек сестэ ваннокшность ламо содавикс ломанть, лездасть тенек седе парсте тонадомс те тевентень. Неть ломантне ютксо ульнесть истят содавикстнэ, кода Павел Любаев, Серафима Люлякина, Иван Калинкин, Александр Инжеватов, Александр Доронин, Николай Ишуткин… Сёрмадовксон лиснесть «Эрзянь правдасо», «Сяткосо»,  «Пионерень вайгельсэ» («Чилисема»). Вана истя, вишка пингстэ саезь те мелесь яла кайсь-кепететсь.Те монь тиринь келем, секскак бажан кортамс, сёрмадомс, морамс сонзэ эйсэ.

Зярдо нолдазель эрзянь моропусмотне ды мезнень сынь алтазь?

Васенце моропусмось «Морот тиринь веледе» лиссь 2010 иестэ. Алтазь сон тиринь велентень, тиринь келентень, тиринь пертьпельксэнтень, вечкевикстнэнь-малавикстнэнь туртов.





Омбоцесь эрямос лиссь те 2012 иестэнть ды лемезэ «Россиядо моран».   

Умарьчувто ды эрямось.wma

Авардть монь седеем.wma


Весе моротне саезь эрямосто, арсематнестэ-ризнэматнестэ, мелявкстнэстэ. Весе моротне эрязь, ютавтозь седеень  ды оймень пачк. Моротнень вельде арсян кандомс паро лиятненень. Бути ломантненень ули стака, кадык путсызь монь моротнень. Эйзэст мон путынь пазнэнь вечкема, валдо ойме. Монгак яла, зярдо эрси стака, сэтьме таркасо путсынь моротнень ды сынь максыть монень вийть.


Евгений, кодат мельть ёвтавлить минек ловныцятненень?

Арсян кадык ломантне вечкить вейкест вейкест, седе аламо кеж кирдить седейсэст. Ней ламот вешнить сюпалгадома, чиить ярмак мельга. Эрядо Пазонь валонть вельде. Кода Сон мерсь, васняяк сюпалгавтынк ойменк. Сюпав ойме ломантненень Пазось лиянтькак максы. Истя монь моротнень чарькодемс, эряви эрямс паз маро седейсэ. Эрьвантень арсян муемс валдо ды виде ки эрямосонть.

 

Паро мельсэ кунсолан неть валдо моротнесэ. Зярдо вадря, зярдо нусманя, зярдо виень а сатыть, сестэ путан Евгениень моротнень,кунсолан ды ежом кепети. Истят морот лисить ансяк келей, панжадо ды валдо ойместэ. Арсетяно тонеть, Евгений, шумбрачи, валдо мельть-превть, ансяк паро весе малавиксэть туртов. Седе тов кенярдовт эйсэнек оймень моросот.

Евгений Самаркинэнь  моротне совить седейс, пачкодить оймес ды лиядыть тоско весе эрямонь пингень перть.                                                                                                      

                                                                                                                                 Учеватонь Сантяй

Просмотров: 1415

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Кувакань Азор, Февраль 27, 2012 в 10:15am

Зярдо моронзо кунсолан,уш чарькодеви,мезе те эрзянь цёрась паро ойме марто.

Комментарий от: Jalt, Февраль 27, 2012 в 7:43am

Паро. Сюкпря те вастовоманть кисэ =)

Комментарий от: Santjai, Февраль 26, 2012 в 9:32pm

Кортынь мартонзо.Пек чевте седей ломанесь. Паро мартонзо кортнемс...

Комментарий от: Кувакань Азор, Февраль 26, 2012 в 9:26pm

Мезеяк,иля арсе,путык монь артовксот мельсёрмадксот,теке тев сынь улить ведень тешкст (водяные знаки "Инязор Кува-кин") :)

Комментарий от: Эрзянь Мель, Февраль 26, 2012 в 9:23pm

Мон путыксэлия, мейле арсинь а путомс. Те эсеть,авторской) Паро - путык))

Комментарий от: Кувакань Азор, Февраль 26, 2012 в 9:19pm

Монь артовксом се морыцяде ды паро цёрадо:

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования