«Шунды тылсиос»

Гужем вакыт нылпиос понна - тужгес шудоез. Угось соку кӧттыр шутэтскыны, куное ветлыны, вуэ пырыны, нуназеозь изьыны луэ. Дышетскисьёслэсь ял каронзэс умойгес радъян понна, Элькунамы уно лагерьёс но ужало. Одӥгез – «Шунды тылсиос» - алигес Можга карысь педколледжын радъяськиз.

Удмуртиысь быгатӥсь удмурт нылпиос понна ортчись «Шундыкар» сямен ик, «Шунды тылсиосын» пиналъёс портэм удысъёсъя дышетскизы. Туэ 4 направлениос ужазы: «Театр» отрядлэн ӧнерчиез вал К. А. Чайникова, «Фольклорлэн» Я. А. Беляева, «Хореографилэн» Е. В. Сюгаева, «Эстрадалэн» - М. В. Прозорова. Вань отрядъёслэн тунсыко нимъёссы вал: «Уӵыпиос», «Даур адямиос», «Мушъёс» но «Пычъёс».

Дышетскемзы бере, лагере вуэм лымшор ёросъёсысь 40 пиналъёс тунсыко ужрадъёсы пыриськизы. 4 нунал ӵоже соос станциосъя «Отӥ-тати», «Песьтэр утчан», «mon amur» нимо ӵошатсконъёсын бызьылизы, позыръяськон дыръя радъям «Стартин»-ын эктӥзы, «Яратон» темая туспуктэмъёс лэсьтӥзы, чеберина но батыр бырйизы, «Адӟи но пограй» передачае вуылӥзы, Лопшо Педуньлэн азбараз удмуртъёслэсь вашкала сям-йылолъёссэс возьматӥзы, «Фураж», «Быжтэм парсь» но трос мукет ужрадъёсын асьсэды туж йӧно адӟытӥзы.

Туэ «Шунды тылсиос» лагерь удмурт сям-йылолъёслы сӥземын вал. Но котькуд нуналлэн нимъёсыз висъяськизы: нырысетиез нимаськиз «Ойдолэ эшъяськом», кыкетӥез – «Лопшо Педуньлэн азбараз», куинетӥез – «Ми – Голливудысь кизилиос», ньылетӥез – «Яратисьёслэн нуналзы» но витетӥез, бертон нунал, - «Ноку но ум люкиське». Ӵапак та темаосъя ужрадъёс но ортчизы.

Лагерьлэн кивалтӥсез – Марина Прозорова (тросэз понна со Карпова фамилиен тодмо) – азьвыл но «Шунды тылсиосыз» радъялляз ни. Туэ соин ӵош мыло-кыдо ужазы валтӥсь вожатой, Удмурт егитъёслэн мерлыко «Шунды» огазеяськонзылэн Можга карысь ёзэтэн кивалтӥсь Оксана Куликова но солэн эшъёсыз, Можга педколледжын дышетскись яке йылпумъям егитъёс Максим Мыльников, Алёша Севастьянов, Надя Сапожникова но Алина Герасимова.

Оксана Куликова вера: «Огъя лагерьмы пормиз. Тросэз малпам ужъёс улонэ пыӵазы. Вожатойёс ӵош ужазы, ӝыны кылъя огмес огмы валамы. Пиналъёс но самой быгатӥсьёсыз дорамы вуиллям». Оскомы, «шунды тылсиос» куке но яркыт ӝуатскозы но пиштозы удмурт шаерамы, нош та лагерь азьланяз но усьялоз осъёссэ быгатӥсь удмурт нылпиослы.

Лена Рябина