Uralistica

Пейдемась вейсэнди. Статуст эрзянь кельсэ.

Эрямонь перть минь бажатано вейсэндямс эрзянь раськенть ды невтемс сонзэ сюпавчинзэ. Тенень тееви ламо: сермадовить книгат, нолдавить газетат-журналт, ветявить блогт, теевить скульптурат ды артовкст… Ламо мезе. Арсемам коряс, те пек паро, те весе виевгавты ломанень оймень сюпавчинть. Ансяк сеедьстэ стувтнетяно лия аспектэнть – пейдеманть ды ракамонть! Пейдемась вейсэнди! Те арсеманть видестэ невтизь Орданьбуе енксонь Татьяна Маторкина (Орозбуе), Елена Забелина ды Алена Артамонова (кавонест Кеченьбуень) од тейтерькатне. Сынь колмонест тонавтнить Орозбуень 11 классо. Эйзюрковонь 21 чистэ «Контактсо» сынь панжсть «Статуст эрзянь кельсэ» лопа.

Те пурнавксонть юрсо ашти эрзянь кельсэ демотиваторонь теемась. Паро мельсэ од эрзянь ломантне кармасть тов совсеме. Ледстясынек статистиканть: 10 чис те лопантень сермадстызь пряст 1543 ломанть!!! Эрьва чи яла ламолгадыть сынст ловныцятне. Тежадо ламо од эрзят ловныть, пейдить, кортнить эрзякс. Кодамо мельспаро, кодамо часия! Ды прявт «Эрзят, вейсэ виевтяно!» пурнавксонть, козонь ней совить малав 1800 ломанть, курок ютасызь.


Тейтерькатненень прясон чачсть зяроя кевкстемат.

Татьяна Маторкина


- Шумбрат, Таня! Косто саевсь те арсемась?


- Шумбрачи, ялгат. Кода-бути умок ютавтокшнынь вейке рузонь статус эрзянь кельс. Оянень сон вельть тукшнось мельс. Кода сон мерсь, минек эрзянь ойметнес эрзякс седе вадрясто пачкоди статусонть смустезэ. Ней ледсь те мелезэнь ды сась превезэнь теемс те пурнавксонть.


- А мекс эрзякс?
- Эрзянь келесь – те минек тиринь келенек. Минь эйсэнзэ кортатано свал, эйсэнзэ кортыть тетянок ды аванок, кортасть покштянок ды бабанок. Ансяк кой-кона од ломантне кармасть стувтомо эрзянь прядост, кармасть виздеме тиринь кельдест. Те пек а паро. А «Контактсо» аштить седе ламо од ломанть ды сынь весе ловныть эрзянь статуст, саить "ёвтнемс ялгатненень". Ломантне ней а пелить невтемс весенень – сынь эрзят!


- Мезе евтавлить неень эрзятненень?
- Кадык а виздить эсь кельдест, эдь те сынст сюпавчист. Кадык пряст верьга кандыть: рузонь кельденть башка содасызь эрзянсентькак. Кадык ловныть минек статустнэсэ, саить эйсэст мельс, ёвтнить ояст туртов! Эрзят эрясть, эрить ды кармить эрямо!



                                                                                                                                      Елена Забелина


- Лена, кода тонеть сась те мелесь?
- Таня вейке чистэ кода-бути пшкадсь монень те меленть марто. Мон каршо эзинь карма молеме. Минек од прятнес мезе ансяк а сы (мизолды).


- Тынь тейтядо вейсэ неть ракамкатнень?
- Эрси эрьва кода. Седе сеедьстэ тейтяно весе вейсэ. Минек кортамонок ули: – «Ну мезе, важодтяно, тейтерть». Истя юты минек важодеманок. Минь покш мельспаросо тейтяно. Тиринь келесь касты оймень ежо!



 - Учиде истя зяро тынк тевень вечкицят?

Видьстэ меремс, эзинек арсеяк. Чиде чис ловныцятне ламолгадыть ды те пек минек кецявты. Кадык свал гайги вечкевикс эрзянь келесь!






Алена Артамонова





- Алена, кодамо лезэ тонеть эрзянь кельсэ статустнэ лангсо важодемадонть?


- Монень те тевесь маряви вельть вечкевицякс. Сон максы лезэ. Минь тейтяно , арсян, паро тев. Ведь те пурнавкссонть вейсэндявить эрзятне. Улить ломанть, конатне виздить ёвтамо эрзя лемест. Минь верьга кандтнетяно ЭРЗЯ лементь. Весенень арсетяно а виздемс тиринь кельде. Кодамо мазый ды гайтев келенек! Рузонь кельсэ теке пейдкшнемась аволь истя ракавты, кода эрзякс ютавтозесь.

Истят ракамонь статуст теить тейтерькатне:

http://vk.com/erzyan_statust

Эряви тешкстамс лиянтькак: тейтертне ушодсть сермадомо диалектэнь кельсэ ды тия-тува нолдасть тевс рузонь валт. Ансяк а эряви тень кисэ, арсян, сялдомс. Ламот эрзятне, сынст ловныцятне, мель ёвтыть неть ракамотнесэ эрзянь келень ваньскавтомадо. Тейтертне парсте марить эсь ловныцясост ды чиде чис паролгавтыть яла эрзянь келест! Тейтерть, весе эрзятнень пельде евтан тыненк седейшкава сюкпря паро тевенк кисэ. Тынь кепедтядо эрзякс кортамонтень ды келень тонавтнемантень мель. Седе ламо истят превей ды ежов од ломанть миненек раськентень. Те весе кемевти раськенек седе тов касомадо! Арсян тыненк, паро тейтерькат, шумбрачи, од статуст ды ламо сермадстыцят!

«Эрзянь меленть» течи тыненк пачтия мон, Учеваткин Сантяй.

P.S. Зярс анокстынь те статьянть, «Статуст эрзянь кельсэ» лопась келейгадсь 1567 сермадстыцяс.

Просмотров: 888

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Кувакань Азор, Апрель 3, 2012 в 12:22pm

Интернетс од ломанть састь,зярс аламо теицятнень,ансяк тевесь моли икелев. Сюкпря креативной тевенть кис весенень!

Так как Мордовия является "лагерем с колючей проволокой" для эрзянских активистов,то интернет даёт возможность Эрзянам всех поколений сохранять и продвигать родной язык,культуру в интернете,находясь далеко друг от друга.

Комментарий от: Boljaenj Syresj, Апрель 3, 2012 в 10:02am

Инеалтымась максы ломатненень оля апак пеле ёвтамс эсь валонть, эсь меленть. Эряза Эрзянь Тевенть касомазо, арсян, тешксты видечинзэ  арсеманть:- Максодо оля ёвтамс вал, ды кеменьшка энтузиаст, кандо лазтнэстэ кепедьсызь эсь Раськенть!/////  Интернэт - средство обеспечивающее право на свободу слова.  Активизация "эрзянского движения" в Интернэте, это подтверждение высказывания:- "Обеспечьте свободу слова и  десяток энтузтастов "из гроба" поднимет свою нацию"!!! Молодцы девочки!

Комментарий от: Zineron' Santyai, Апрель 3, 2012 в 9:15am

Пек паро. Мон аштян мельспаросо. Арсян истят тейтертнеде ды цёратнеде седеяк ламолгадыть. Ды минек келеськак теи покш эскелькс икелев.

Комментарий от: Эрзянь Мель, Апрель 3, 2012 в 8:59am

Сюконямотне од тейтерькатненень.

Комментарий от: Erush Vezhai, Апрель 3, 2012 в 8:51am

Сюконямот,Сантяй, паро тевенк кис! Мелезэм пек тусь!

Комментарий от: Эрзянь Мель, Апрель 2, 2012 в 11:39pm

Лиякс меремс стувтнетяно од ломантнень мелест. Весе тееви покштнэнь мелест коряс, а од ломанень мелесь нолдави... Эрявить дискотекат, ракамкат))

Комментарий от: PaoL, Апрель 2, 2012 в 11:36pm

"Ансяк сеедьстэ стувтнетяно лия аспектэнть – пейдеманть ды ракамонть!"

Арсян пейдемань-ракамонь аспектнэ - од ломанень оймезэ анельгевиця пелькс, секс весенень вечкевсь те идеясь)). 

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования