Uralistica

Торама ды Вильянди. Кода эрзянь ды мокшонь цёратне якасть Эстэнь масторов

Тевесь ульнесь кизна…
Мольсть медьковонь меельце читне. Минь («Торама») пель иеде теде икеле карминек содамо Вильяндинь фестивалев тердемадонть. Ламот морыцятнеде седе икелевгак яксесть тов, раськефестивалев, морсеме. Мон – васенцеде. Васенцеде мон понган истямо покш морамо таркас, косо сави важодемс аволь вейке чи.
Оршамотне анокстазь, седямотне, ладсезь, шумбрачитне ванстозь. Сыргинек! Сыргинек машинасо, козонь кельгить 8 (кавксо) ломанть.
Кода свал эрси Торамань цёратне ютксо, ардомань шкась ютась шалтсо, паро мельсэ, ракамосо. Цёратне свал муить мезде ракамс. Тейтертне тень коряс тунь лият.
Лиясто лотксинек оймсе-ярсамо. Пек пряс кадовсь Московонь пачк стака ардомась. Певтеме машинат… Московонь ютазь неинек велень эли ошонь пек мельстуиця лем. Гораи! Ды те теке минек содавикс эрзянь моронок («Гарай»). Кецинек. Куроксто фотокувне ды седе тов. Кись учи…

Эзь марявояк, кода пачкодинек Рузонь-Эстэнь мастортнь петнес. Эстэнь ломантне, кодак марить ков ардтано, сеске мизолдозевить миненек ды арсить паро ки. Сеске неяви: тесэ пек вечксызь те раськеморонь фестиваленть. Сельмесь кецтни Эстэнь масторонтень: китне видеть, пиретне-пакстятне теке ёвкссто кужинеть. Эрямо тарканокак пек мельстуиця. Аволь косояк, Вильянди ошонь инжекудосо, конась ашти Вильянди эрькенть чиресэ. Тесэ весе теезь ломанень парсте эрямонтень: стадион, экшелямо тарка, тениссэ налксема тарка, чийнема тарка. Ды инжекудосонть арась вейкеяк ванстыця. Ало ансяк «Reception» вейке ломань марто ды весе.

 

Мезе паро ладсо абунгавтымем: алость, 

арсимашинантьикеле Ломантне «лисить» шарямо

интернетэнть келес ды теке марто чаравтыть.

Весе арсезь, весе ломанентень. ашти озамо тарка

велосипедэнь кондямо. 

«Wi-fi»-енть коряс кортамскак а мезть. Сон эрьва кува.

Маряви тесэ эрьва кискась лисни эзганзо интернетс.

Вильянди эрькенть мазый таркатне:

Сась панжомачись. Пурнавсь ушмошка дуро ломанть. Эрьва морамокурось невтизе прянзо вейке моросо. Травамонь кис. Те чистэнть морамсто мекс-бути эзить пек тално. Весе. XX-це Вильяндинь раськефестивалесь панжадо!
Лувось истямоль. Чикуншкасто саезь ошонть келс ёртнезь морамо таркатнесэ молсть концертт. Ансяк ушосо. Ве шкасто морыльть ветешка-котошка курот. Парсте теезь! Ломанесь мари пилезэнзэ вечкевикс гайть ды моли тозонь. Васенце читнестэ пек куваяк мон эзинь яка. Весе арсематне ульнесть минек концертнэнь ланга.
Сась те чись! Монь васенце покш концертэм «Торамасо». А ёвтавияк, кодамо ризкс ульнесь. Кавто часто икеле сынек сценантень ды карминек ладсеме-аравтнеме весе таркаваст. Шказо сась. Ломантне рамазь билетэст коряс совасть. Карминь содами, кой-кить састь Эстэнь лия пестэ минек кунсоломо.
Коцертэсь ушодовсь. Эрьва моронть икеле Йовлань Андю ёвтнесь эрзянь ды мокшонь моротнеде-койтнеде эрзянь кельсэ, а Эстэнь ялганок Индрик ютавтсь эстэнь кельс. Илядо пеле! Мон эзинь маняво. Индрик содасы эрзянь келенть!!!! Ломантне кунсолость, киштсть мартонок! Кодамо мельспаро! Весемезэ ютась парсте. Ансяк монь домка талномась пек апаро тев тейсь. Лиясто вайгелесь арыль аволь истя. Мезеяк! Кедь эзинь нолда. Мон манявксонь неизь ансяк цёратне. Кунсолыцятненень те эзь неяво. Паро. Морамонок прядовсь. Ушодовсь истямо цяпамо. Минь сюконинек прянок ды валгинек морамо таркастонть. Тесэ ломантне кармасть пижнеме: «Торама! Торама!!!». Тердить эйсэнек мекев. Таго кузинек ды ушодынек моронть. Ламот сакшность шнамо вал марто минек ёнов. Мон нусмакадокшнынь. Весе эзь лисе монь кода эрявсь. Васенце пачалксесь аволь пек видель.

Вильяндинь васенце концертэнь пелькскеть:

 

 


Мейле чинь перть кортынь аламо, эсь прясон чаравтынь, теинь анализ. Ялган цератне оймавтымезь, мерсть весень истя ушодомсто эрси. Видеяк, арась шка пря нолдтнемс, икеленек седее тов кавто концертт.
Минь яксинек ошканть, «совсинек» лия морыцянь ванкшномо. Лиясто сат кудов пелеветь. Валске мартос мольсть.

Мокшонь ды эрзянь Сантяйтне Paable морыцятнень кунсоломсто


Омбоце концертэнть икеле колмонек цёратне карминек сэредеме. А кие мерсь тенек Эстэнь кельме ведьсэ пулькамс. Весе ютась парсте. Ды монгак эсь прям мария седе парсте те морамонть перть, кадык сэредезьгак. Ламо мезе витевкшнэсь. Пек ламольть кунсолыцятнеде.Мейле рамсесть кедьстэнек плаштинеть (дискть). Эрьвантень эрявсь тешкске (автограф). Теяк монь ульнесь васенце. Вейке церась сась мик Бразилиясто. Мельс пек туинек. Ёвтызе «Тораманть» Бразилияв тердемадо мелензэ. Карматано учомо.

Оштё понгонынек Эстэнь масторонь «Русское радионтень». Сынь важодсть тосо ды минь эрий эфирсэ морынек моро.
Чокшне ланга морынек вирь куншкасо. Толбандя. Кунсолыцят. Ялгаксчинь ёжо. Весе те ульнесь тосо. Истямо мазый таркась, теке вишкапингень ванкшнозь ёвкстнэсэ. Ансяк те весе эрямосо. Яла кевкстнилинь эсь прясон: онстон те веси эли кода? Аволь те алкуксонь эрямосо.
Чись ютась. Вийтне маштсть. Рунгось сизесь… Ансяк оймесь лекстясь.
Фестивалень меельце читнестэ якинек морамо таркатнева ды истяжо рамсинек казнеть-мезть кудов. Якамсто ломантне яла сакшность «Toorama the best» вал марто. Содасамизь.

Erzya TV. Erzion вейсэндявксось теи куля Вильяндистэ.

 


Тынсь арседе. Тесэ морасть малав модамасторонть эрьва петнестэ: Ирландия, Бразилия, Монголия, Эстония, Финляндия, Норвегия, Грузия, Африка... Весе а сытькак превс.

Весемезэ неть ниле читнестэ кунсоломо

сакшность малав 20 000. Ансяк телевизорсо

шкань ютазь неинек: панжомсто ульнесь

сонсь Эстэнь масторонть прявтось,Тоомас Хендрик Ильвес.


Ламо паро мельть-превть ускинек тосто.Неть читне кадсть лаксевкс седейзэнек.  

Сынь зярдояк а стувтовить. Вастомазонок, Вильянди!

Просмотров: 990

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Ortem, Январь 29, 2013 в 1:10pm

пример травелога на эрзянском)

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования