Uralistica

Аккузатив, грамматико дыръёс но "Марым, лэся": яратоноез, матысез но валантэмез удмурт кылын

Туала улонын уно удысъёсын кык-куинь кылэз тодӥсь ӧнерчиосты уже басьтыны тыршо. Глобализаци вакытэ одӥг кылын вераськон – со сюбег малпаськонэн но куанерен лыдъяське.  Арлы быдэ англи, немец, француз, испан кыл курсъёслэн популярностьсы йылэ — адямиос тыршо Европаысь азинлыко кунъёс сярысь тросгес тодыны, лулчеберетэнызы матэгес тодматскыны.  Нош кыӵе ужпумъёс пичи калыкъёслэсь кылъёссэс дышетӥсьёс но эскерисьёс азязы пукто меда?

Кылсярысь, удмурт кылэн тунсыкъяськисьёс. Арлы быдэ Удмурт шаере кунгож сьӧрысь студентъёс но дышетӥсьёс удмурт кылэз дышетыны вуыло. Ма муген но кыӵе инструментъёсты соос уже куто?

Тае валан вылысь «Уралистика» соослы быдэн ньыль юан сётӥз.

1. Кытын удмурт кылэз дышетӥд?

Пётр Палган (поляк)


Дышетскыны кутски Будапештын 2008-тӥ арын. Ас мылкыдыя (дышетскон программаям удмурт кыл ӧз пыры) дышетскыны кутски. Кутсконысеныз ик дышетӥсе вал – Тэремшурысь (Менделеевск ёрос) удмурт студентка Нина Васильева, кудӥз соку мон кадь венгер кыллы дышетскиз вал. Валэктылӥз венгер кылын, соин ик туж капчиен валай удмурт грамматикаез. Соку пӧртэм текстъёс бордын ужамы, учебникмы ӧй вал. Туж юрттӥз удмурт-венгер кыллюкам (авторез Козмач Иштван). Со туж рос-прос но узыр кыллюкам: отын котьку сямен туж умой, улонысь яке литератураысь басьтэм примеръёс вань – быдэс веранъёс. Мон соосты та нуналозь йырам возисько но вераськыкум кутылӥсько. Со сяна удмурт тодмоосы ваизы мыным удмурт выжыкылъёсын книгаез, сое лыдӟыса но дышетски.
2009-тӥ арын гужем курсъёсы Ижкаре ветлӥ. Туж умой дышетӥзы, ӝогак, мылысь-кыдысь. Туж юрттӥз Галина Николаевна Лесникова, кудӥз кутсконаз венгер кыл пыр валэктӥз. Соин ӵош «Удмурт дунне» газетысь статьяос бордын ужамы . Нырысетӥ урокысен гороскопез лыдӟим. Собере кузьгес текстъёсын ужамы. Ваньзы милемын удмурт сямен гинэ вераськизы, чиданзы но умой мылкыдзы туж юрттӥз.

Симо Кантеле (финн): 

Нырысь Финляндиын кык семестр (2008-2009-тӥ аръёсы), собере ни Удмуртиын гужем курсъёсын 2009-тӥ аре но Удмуртиын стажировка дыръям.

Эрика Асталош (мадьяр):

Будапештын, ЭЛТЭ нимо университетын, Галина Николаевна Лесниковалэн отын удмурт кылъя дышетӥсьын ужамез дыръя. Ижкаре удмурт кылъя курсъёсы но 2 пол вуылӥ.

Томи Койвунэн (финн):
 

Мон Туркуын но Ижкарын удмурт кылэз дышетӥ. Али мон нош Удмурт шаере вуи — стажировкае.

Катя Григорьева (болгар)

Сегедысь университетын кутски удмурт кылэз дышетыны, Иштван Козмач дорын 2009-тӥ арын. Собере Екатерина Сунцова луиз удмурт кылъя лектормы. Будапештын Галина Лесниковалэн удмурт кылъя урокъёсаз ветлӥ. 2013-тӥ арын УдГУ-лэн Финнугор Кафедраеныз радъям удмурт кылъя но культурая гужем курсъёсы пыриськи, отын Дмитрий Ефремов дышетӥз. Туж трос выль кыл тодӥ удмурт гуртъёсы ветлыса, удмуртъёсын пумыськылыса.

Симонас Норейкис (литва пи)

Мон дышетскисько Хельсинки университетын. Удмурт кылэз ачим дышетыны кутски. Али мынам арнялы одӥг пол удмурт кылъя уроке ортчылэ.

Жофи Сираки (мадьяр)

Нырысетӥ удмурт уроке Удмуртиын, удмурт гужем курсъёсын, ортчиз. Монэ дышетӥз Дмитрий Анатольевич Ефремов. Со бӧрсьы Будапештысь Этвёш Лоранд нимо университетын Жужа Шаланкиен удмурт кылэз дышетӥ.

Мирела Мазур (поляк)

Удмурт кылэз дышетӥ поляк эшеным – Палганэн, со кутскиз  мыным граматикаез валэктыны. Собере Ангелина Решетникова дышетӥсе луиз. Кӧня ке толэзь ӵоже со доры курсъёсы ветлӥ.  Ачим но учебникъёсъя уно дышетски но адямиосын вераськи.

Кристиан Пишлёгер (австри пи): 
Мон Венаысь университетын удмурт кылэз дышетӥ. 1998-тӥ арын монэ удмурт кылъя гужем школае öтизы. Соку мон нырысетӥзэ Удмуртие вуи.

Золтан Немет (мадьяр): 
Мон нырысьсэ удмурт кылэз 2012-тӥ арын  гужем курсъёсын дышетӥ.  Собере удмуртлы дышетскемме Венгриын, Сегед университетын азьланьтӥ. Бӧрысь эшшо куинь пол Удмурт шаере бертылӥ на: 2013-тӥ арысь удмурт кылъя гужем курсъёсы но 2014-тӥ арын ӝыны ар дышетӥ удмурт кылэз Удмурт кун университетын но куинетӥзэ но  гужем курсъёсы вуылӥ.



Дженифер Эскамила (каталон): 
Мон удмурт кылэз дышетӥ Ижкар общагаын, эшеным.
Тина Фрикке (немец): 

Германиысен, Гётингенысен, удмурт кылын тунсыкъяськыны кутски. Отысь  удмурт аспирант дорын удмурт кылэз дышетӥ. Финноугристика но славистика факультетын дышетскисько бере, мыным  пичи финн-угор калыклэсь кылзэ быръёно вал. Удмурт кыл мыным соку ик кельшиз. Тунсыко, отчы пыремын трос мадьяр но турок кылъёс (таоссэ мон азьвылгес дышетӥ ни вал). Соосыз ӵошатэме потӥз. 2014-2015-тӥ дышетскон арез мон Ижкарын ортчытӥсько, удмурт кылъя тодонъёсме будэтӥсько.


2. Кыӵе учебникъёс кельшо?



Петыр Палган (поляк): Курсъёсысен "Марым, лэся..." учебникен ужамы. Туж логичной ваньмыз, туала сямен поттэмын. Мон котькинлы сое дэмласько. Тимерхановалэн, Решетниковалэн учебникъёссы но кельшо, отын трос бадӟымгес текстъёс, соосты лыдӟыса адями ассэ эскерыны быгатэ. Мон яратӥсько лыдӟиськыса дышетскыны, соин мыным умой. Жаляса верано, туннэ уг тырмы туала, чебер поттэм, фотоосын тырмытэм учебник. Мон таӵе учебникъёсты уггес яратӥськы, нош тросэзлы адямиослы капчигес луысал соосын ужаны. Удмурт учебник кулэ луыны синмез кыскись, яркыт, англи кылъя учебникъёс кадь.


Симо Кантеле (финн): Кельмаков-Хянникяйнен, таиз финн кылэз тодӥсь филологъёслы туж умой книга, научнойгес. "Марым, лэся..." книга но кельше, сое котьку шумпотыса лыдӟисько, тунсыко сямен гожтэмын, серем но.


Эрика Асталош (мадьяр): Выль дышетскон книгаосты мон ӧжытгес тодӥсько, удмурт кылъя урокъёсы кемалась уг ветлӥськы ни бере. Мон Иштван Козмачлэн венгеръёслы гожтэм книгаезлэсь но Кельмаковлэн но Сара Хянникайнэнлэн книгаосынызы дышетски. "Марым, лэся..." книга кельшиз.


Томи Койвунэн (финн): Мыным "Лабыр-лабыр-лабыртом" книга туж кельшиз.


Катя Григорьева (болгар): Трос кылъёс дышетэме вань (венгер, финн, удмурт, англи, немец, ӟуч), соин верасал - идеальной учебник ӧвӧл. Мыным кельшо грамматикаез ӟеч валэктӥсь но тунсыко текстъёсын учебникъёс. Удмурт кылъя учебникъёс трос, но пӧртэмесь - огез грамматикаез умойгес возьматэ, мукетыз лексикаез. Мон малпасько, тужгес но валтӥсез кыл дышетонын — умой дышетӥсь. Сыӵе дышетӥсь быгатоз пӧртэм ужъёс шедьтыны но дэмланы, соку дышетскон но каньыл мыноз.


Симонас Норейкис (литва пи): Мынам учебникъёсы "Марым, лэся..." но Udmurttin kielioppia ja harjoituksia.


Жофи Сираки (мадьяр): Самой тунсыкоез мон понна "Марым, лэся..." учебник вал.


Мирела Мазур (поляк): "Дуно Эше", "Марым, лэся...".


Кристиан Пишлёгер (австри пи): Мыным туж кельше "Марым, лэся..." учебник.


Золтан Немет (мадьяр): Мон кык книгая дышетӥ удмурт кылэз: "Лабыр-лыбыр-лабыртомы"  но "Марым, лэся...". Кыкез ик мыным туж кельше.


Дженифер Эскамила (каталон): Мыным "Марым, лэся..." туж кельше.


Тина Фрикке (немец): "Марым, лэся..." но удмурт грамматикая Эберхард Винклерлэн учебникез.



3. Мар тужгес но секытэз но валантэмез удмурт кылын?


Петыр Палган (поляк): Удмурт кылын туж трос грамматической дыръёс – мон соосты весяк сурасько, куд-ог кабъёсты (формаоосты) воксё уг кутылӥськы. Поляк кылын куинь дыр гинэ кылиз, соин секыт валаны узыр удмурт системаез (вуизы, вуиллям, вуылӥзы – кыӵе пӧртэмлык???) Туж трос дышетсконо на.


Симо Кантеле (финн): Ку -эз/-ез суффиксэз уже кутоно, ку -зэ суффиксэз, озьыен, адӟон падеж секыт потэ. Дышетскыны-дышетыны, сиыны-сиськыны кадь глаголъёс (транзитивной-интранзитивной глаголъёс). Та кык юанъёсын шуг-секытъёс ӵем дыръя кылдыло.


Эрика Асталош (мадьяр): Шуг валаны, ку прямой дополнениын -эз̸-ез суффикс кулэ, нош ку со кулэ ӧвӧл. Нош вообще мон но тросэз кунгож сьӧрысь тодмоосы малпаськом, удмурт кыл туж логичной  шуыса, отын ӧжыт исключениос, правилоос но секытэсь ӧвӧл. 


Томи Койвунэн (финн): Мон малпамъя, удмурт кылын самой секытэз - каронкылъёс (соос секытэсь мукет кылъёсын но). Зэмзэ ке, нимысьтыз секыт интыоссэ шедьтыны секыт. Мон уг малпаськы, удмурт кыллэн грамматикаез туж секыт шуыса.


Катя Григорьева  (болгар): Венгерез дышетэме бере удмурт секыт уг поты. Ну, шуом ӧ, ӵ куараосты шугъяськисько вераны. Эшшо кӧня ке шуг потэ удмурт вераськон кыл - мон литературной кылэз дышетӥ, нош гуртъёсысь вераськон кылэз выльысен дышетоно но диалектъёсын тодматсконо луиз.


Симонас Норейкис (литва пи): Секытгес аккузатив.


Жофи Сираки (мадьяр): Малпасько, удмурт кылын туж секыт но валантэм явлениос öвöл. Кылэз вӧлятон понна дугдылытэк вераськыны кулэ, ӝог ритм медаз ышы шуыса. 


Мирела Мазур (поляк): Грамматика секыт. Удмурт - нырысетӥез финн-угор кыл, кудзэ дышетскыны кутски. Та кылъёслэн структуразылы дышемын ӧй вал.


Кристиан Пишлёгер (австри пи): Туж секыт удмурт культура контекстэз валаны, малы ке шуоно мон Венаысь, бадӟым городысь.

Золтан Немет (мадьяр): Нырысьсэ мон малпай, адӟон падеж туж секыт шуыса, малы ке шуоно секыт вераны, ку сое уже кутоно но ку кулэ ӧвӧл. Эшшо секыт вал "нет" вераны удмурт кылын - туж трос амалъёс сое вераны: ӧвӧл, ум, уд, уг, уз, ӧй, ӧд, ӧм, ӧз, эн, медам, медад, медаз. Нош али соос сыӵе проблема ӧвӧл ни. Али удмурт кыллэн самой секыт люкетэз: ортчем дыр. Тодмо ортчем дыр но тодмотэм ортчем дыр капчи, но мукет вариантъёс туж секытэсь.


Дженифер Эскамила (каталон): Суффикъёс секыт вал.


Тина Фрикке (немец): Удмурт кыл мон понна со мукет, англи но немец кылъёсын ӵошатыса. Туннэ нуналлы мыным секытгес пото на быдӟым предложениос. Кылсярысь, книга лыдӟытэк, тон визьмо уд луы. Немец кылын суффикс -тэк ӧвӧл, номырин ӵошатыны. Мукетыз секытлык — удмуртъёс ас куспазы укыр ӝог верасько (валаса уг вуиськы). Но та проблема котькуд выль кылын пумиське.



4. Марлы Удмурт шаерын тыныд кулэ удмурт кыл? Татын ваньзы ӟучез валало ук.

Петыр Палган (поляк): Удмурт шаерын мон куно – соин ик мыным кузёме гажано. Солэн аслаз кылыз вань ук – одно ик дышетсконо мыным но. Удмурт кыл усьтэ удмурт адямиез, кудӥз ӟуч сямен вазиськыкум ворсаськемын луысал, возьдаськысал. Удмурт кылэз тодӥсьтэм ӟучъёс ӝожтӥсько, удмуртъёс эшлыкоесь ӧвӧл шуыса, муртэсь кылё, адямиез ас бордаз матэ уг лэзё... Удмурт кылэз тодэменым мынам ноку ӧй вал сыӵе проблема.


Симо Кантеле (финн): Ачим мон удмурт кылэз ӟучезлэсь умойгес тодӥсько, соин удмуртэнгес вераськеме потэ. Эшшо кытын вераськом на удмурт кылын Удмуртиын ке ӧм? Ӟучен луэ мукет улосвылъёсын но вераськыны, нош Удмуртия – со удмурт кыллэн шаерез. Мынам малпамея, вань кылъёс дунне вылын кулэ луисесь, соослэн ас дунзы вань. Мукет кылъёсын вераськыса, дуннеез но мукет сямен адӟиськод но валаськод. Кинлы ке но анай кылыныз вазиськод ке, со аслэсьтыз но, мукет кылъёсты но юнгес гажаны кутске кадь.

Эрика Асталош (мадьяр): Мон удмурт кылэз ӟучлэсь умойгес тодӥсько, Россие но удмурт кыл сэрен сюри. Мон удмурт кылын тунсыкъяськыны кутски венгер кыллэн ӵыжы-выжы кыл луэменыз: тунсыко потӥз вал, кыӵе отын ог-огзылы кельшись кылъёс но грамматической конструкциос вань. Эшшо гуртысь удмурт культура, фольклор но тунсыко потӥзы. Удмурт кылын, ӟучен ӵошатыса, капчигес мыным вераськыны, соин ик, куке вань луонлык, мон ялан удмурт кылын вераськисько.

Томи Койвунэн (финн): Пӧртэм кылъёс дуноесь. Кылъёслэн лыдзы дунне вылын усе, но со умой югдур ӧвӧл. Кыл — со лулчеберет, узырлык. Кылтэк культура но, калык но ӧвӧл.

Катя Григорьева (болгар): Кык муг вераны быгатысал. Одӥг ласянь, удмуртъёсын анай кылынызы вераськеме потэ. Кылсярысь, «кызьы пыжоно перепеч» юанлы ӟучен но, удмуртэн но луэ валэктыны. Озьы ке но, мынам малпамея, удмуртъёслэсь культуразэс, зэмос малпаськонзэс мургес тодон понна одно ик удмурт кыл кулэ. Ӟучен тае валэктыны уг лу. Мукетыз, мынам диссертацие удмурт кыллэн грамматикаезлы сӥземын, ужам уно предложениосыз, текстъёсыз но пӧртэм-пӧртэм диалектъёсыз эскероно. Удмуртэз тодытэк та уже уз пӧрмы. Эшшо ке гуртъёсын материал бичакум, кызьы басьтом удмуртъёслэсь интервью удмурт кылэз тодытэк?

Симонас Норейкис (литва пи): Удмурт кылэз дышетыны эшъёсы бурдъятӥзы. Табере мынам соосын удмурт кылын вераськеме потэ. Эшшо ке мон лингвист, соин кылъёсыз дышетон мон понна кыкполэс пайдаё.

Жофи Сираки (мадьяр): Мон удмурт темая диссертаци гожтыны турттӥсько. Дуннеысь пичи кылъёс улонэз чебергес, пӧртэмгес каро.

Мирела Мазур (поляк): Шаерысь калыклэсь кылзэ тодытэк – со буш вераськон выллем. Сотэк уд тоды калыкез. Гурт калык, удмурт кылын вераськеме тодыса, син куспын усьтӥськиз но валамонгес луиз.

Кристиан Пишлёгер (австри пи): Со туж секыт юан. Малпаськоно. Удмурт адямиос туж шумпото, Австриысь адями пичи ке но удмурт кылын вераськыны быгатэ ке. Оло, соин но?

Золтан Немет (мадьяр): Куинь муген:
1. Солэн грамматикаэз мыным капчигес, тупа мадьяр кыллы.
2. Удмурт кылэз ӟучлэсь умойгес тодӥсько.
3. Мыным удмурт кыл, анай кылы бере, самой чебер потэ.

Дженифер Эскамила (каталон): Удмурт шаерын — удмурт кыл, ӟуч - со мурт. Мон Удмурт шаере вуылӥ, соин удмуртъёслэсь анай кылзэс дышетоно кариськи.

Тина Фрикке (немец): вань трос мугъёс, малы дышетоно кылъёсты. Нырысетӥез, адямиосыз валан понна. Куке мон удмуртъёсын анай кылынызы вазисько, соос мукет сямен монэн верасько, шумпото но пӧртэм паласен усьтӥсько. Нош куке адямиос шумпото, мон ачим но шумпотӥсько.
Гожъям Бере. Наталья Кондратьевалэн лыдъямезъя, 90-тӥ аръёсысен ог 500 кунгож сьӧрысь адями удмурт кылэз дышетӥллям.
Юалляськиз Мария Золотарёва

Просмотров: 719

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Ortem, Апрель 10, 2015 в 9:06pm

vanjzy og tuso verasjko. Umoitem - ozj karyny.

jangyshjosyn tunsykoges-a mar-a luysal?

Комментарий от: Niimshur, Апрель 10, 2015 в 8:03pm

Umoi iualljasjkiz. Redakturaen seren, ben,...  vanjzy og tuso verasjko. Umoitem - ozj karyny.

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования