Uralistica

Удмурт кыл кутске... садикысен? Кузебай Герд нимо нылпи садын удмурт кыллы выль программая дышето

Туннэ нуналлы тросэзлэн удмурт активистъёслэн нылпизы вань. Соин ик пиналэн герӟаськем удыслы трос саклык висъяське - пӧртэм секыт ужпумъёс шараясько. Кылсярысь,  анай-атайёсты удмурт книгаослэн, дискъёслэн но шудонъёслэн лыдзы шугъяськытэ. Таин валче огазеяськыса малпамын удмурт мультфильм но кылдытыны. Озьы ик мур малпаськонэ усёно луо анай-атайёс, куке дыр вуэ нылпиез садике сётыны. Тросэз верамъя Ижысь садикъёсын удмурт кылэз но культураез яке туж ичи сёто, яке чик но уг.

Педагогика тодос кандидатлэн Роза Кузнецовалэн верамезъя Ижын 19 нылпи сад, кытын пиналъёс удмурт кылэз дышето. 1998-тӥ арысен 2002-тӥ арозь мылкыд карисьёслэн лыдзы йылэ вал. «Та «Ошмес син» программалэн соку гинэ потэменыз герӟаськемын вал, - шуэ тодосчи. - Собере мылкыдъёс лапказы».

Туннэ нуналлы элькунамы куать эксперименто площадкаос усьтэмын: Балезиноын, Ягулын, Ува-Тукляын, Эгралан но Вавожын. Ваньмыз соос 2012-тӥ арысен “Финляндия-Россия” огазеяськонэн радъям «Финн-угор кылъёс но культураос азьшкола дышетсконын» нимо проект улсын ужало. Солы луыса быръем садикъёсын пиналъёс калыклэн узырлыкеныз тодматско, кылэз дышето.

Одӥгез площадкалэн уженыз «Уралистика» пыр-почгес тодматсконо кариськиз.

Ольга Корепанова

Туспуктӥз Татали Дмитриева

Кузебай Герд нимо гимнази бордын нылпи сад кема ужа ини. Мылкыд карисьёслэн лыдзы будэмен кыкетӥ юрт усьтэмын вал. Озьыен, нылпиос ветло гимнази юртысь садэ но Коммунар ульчаын сылӥсяз.

Ми пумиським садиклэн кивалтӥсеныз Ольга Корепановаен но тодӥм, кыӵе шуг-секытъёсын пумиськоно луо удмурт садикын ужасьёс но пайдаё-а пиналъёс пона удмурт кыллы дышетон выль программа.

- Садикады трос-а нылпи ветлэ?

Ваньзэ лыдӟоно ке, туннэ нуналлы милям 223 нылпи. Таяз – 150, Коммунаръёс ульчаын – 73. Мылкыд карисьёс трос луэмен кыкетӥ юрт но усьтэмын вал. Вераны кулэ, али мылкыд карисьёс эшшо но уногес. Мукет та выллем садикъёс эшшо кулэ вылэм. Садикмы Кузебай Герд нимо гимнази бӧрсьы кылдытэмын. Угось удмурт кыл вис карытэк котькытын сётӥськыны кулэ адямилы. Кылсярысь, пичи нылпи, садике мыныса но собере школаын но – капчиен могӟетъёстэк анай кылыныз вераськыны кулэ. Озьы ке уг лу, нылпилы секыт йӧтэ, ӵемысь психологи шуг-секытъёсыз кылдо.

- Кызьы тӥ дорын сётӥське удмурт кыл?

Ми ужаськом “Кыл пузкар” программая. Та программа нылпи садъёслы чакламын, кудъёсаз пиналъёс ичи лыдъем калыкъёслэсь кылзэс ӟуч сямен вераса «методом погружения в естественную среду» дышето. Соин ик асьме воспитательёсмы пиналъёсын удмуртэн тросгес вераськыны туртто, тросэз арбериос бордын садикамы удмурт кылын табличкаос юнматэмын. Вӧзаз ик арнялы кык пол удмурт кыл урокъёс вань. Вераны кулэ, садикамы куинь группа: ньыль аресъемъёс, витьысен куатозь, но куатьысен сизьымозь. Но котькудӥз группа удмурт кылэз тодэмзы ласянь кыклы люкиське на: умой тодӥсьёсыз но лябъёсызгес. Удмуртэн дышетӥсьмы нимысьтыз висъям кабинетын пӧртэм шудонъёс радъя, урокъёс нуэ. Озьы ик нылпиосты калыклэн фольклореныз, обрядъёсын, вашкала коркапуш арбериосын тодматыны тыршиськом.

Со сяна котькуд арня садикъёсамы удмурт нуналъёс ортчо. Таяз садикын – вторникъёсы, Коммунаров ульчаын – четвергъёсы. Та нуналъёсы ми тыршиськом ваньзэ удмурт шӧмо карыны. Кылсярысь, пинал лыктыку ик удмурт крезьгур чузъяське ни, воспитательёсмы но удмуртэн верасько. Ӝӧк вылэ пуктӥськом удмурт сиён: перепеч, шуом, кокрок, шекера но мукетсэ. Турттӥськом удмурт дэрем дӥсяны, пиналъёсмес куриськом удмуртшӧмъем дӥсь шедьтыны. Вераны кулэ, тросэзлы анайёссы вуризы ни.

Озьы ик ми пӧртэм пумиськонъёс радъялляны тыршиськом. Пичиослэн трос тодэмзы потэ бере, котьку юанъёс сётъяло. Куддыр паймоно, кызьы валэктыны ик. Соин куддыръя утчаськыны кутскиськом но юанэн герӟаськем адямиез пумиськонэ чортӥськом. Таиз тужгес но тунсыкоез, дыр. Дорамы куное пӧртэм тодмо адямиос вуыло. Кылсярысь, Кучыран Юри. Вӧсяськон дӥсеныз лыктыса, со пиналъёслы вӧсь возьматӥз. Собере Пётр Ёлкин суредаськись  огпол гинэ ӧз вуылы ни – аслэсьтыз суредзэ но садмылы кузьмаз. Со юрттэмен ми асьмелэсь адӟытонмес но радъямы. Олег Ажгихин ми доры вуылӥз. Нылпиос солы пӧртэм юанъёс сётъязы – кыӵе чай яратэмзэ но юазы кадь. Со вераз, пиналъёсын садике потамез ӧй на вал шуыса. Бератаз милемлы удмурт шӧмъём коллекци лэсьтӥз. Алигес ай солэн мода адӟытонэз ортчиз – пиналъёсмес но отчы ӧтӥз вал. Анна Плотниковаен пумиськон тунсыко ортчиз: солы но пӧртэм выжыятӥсь юанъёс сётъязы. Юась луиз, кыӵе, пе, нырысетӥ арганды вал. Соиз нош вазе, пичи пукон, пе. Соку ик пуконэз кияз кутыса, возьматӥз, кызьы шудылэ вал. Паймизы ук нылпиос! Ми куное ӧтчам сяна, асьмеос но потаськом. Скульптор доры мастерскояз куное вуылэммы но вань. Аслэсьтыз ужъёссэ возьматон сяна, со мастер-класс нерге ортчытӥз: котькуд пинал ачиз сюйлэсь шудон дасяз. «Эктон корка» ансамбль но милемыз куное ӧтчаз. Репетировать кароназы ик ветлӥм – пиналъёс эктонъёслы дышетскизы. Вераны кулэ, озьы ик ми доры «Шулдыр ӝытъёс» вуылӥзы ни. Удмурт драмтеатрысь актёръёс но мукетъёсыз. Ваньзэ табере тодэ но уд вайы – трос кинэн пумиським ни. Мон малпасько, таӵе пумиськонъёс пиналлэсь тодон-валанзэ будэтон сяна, узырмыто сое культура ласянь. Нылпи адӟе, кӧня усто адямиос котыраз, макем пӧртэм пумо профессиос вань, но самой кулэез – макем чебер но тунсыко удмурт культура. Озьы ик пинал дӥсьтӥсьгес луэ, шонер юанъёс сётъяны но адямиен вераськыны дышетске но дыше.

- Та сяна ортчо на-а удмурт кылэз мургес тодыны юрттӥсь ужрадъёс?

Быдэс элькунамы тодмо луизы ини милям «Ӵыжы-выжы», «Пичи Чеберайёс но Батыръёс» ӵошатсконъёсмы. Озьы ик арлы быдэ «Пичи Гербермес» радъяськом. Макем кельше таиз ужрад пиналъёслы! Удмурт дэремъёс дӥсяса ураме ӝук сиыны потӥськом. Пӧртэм шудонъёс, ӵошатсконъёс ортчытӥськом. Пиналъёс, кылсярысь, миндэрен нюръясько, экто-кырӟало, выжыкыл учко, мастер-классъёсы пырисько. Огполаз дорамы куное вуэм финн-угоръёс таӵе ужрадъёсты радъяммылы паймизы вал.

- Кыӵе югдур удмурт кыл книгаосын но методичкаосын?

Садике ветлӥсь пиналъёсты дышетон учебникъёсын югдур туж секыт. Туннэ нуналлы со одӥг – А. Кузнецовалэн 1998 арын потэм «Ошмес син» программаез.  Со туж умой, пайдаё программа. Но кемалась поттэмын ни бере, со но вужме, ФГОС-лэсь бере кыле. Тодӥсько, али вылез учебник бордын ужало шуыса - А. М. Комаровалэн книгаез ӝоген потоз. Гурысь пӧсь нянез музэн витиськом ни ми сое.

- Тырмо-а выжыкылъёсын но кырӟанъёсын дискъёс, удмурт шудонъёс?

Удмурт кырӟанъёсын но выжыкылъёсын дискъёс ӧжыт. Вань милям нылпиослы поттэм «Камали» студилэн одӥг дискез. Нуналысь нуналэ тае бергатӥськом но, акыльтыны кутскиз ни. Выжыкылъёсын дискмы но одӥг-кык сяна уз лу – таосыз но пичиослы секыт йӧто. Ярам коть, творческой воспитательёсмы трос - асьсэос удмурт шаеренымы но кылэн герӟаськем шудонъёс малпалляло. Тани алигес Марина Субботина логопедмы чылкытвераськонъёсын бичетсэ поттӥз - асьме техникамы вылэ пыкъяськыса лэсьтэмын. Будэтӥсьмы Анна Калашникова «Чиньыен шудон» дасяз. Сое бичетын поттон пумысен «Удмуртия» книгапотонниен кенешим, но уж уг вырӟы мар ке. Со тырысен ар ортчиз ни.

- Кыӵе шуг-секытъёс ужады ӵемысь пумисько?

Коньдонэн герӟаськем шуг-секытъёсын ӵемысь пумиськоно луэ. Кылсярысь, ӵошатсконъёсын кузьымен шугъяськиськом. Министерство яке аресъя тупасьтэм синпелет, яке чик но уг висъя. А ведь конкурсэ пыриськем пиналлэсь мылкыдзэ одно ик бурдъяны, лӧпкытыны кулэ, азьланяз медаз пуксьы шуыса. Яке туж потэ вал садикмес удмурт символикаен арбериосын узырмытэм, но луонлык ӧвӧл: киын лэсьтэм ибырвесьёс, пулэсь мунё шудон коркаос, кылсярысь, туж дуно сыло.

Озьы ик туж трос бумагаен вырон, нош коньдонэз ӧжыт. Ужез дырыз дыръя лэсьтон понна, воспитательёсмы доразы пуконо луо. Сотэк – уд вутты.

Верасал на анай-атайёсын герӟаськем шуг-секытъёс сярысь. Малы ке анай-атайёс, нылпизэс садике сётыса малпало, табере ваньзэ воспитательёс радъялозы шуыса. Асьсэлэн палэнскемзы потэ. Таӵеослы паймисько. Озьы ведь уг лу – нылпиез будэтонэ огкадь пыриськыны кулэ анай-атайёс но, дышетон юртъёс но. Огезтэк мукетыз «уг ужа». Удмурт кыл ласянь но верано ке, кыӵе пайда луоз, ми гинэ кылэз сётим ке, нош дораз пинал ӧз ке вераськы анай кылын. Кышкано ӧвӧл со ӟуч калыкен вераськыны уз быгаты шуыса. Трос пӧртэм исследованиос ортчытэмын ини та пумысен – адямилы, кин пичи дырысеныз трос кылъёсты дышетэ, азьланяз мукет кылъёсты дышетон капчиен сётӥське.

- Секыт-а садикады сюрыны?

Секыт ӧй шуысал, но инты ваньмызлы уг тырмы, кык садик ке но. Али но тани мар ке быдӟа заявлениосын папкамы вань. Пусйыны кулэ, ми нылпиосты национальностьсыя ум висъяське. Ваньзы огкадесь – озьы кулэ луыны, мон малпамъя. Кылсярысь, пиналъёсмы пӧлын удмуртэз но, ӟучез но, бигерез но вань. Ваньзы соос валаса-а, валатэк-а, дышето удмуртэз.

- Сюро-а удмурт кылэз дышетыны пумитъяськисьёс?

Мынам огпол но нылпизэс удмурт кыллы дышетыны пумитъяськись анай-атаен пумиськеме ӧвӧл. Та югдур мыным кӧня ке тодмотэм йӧтэ. Но валано тазэ но: ми доры вазиськыкузы валало,  садик удмурт луоз шуыса. Бырйыса ини лыкто.

Вераськиз Надежда Рысьева

Просмотров: 631

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Ortem, Ноябрь 12, 2014 в 3:32pm

Эшшо тунсыко: удмурт луисьтэм нылпиослэн анай-атайзылэн удмурт кылэз дышетон ласянь кыче мотивациез?

Комментарий от: Ortem, Ноябрь 12, 2014 в 3:30pm

Валаме потэ, кызьы удмурт но зуч яке бигер нылпиосыз чошен удмурт кыллы дышето?

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования