Uralistica

Туннэ нырысетӥ удмурт кыл урок ортчытӥ. 2 ар пала вис кареме бере шумпотыса вити ини курсъёслэсь кутскемзэс. 

Шундыё нунал, малы лыктонтэм кадь? )

Озьыен, нырысь ик 3 мурт вуиз. Соос ик, зэмзэ вераса, оглом возьмато ни, кыӵегес адямиос курсъёсы ветлыло. 

Огез - удмурт выжыё, быдэ вуэм мурт. Ижкарын будыса, удмурт кылэз песянайызлэсь гинэ кылылэмын. Атае, пе, Ижкарысен ноку но анай кылзэ ӧз потта. Лыктэм муртэ но шугъяське, юа кадь мынэсьтым, шонер-а, пе, меда лэсьтӥ, татчы, нокинлы но кулэтэм удмурт кылэз дышетыны лыктыса? Семьяысьтыз, нылпиыезлы но 12 арес ини, нокин но удмурт кылэз дышетон мылкыдзэ уг лӧпкытъя, шӧдиське. Бордаз тэбинё гинэ: "Пумен визьтэммиськод, лэся. Марлы со тыныд кулэ?".  Корепанов нимъем юлтошез но, "Ижсталь" понна ӵош висисез (кытысь-о удмуртогес памилия но шедьтод?) ушъям интые, удмурт кыллэсь куштӥськыны ӵектэм. Тодмо учыр. Таӵе муртъёслэн чурыт, чигтонтэм медэмзы кулэ луыны. Нырысетӥ группаям но, 2008 арын, сыӵе нылаше вал - Люба. Нылпи ваёнзэ тодыса, ми соин нуны веттанъёсты дышетӥм, берло нош со ныпъет сярысь юалляськиз, кызьы лэсьтӥське но мар. Ӝожтӥськылӥз, малы пе, асьме ныпъетмы кунгож сьӧрысь слингъёс интые нуллонтэм? Удмуртъёслэн нош дунне валанзыя, ныпъет трослы умойгес но, шонергес но. Владыкина вералляз вал, ныпъетын, пе, пинал анайлэн тыбыраз. Анай  озьы нылпиез син усемлэсь утьыны быгатоз. Нош слингъёсын - нылпи анайлэн азяз. Пумитэ лыктӥсь муртлэн синмыз нырысь ик нылпи вылэ усе. Визьмоесь ик пересьёсмы вылӥллям.

Кыкетӥез дышетскисе - "дунтэк дышетымон кылъёсты бичась", кылъёсты дышетыны яратӥсь.  Таӵеосыз аспӧртэмлыко адямиос. Мар ке борды канжаськоноез-кугӟаноез удмуртын луиз ке, дышетозы. Ӧз ке - аналскозы гинэ. Таӵеосты кыллэн "тунсыко чыры-пырыосыныз" гочатыса гинэ улод ни. Ӵемысь нош соос понна кыл гинэ ӧвӧл, культура но тунсыко йӧтэ. Таӵеосыз пӧлысь ик али Кишиневын улӥсь Ярослав но. Али ке но удмуртэн гожъя мыным. Шумпотымон учыр. 

Ма нырысетӥ группаысьтым, 2008-2009 арын дышетскемъёсы кыӵе ке но аспӧртэмлыкоесь вал. Али ке но тросэныз кусып вазисько. Асьсэос мыным гожъяло.

Нош куинетӥез лыктэм пияш - кылчи-далай ини бесерманъёс доры экспедициосы пота. Мон, пе, вераськыны вуэмын ни, кылъёсты тодӥсько, нош грамматикае лябытгес. Куд-ог учыръёсы, кылэз яке куара сярысь вераськон потыку, куаныса-шлачкетыса ик ватсасько: "Нош бесерманъёслэн!.."  яке "Милям гуртамы нош!.." Таӵеосыз визь люкъёс. Лингивистика ласянь олокыӵе но юанэн сётыны быгато.

Кӧня ке дыр ортчыса мукетъёсыз но вуизы - Можгалась Ленӥ (со дорам ветлӥз ни вал), уйгуръёс доры экспедициосы потась но китай кылэз дышетӥсь Павол (со но дорам ветлӥз ни, туж тунсыко адями, Мускоысь удмурт ӝытъёсы ветлыны яратэ ). Выльёс пӧлысь нош - Лера (атае, пе, англи кылысь синкрон берыктӥсь, сое паймытыны шуыса,пе, удмуртэз дышетыны лыктӥ), Александр (таиз но кылъёсты бичась мар ке) но эшшо но 2-3 мурт, оскисько, ватсаськоз вуонояз.

Вераським 2 группа лэсьтон сярысь - азьланьтӥсьёс но али кутскисьёс. Берло адӟом, кызьы пӧрмоз.

Валлё аръёсы лыктэмъёс пӧлысь ӝыныез удмурт выжыем адямиос луыло вал, али нош - 7 пӧлысь кыкез гинэ удмурт выжыё адямиос. 

Жаль. а ведь мылкыд карисьёс Мускоысь кылэз тодӥсьтэм удмуртъёс пӧлын но вал на..

Просмотров: 393

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Oli, Март 24, 2012 в 9:14pm

ярам )

Комментарий от: Niimshur, Март 24, 2012 в 8:59pm

промолчу, пожалуй... Мне бы о дидактике с Вами переговрить... как-нибудь.. Это - не частный аспект курсов. Этому не научиться нигде.

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования