Uralistica

Мускоысь удмуртъёслэн дэменлыксы но инфраструктуразы

Мускоын но Муско улосын трос удмуртъёс уло. Нуналмысь нуналэ ми татын ужаськом, дырмес ортчытӥськом.

Мускоысь удмуртъёс пӧлын удмуртлыкмес утён но азинтон понна милемлы кулэ удмурт коммьюнити но удмурт институтъёс.

Удмурт коммьюнити\дэменлыксы

Оглом вераса, кыӵе ке но удмурт коммьюнити порма Мускоын вань ик. Тросэз Удмурт землячество котыр люкаськемын. Берпуметӥез Мускоысь удмуртъёсты бадӟым огазеясь учыр вал "Узы-Боры" фильмез адӟытон. Удмурт активистъёсын но мукет мылкыдчиосын ӵошатыса, мукетъёсыз (землячествое но мукет удмурт шӧмо огазеяськонъёсы пыриськымтэос) огазеяськон котыр "уг бергало", соос ужрадъёс пыр тодматско но люкасько.

Удмурт институтъёс

Удмурт институт со удмуртлыкмес возись, сое одӥг адямилэсь мукетызлы выжтӥсь но выль адямиос пӧлын вӧлмытӥсь мар ке.

Институъёс пӧлысь мон куиньзэ висъясал:

- удмурт кылэз вӧлмытӥсь институтъёс

Удмурт кылэз тодӥсьтэм но ляб тодӥсь адямиослы Мускоын нимаз кыл курс радъямын. Сое Оли Урасинова нуэ. Оффлайн-дышетскон сяна, со вань мылкыдчиослы, вань удмурт кылэн тунсыкъяськисьёслы вотэс пыр но шумпотыса юрттыны дась.

Удмурт кылэз тодӥсьёслэн ог-огенызы ужрадъёсын удмуртэн вераськемзы луэ. Соин ик ужрадъёс тросгес луыны кулэ. Медам вунэты калык ас культуразэ, удмуртлыксэ ӟуч но космпополитъемгес карын медам ышты.

- удмурт культураез вӧлмытӥсь институтъёс

Таӵеез ӧвӧл. Озьы луиз уга, нокыӵе нимазъям удмурт культура курс ӧвӧл: пӧраськон сярысь яке эктонъёс сярысь. Куддыръя мар ке луылэ ке но, со системае пыртэмын ӧвӧл на (систематически со уг ужа).

- удмурт вӧсьлыкез вӧлмытӥсь институтъёс

Номыр но ӧвӧл. Ӟуч черке ветлӥсьёсызлэн та ласянь шуг-секытсы ӧвӧл - байтак ӟуч черкъёс Мускоын. Нош удмурт осконлы дышем адямилэн вӧсьлыко кулэяськонъёссэ быдэстыны луонлыкез Мускоын ӧвӧл.

Дыр вуиз ини, оло, удмурт вӧсяськонэз кытын ке Муско улосын но ортчытыны. Татын но, коспмолит карын удмурт вӧсьбур милемын артэ мед луоз!

Кемалась ӧвӧл лыктэм удмуртъёс понна кыл но культураез утён туж лэчыт проблема ӧвӧл. Тросэз удмурт кылэз тодо, культураын но будэмын. Нош таӵе адями Мускоын выжыяськиз ке, кызьы-о со удмуртлыксэ нылпиосызлы сётоз? Удмуртлыкез сётон понна нимаз инфраструктура но коммьюнити кулэ.

Шуом, нокыӵе нимазъям удмурт яке фин-угор шӧмо нылпи сад яке школа ӧвӧл. Нош бигеръёслэн, кылсярысь, вань сыӵе школазы, Марьиноын интыяськемын. Со школаын бигер культуркомпонент мур пыӵатэмын.

Кытчы нош Мускоысь удмуртъёслэн нылпиоссы гужем мыно? Мыно меда соос удмуртлыксэс ыштонтэм вылысь удмурт лагерьёсы?

Та институтъёсыз кылдытон пумысен милемлы йыг-йыг малпаськыны кулэ.

Просмотров: 397

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Sveti, Апрель 9, 2012 в 12:27pm

Мускоын гинэ сыче шуг-секыт овол :) Малпаськиськод глобально, но кутскыны луэ туж локально. Школаос-нылписадъёс, институтъёс секыт усьтыны-кылдытыны, трос ресурс кулэ, собере соосты ури-бери контролировать карозы. Нош гурт "семейной" нылписад, школа - соиз капчигес. Сыче модель котькытын кылдытыны луэ, Финляндиын но, Америакаын но :) Шуом, кык нылпи яке дышетскись шедиз ке. Кыл-культура институтъёс но виртуально улыны быгато. Шуом, луысал ке кыче ке но сеть дышетись - тодись - анай кылыны - кыкети кылын вераськись - тунсыкъяськись-ёс куспын (Мускоын гинэ овол, котькытын) соку котькыче локальной пумиськонъёс-дышетсконъёс радъяны луысал. Зэмзэ вераса, сыче сеть почти вань ини: Оли Урасинова тодэ Муско удмуртъёсты но тунсыкъяськисьёсты - мон тодисько Финн, Эстон, Пранцуз удмуртъёсты но тунсыкъяськисьёсты - Алена Родионова венгер но мукет. Со порма ик удмурт кылъя но культурая тодос радъямын луыны кулэ, яке удмурт кылэз но культураез эскерисьёс куспын сеть луыны кулэ (удмурт, зуч, быдэс дуннеысь удмуртъёсты эскерисьёс куспын). Озьы асьмеос тодом-адзом, кин мае эскере, кинлэн кыче ужам емышъёсыз вань ини, кыче тужгес но актуальной эскерон ужпумъёс вань на, дуннеысь валтись тодос трендъёсты лыдэ басьтыса. Берпумети ужпум бордын - тодосчиос куспын сеть кылдытон бордын - мон шумпотыса ужасал :)   

Пусъёс

© 2021   Created by Ortem.   При поддержке

Эмблемы  |  Сообщить о проблеме  |  Условия использования