Uralistica

2007-це кизонь 26 мартса Саран ошень Печатень Кудса васенцеда няфтьфоль ломаттненди «Вайгель» мокшэрзянь национальнай радиопередачась.  Омбоце апрельста  лиссь эфиру.  И вов ни вете кизот, кода 77,88 УКВ частотаса вете шит недяляти сон кайги 16 частста сявомок 19-ти самс. Кодама вешфкст пуфтольхть Вайгельть инголе пуроптомстонза, мезсь пяшкотьфоль и мезть лангса нинге покодема?  Тянь квалма тейнек азондозе передачать редактороц Светлана Пивкина.

- Светлана Васильевна, тон сятнень эзда, кие ушеткшнезе «Вайгельть». Азка, кодамокс сон арьсефоль?

- «Вайгельсь» - тя ломаньтналонь, политикань, иформациянь и музыкань радиопередача мокшень и эрзянь кяльса. Пряфт тевокс редакциять инголе васенце шиста сявомок путфоль: шачема кяленьконь, коеньконь, культураньконь, литератураньконь ломаньёткс пачфтемасна.  Мокшэрзятнень минценнеть лангс  мяльснон шарфтомасна. Въдь тячи сидеста уленди стане: мокшень и эрзянь ломаттне, аф ваномок сянь лангс, што корхтайхть эсь тядянь-алянь кяльсост, пъцтай мезевок аф содайхть юромоньконь исяконь шинц и коензон квалма, кържа лувондыхть литература, и  сидеста прокс сёпондсазь эсь шачемаснон. Вайгельсь тяряфни тянь полафтомс. Эрь передачасонк минь азонттама кулхцондыеньконди козя культураньконь колга, няфнесаськ, што минь мокшень и эрзянь кяленьке тяниень пингоннет, лангсост ули кода корхтамс таколфты кизефксонь колга. И тяфта вов ни вете кизот. Эсь покодеманьконь минь латцесаськ стане, штоба кемокстамс ялкаксшить эрь кодама нароттнень ёткса, апак юкснек толерантностень вешфкснень лия юропнень и конфессиятнень мархта серцек эрямаса.

- И кодама таколфты кизефкс лангс шарфни мяль «Вайгельсь»?

- Радиопередачась фатнесыне пъцай сембе видетнень: велень эряфть, тонафтомать, ваймонь тефнень, экономикать, политикать, культурать, спортть и стак тов.Минь азонттама Мордовияса оцю и ёмла илатнень колга. Аф юкснесаськ диаспоратьке. Эфирсонк кайгондихть сюжетт Москувонь, Нижняй Новгородонь, Пензань, Ульяновскяень, Самарань, Саратовонь, Башкириянь, Татарстанонь и лия аймакса эряй-ащи мокшэрзятнень колга. Минь журналистоньке улендихть ширесост, васьфнетяма  ширде саф инжихть студиясонковок. Башка васта эфирсонк шарфнетяма финнонь-угрань юромонь кулятненди. А сяс кулхцондыеньке фалу содайхть мезе однясь лиссь кода россиянь финно-угрань регионца, стане омба мастороннесовок: Финляндияса, Эстонияса и Венгрияса.

«Вайгельть» эфирса фалу кайгихть мокшень и эрзянь кяльса морот.  Синь эрь кодамот: фольклороннетнень эзда сявомок тяниень пингонь эстраданнетненди самс.  73,88 УКВ частотаса ули кода кулемс тяфтама содаф коллектифнень кода: «Келу», «Умарина», «Торама», «Вий»,  содаф морайхнень Александра Куликовать, Нина Марковать, Галина Макшевать, Инна Учватовать, Любовь Князьковать, Николай Балашкинонь и лиятнень. Аф кържа и од вайгяльдовок: Алина Сяткина, «Васальга» фольклоронь группась, Сергей Гросс, Лиза Лисина. Кой-кона моротне тязк и сёрматфтольхть, «Вайгельть» студияса.  И тя тиемс аф стака, сяс мес миньцонк покодихть машты вайгяльксрежиссёрхт и тиендьсазь синь эсь тевснон тяниень пингонь техника лангса. А сяс ширесонк моронь тиендема сувсекшнихть кода ни содаф артистт, стане и школань тонафнихтьке.

 


Find more videos like this on Uralistica
Эфирса Катя Кирдяшкинась.

-Светлана Васильевна, а кодама рубрикаста ащи «Вайгельть» стамка, эрь шинь эфироц?

- Васендакиге эряви азомс, што минь улихть стама рубриканьке, конат кайгихть эрь шиня. И стапт - конат недяляти весть, теест башка максф пингста. Кепотьксонди «Содасасть ли тинь» рубрикась эрь шинне. Тяса минь азонттама мокшэрзянь мялень салай илатнень, мифологиять, паршихнень  колга,  конат эрявихть содамс.  Въдь ломаттне, ужяленди, пъцтай семботь ни юкстазь.  А вов недялянь  шитненди явфт  тяфтама рубрикатне,кода: «Перьфпялень лепне», «Тячи лятфнесаськ», «Содавикс лем», «Минь литератураньке», «Идень куженя», «Архивста», «Пеетькскя». Улема, эрть лемоц сатомшка азонды мезенди сон лемтьф. Стане жа кунара ни арась кельговикс кулхцондыеньконди «Сась инжи» рубрикась. Эсонза минь васьфнетяма и корхнетяма кода культурать, политикать, спортть видеса содаф ломань,  стане жа стамка ош и велеряй мархта.  Кой-коста кулхцондыеньке синць гайфнихть редакцияв  и азондсазь, кодама  мокшень или эрзянь ломань мархта интервью синь ёральхть кулемс передачасонк. Вийс коре минь пяшкотькшнесаськ вешфксснон. 

А нинге ломаттне вешихть ширденк кельгома мокшень и эрзянь мороснон. И тянди минь эфирсонк эрь шиня лемтьф башка час. Кемготувоста сявомок кемзисемготи самс 73,88 УКВ частотаса кайги «Казня» передачась. Васенце пяле частть эрзянь кяльса и омбоце пялеста - мокшеннеса. Пингстонза эфиронь вятихне лувондсазь сёрматнень, конатнень кулхцондыеньке кучсесазь смс-порталти, электрононь почтазонк, или телефон вельде. Вятихне азондсазь передачаса тяштьф приветтнень и поздравондаматнень и, кода ни азыне, путнесазь мяльсь туф мокшень и эрзянь моротнень. Аф весть улендсь тяфтавок: редакцияв гайфнесть прокс руз ломатть, и вешсть мяльс туф мокшень или эрзянь мора, къле пяк ни седиень токайхть, и анасть кафта-колма валса азомс мезень квалма тя или тона морось. Къда музыкась ули архивсонк, минь вестьке аф атказатама ломаттненди.

- Кода содасаськ, аф кунара «Вайгельть» панжевсь башка сайтоц. Мезе ули кода мумс электрононь лопаннтень эса?

-  Афкукс, аф кунара минь эвондась сайтоньке. Сонь ули кода мумс www.vaigel.ru адресть коряс. Койсон, эсьлацонь ширец вов мезьса: пъцтай марнек интерфейссь тяса сёрматф мокшень и эрзянь кяльса. Тяда инголе мезевок тяконь кодяма мон ашень васьфне. Ужяленди, мъзярос нинге апак ладяк онлайн вещаниясь, но покодемась тя видеса мольфтеви. И надиятама, ётай ни аф сяшкава лама пинге, мъзярда тя тиеви. Ну а мъзярос сайтсонк ули кода нюрьхкалготфста кулхцондомс  мекольдень пингонь эфироньконь, рубриканьконь, а тяфта жа литературань произведеният, лувомс народонь кулят мокшень и эрзянь кяльса, ваномс фотографият и стак тов.
Парось, конань канды тееньк сайтть покодемац, няеви сембонди. Вельденза мокшень и эрзянь вайгяльхнень кульсазь аф аньцек Мордовияса, но и лия регионца эряй ломаненьке, и нъльне лия странасовок. Въдь лац содаф, тячи мокшетне и эрзятне сратфт марнек масторть келес. Синь эряйхть Америкаса, Италияса, Австралияса и лия вастса. Надиятама, минь покодеманьке лезды теестка аф юкстамс тядянь-алянь кяльть.

- А минь, тя кие? Кие тячи тиенди «Вайгель» радиопередачать?

- «Вайгельса» тячи покодихть од ломатть, од журналистт. Сембе синь тонафнесть Н. П. Огарёвонь лемса Мордовиянь госуниверситетса. И аф ваномок одкс шиснон лангс, стирнятне лац содасазь эсь тевснон, тядянь-алянь кяльснон. Мекольце вешфкссь путневи васенцекс ширесонк покодема примамста.  Маштыхть синь и мялень салай сюжетонь тиема, и фалу арьсихть мезьса мазолгофтомс эрь шинь эфирть. А лемснон эрь мезень кулхцондыеньке лац содасазь. Нят Светлана Сюваева, Люба Виряскина, Наташа Эрзяйкина, Катя Кирдяшкина и Марина Агеева.

- Светлана Васильевна, койсонтт, кодама прябалат тячи ащихть «Вайгельть» инголе и кодама афсатыкс лангса покодема сяда тов.

- Прябалат улихть фалу. Аш синь, улема, аньцек кулотнень. А «Вайгельсь» эрек. Сон касы и келеми, мушенды од кулхцондыхть. Тячи, кода и вете кизода тяда инголе, аф  прокс кондястикс ляткшни минь вещаниянь частотаньке.Ломаттне сидеста пеняцякшнихть, што кундамс волнаньконь стака, сяс мес УКВ приёмникт тяни ни кържа кие кирди. А вов оттне,  пъчкяль,  мулезь «Вайгельть» телефонцост. А тя, шарьхкотьф, тиемс аш кода, тоса аньцек FM-радива. Да и волнаньке аф сатнихть пяк ичкози Саран ошть эзда. А въдь кулхцондыеньконь оцюшкасна эряйхть райоттнень эса. Карматама надияма, што сайтоньконь покодемац лезды петемс тефнень тя видеса хушь аф ламода. Мес аф ламода? Сяс мес кулхцондыеньконь ётска аф кържа эряфкшу ломаньда, конат  компьютерть мархта аф пяк ладяйхть, а вов радива кулхцонкшнихть оцю мяльса.

Нинге прябалакс, арьсян, ащи ся, што минь редакцияньке сатомшка ичкозе ошть кучканц эзда. Корреспонденттненди и вайгяльксрежиссёрхненди сашендови ламос пачкотькшнемс покодема вастозост. И къда минь улелеме Саранскяйть кучкаса, инжидовок студиясонк улель сяда лама.  Въдь «Вайгельсь» -  тя эсь кодяма творчествань васта мокшетненди и эрзятненди.

Ужяленди, кода и бюджетонь ламоц лия организациятнень, минь аф сатомшкат финансоньковок. Прокс аньцяйня лезкссь эрь кодама министерства и ведомста ширде, конанди танадс коре  лездомаль национальнай СМИ-тненди. Тянь сюнеда ламоц арьсемканьке арьсемакс и ляткшнихть. А минь  оцю мяльса сёрматкшнелеме студиясонк нинге сяда лама мора, аноклакшнелеме дискт музыка и спектакля мархта, тиенделеме рекламань баннерхт мокшень и эрзянь кяльса, касфтолеськ покодиеньконь лувксснон. Вов тячи, кепотькоснди, сайтоньконь лац-ряц  молеманцты эряви башка ломань.  Но пандомшканьке теенза минь тячи аш. Сатомшка лафченят минь сотксоньке велеряйхнень мархтовок. И туфталхне тяса тага сякот, кода и марнек Россиять келес – аш ярмак.

Ну а лядыкс прябалатне ни аф сяшкава оцюфт. Минь сяськондьсаськ синь эсь вийсонк. Въдь минь ули мяленьке покодемс. И минь карматама покодема, штоба «Вайгеленьке» кайголь вииста и мазыста.А ся, што сон кулеви, корхтайхть минь казняньке, а сембода пяк кулхцондыеньконь ширде пара валхне.

- «Мокшень валгярькссь» поздравондасы «Вайгельть» вете кизонь топодеманц мархта! Арьсетяма мокшень и эрзянь кяльса кайги передачантенди афкукс келемомс лама масторга. Штоба эрь эфиронтень ломаттне учельхть и пара мяльса кулхцондольхть.  И  мъзярда «Вайгельти» топоди ведьгемонь сембе видеста азолезь: Афкукс. Тя передачась эсь пингстонза тись лама, штоба ванфтомс мокшень и эрзянь кяленьконь, кеподемс ломаненьконь национальнай мяльёжеснон.

- Сюкпря, минь карматама покодема тя видеса. И сембось удалай, койсон, аньцек эста, къда тинь, мокшет и эрзят, карматада кулхцонкшнема тядянь -алянь кяльса кайги «Вайгель» радиопередачать.

Просмотров: 713

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Pokononj Mikaj, Апрель 6, 2012 в 1:44pm

Панемс эряви "Вайгелень" вятиензон!!! Фкясь кати меянь фалу копордаф, омбоцесь эфирса амянь цють аф матодови шърать ваксса! Нинге кафта улихть...коооодама синь кяльса корхнихть - кати! Содайхне улихть? )

Комментарий от: Jalt, Апрель 6, 2012 в 1:03pm

Кадык "Вайгеленть" вайгелезэ гайги свал!!! Уледе тейтерть шумбрат ды ероковт.

Комментарий от: Jalt, Апрель 5, 2012 в 1:05pm

Паро! Кеняркс марто, оят! Кадоводо свал истямо ёроков ды мелень витиця радиостанциякс! Эрьвантень кие тесэ роботы арян шумбрачи, певтеме уцяска ды сатовкст эрьва мейсэ! Икелевгак ютамс тенк истямо лувсо!

Пусъёс

© 2018   Created by Ortem.   При поддержке

Эмблемы  |  Сообщить о проблеме  |  Условия использования