Uralistica

Ӟечбуръяськемысь ӧм дугдэ. Удмурт пиналъёслэн газетсылэн туалаез но вуоноез

Туэ пиналъёслы анай кылын потӥсь «Ӟечбур!» газетлы 85 ар тырмиз. Та дыр куспын газет трос пол вошъяськиз, пӧртэм шуг учыръёсы сюрылӥз, озьы ке но котьку дыртӥз аслаз покчи лыдӟисьёсыз доры. Кемалась ӧвӧл газетлэн редакциез ӟеч пусйиз аслэсьтыз котырес лыдпуссэ, нош кыӵе воштӥськонъёс ортчизы 5 ар куспын, тодомы «Ӟечбур!» газетлэн валтӥсь редакторезлэсь Надежда Серафимовна Лопатиналэсь.

 

- Надежда Серафимовна, тӥ «Ӟечбур!»-ын валтӥсь редакторез луыса 15 ар пала ужаськоды ини, тӥ понна, со дыр куспын кыӵе тужгес но яркыт воштӥськонъёс ортчизы газетлэн улоназ?

15 ар ӵоже газетлэн ужаз трос воштӥськонъёс ортчизы: редакцимес карлэн центраз выжтыны быгатӥм, газетмес тырлы буёло карим, редакционной кенешмес кылдытӥм – отчы тужгес мыло-кыдо ужась удмурт кылъя дышетӥсьёсты но школа директоръёсты пыртӥм. Проектъёс гожъяса, трос бамъем нимысьтыз номеръёсмес нимаз гуртъёслы, школаослы сӥзьыса, коньдон шедьтылыны тыршиськом, вылӥ таланто пиналъёслэсь ужъёссэс бичетъёсын поттаськом.

- Тӥляд малпандыя, кыӵе инты басьтэ «Ӟечбур!» газет удмурт, финн-угор дуннеын?

Финн-угор дуннеын «Ӟечбур!»-лэн интыез бадзым. Асьме выжыысь калыкъёслы со возьматэ, удмурт нылпиослы тырмымон саклык висъяське шуыса. Угось анай кылын потӥсь асьсэлэн газетсы вань, соос сярысь вылӥ кивалтӥсьёс, Печатья агентствомы сюлмасько. Компьютеръёсын но планшетъёсын гинэ тунсыкъяськись пиналъёсты лыдӟиськон дуннее кысконын но солэн интыез пичи ӧвӧл. Пӧртэм конкурсъёсы, викторинаосы пыриськыса, пиналъёс газет-журналъёсын, книгаосын бугыръясько, озьы тодон-валанзэс муромыто, малпаськыны, кыӵе ке кулэ йылпумъянъёс лэсьтыны  дышетско. Котыр ласянь визьмо луон понна, со ваньмыз туж кулэ нылпилы. «Ӟечбур!» газет пиналъёсты политикаез, кивалтон удысэз но валаны дышетэ. Нылпи газет бордысен кутскиз сюрессы тросэзлэн удмурт писательёслэн но кылбурчиослэн, дышетӥсьёслэн но кивалтӥсьёслэн. Газетэн ортчытэм пӧртэм праздникъёсы, ужрадъёсы пыриськыса, соос дӥсьтӥсесь, котькыӵе уж борды  кутскыны дасесь луыса будӥзы но будо. Нош со быдэс  финн-угор дунне понна пусйымон.

- Кыӵе ужъёс нуиськоды, гожтӥськондэс йылтон понна?

Гожтӥськисьёслэсь лыдзэс йылэтон – газетын ужасьёс понна одӥгез секыт ужпум. Командировкаосы потаса, школаосын вераськыса ветлэмлэн пайдаез, валамон ини, туж бадӟым. Но со эшшо бадӟымгес луысал, вӧзазы анай-атайёссы, песянай-песятайёссы ке луысалзы. Коньдон угось соос киын. Та муген ик ми мӧйыосын пумиськылонъёс радъяськом, библиотекаосы, соослэн пукон коркаосазы вуылыны тыршиськом. Арлыдо лыдӟисьёсмылы шуыса «Пукон корка» сэрег но усьтӥмы, соослы пиналъёсын герӟаськем темаосъя конкурсъёс но радъялляськом. Милемлы юрттыны мылкыд карись мӧйы эшъёсмес одӥг-ог командировкаосы нуллӥськом. Лыдӟисьёсмы пӧлысь «Пичи депутат» но бырйылӥмы. Соос, ас мылкыд каремзыя, милемлы гожтӥськисьёс утчазы, бордгазетъёс поттӥзы. Куд-огез асьсэос ик конкурсъёс малпаллязы, кылсярысь, Петуньки школаысь Паша Вахрушев, али Казаньын дышетске. Солы луыса Шаркан ёросысь Мувыр гуртын гужем кык бадӟымесь праздникъёс ортчытӥм. Отчы вуылӥзы пӧртэм ёросъёсысь гожъяськисьёсмы. Газетлы дунтэмгес гожтӥськонъя акциос ортчытъяськом. Городысь урамъёстӥ, вокзалъёстӥ но ветлэммы вань. Умой ужаськом Удмурт театрен: газетлы быдэс классэн гожтӥськисьёс отын дунтэк спектакль учкыны быгато. Лотерея амалэз уже кутыса, кузьымъёс пиналъёс басьтыны быгато. Азьло аръёсы Сарапулын поттэм мисьтаськон машинаос, Можгаын дасям нылпи койкаос, пӧртэм посуда тӥрлык, дӥськут, мамык одеялъёс, компьютер тӥрлык басьтылӥзы. Но бадӟым кузьым одӥг, кык адямилы гинэ шедемен, ми тросгес, но пичиесьгес кузьымъёс сётъялляны кутскимы. Удмурт Правительство пыр гожъяськись пиналъёс понна быдэн 5 сюрс, 10 сюрс премиос но курылӥмы.

- Азьло но али дырлы кызьы гожтӥськон газеттылы мынэ?

Котькыӵе газет-журналъёслы сямен ик, милям газетмылы но гожтӥськисьёслэн лыдзы синэ. Тужгес но ӝож наш-наш удмурт ёросъёсын со усе шуыса. Басьтом та арез ик. Арлэн кутсконаз Алнаш ёросын тани 85 лыдӟисьёсмы вал, пӧсьтолэзьысен соос 48 кылемын. Пичи Пургалан 91 ке вал, кылемын 51. Трос лыдӟисьёсмы ышемын Татарстанысь Кукмор ёросын, отчы шергес вуылӥськом но. Газетлы гожтӥськон меӵак герӟаськемын школаосын удмурт кылэз предмет чотын ӧжытгес пиналъёс дышетэмен. Со берло дыре трослы кулэсмемын, азьло дыръёсын ӵошатыса.

- Кызьы каръёсын но гуртъёсын ортче газетэз вӧлмытон?

Каръёсын газетлы гожтӥськон, веранэз ӧвӧл, туж ляб мынэ. Удмурт кылэз газетэз лыдӟымон ӟеч тодӥсь пиналъёс уго городын ожыт.  Берло ми ӟеч кусып тупатӥм Кузебай Герд нимо гимназиен. Отысь пиналъёс быдэс классэнызы гожтӥсько газетлы. Озьы ик пусъем потэ нылпи садъёсты. Кивалтӥсьсылы луыса, кӧня ке арзэ ини тросэн басьто газетэз Ижкарысь Устинов центрысь нылпи садъёс. Газетын ужасьёслы тужгес но юртто «Ӟечбур!» газетэ дышетскыкузы мыло-кыдо гожъяськемъёс, соос пӧлын Кузебай Герд нимо гимназиысь Светлана Ильина, 60-тӥ школаысь Елена Ямщикова, Ижкарысь нылпи садын ужась Ирина Пантелеева но трос мукетъёсыз.

- Тӥ понна тӥляд лыдӟисьты – со кин?

Милям лыдӟисьмы – со нырысь ик пиналъёс, собере – дышетӥсьёс но анай-атайёс. Кин газет вылын будэ, со мӧйымыса но соин уг люкиськы ни, нылпиосызлы газетэз яратон пыӵатэ. Огкылын вераса, милям лыдӟисьмы – со пиналъёс но пересьмонлы сётскисьтэм, капчи мылкыдо, оскымон дышетӥсьёс но анай-атайёс.

- Кыӵе ӵошатсконъёс ортчытъяськоды пиналъёс вискын?

Конкурсъёсты вераса но уд быдты. Кудъёсыз туж кема аръёсын мыно, кудъёсыз кылдо но быро, выльёсыз вордӥсько. Конкурсъёсы пиналъёслы капчигес пыриськыны, малы ке шуоно тема утчаса улоно ӧвӧл. Со – дась. «Вунонтэм гужем», «Мынам убое», «Яратоно дышетӥсе», «Выль ар», «Ньыль син», «Быдӟым Паска» но трос мукет конкурсъёс ялӥськом.  Суредъёсъя но бадӟым уж нуиськом, соосъя выжыкыл гожъятӥськом, нылпиосты кылбур малпаны куриськом. Киужъёсъя акциос ортчытъяськом, арбериоссэс пиналъёслы ик, конкурсъёсын вормисьёслы, кузьмаськом.

  

- Тодӥсько, азьло пӧртэм фестивальёс ортчытъяськоды вал шуыса, кылбурась пиналъёслы нимысьтыз сборникъёссэс поттыны юрттӥськоды. Нуисько на-а со выллем ужъёс та дыре?

Пӧртэм проектъёс гожъяса, коньдон асьмеос утчаса поттылӥмы быгатӥсь пиналъёслэн ужъёсынызы книгаос. Соос трос люкаськизы, но кызьы вӧлмытыны шугъяськыса, ми соосты али поттылэмысь дугдӥм. Паймоно кадь, анай-атайёс но одӥг-кык книга сяна кулэ уг каро, школаос но уг тунсыкъясько, оло, пиналъёс нокинлы но кулэ ӧвӧл но кадь. Дышетӥсьёс асьсэлы басьто, но урокъёсын соосын ужаны дырзы тырмымтэен, дыр, паськыт аудитория со книгаосты уг адӟы.

Ёросъёсын праздникъёс но, гожъяськись нылпиослэсь слётъёссэс но ортчытъяськом, асьмеос коньдон  утчаса, гурт кивалтӥсьёсын вераськыса лыктэм куноосты ческыт сюдыны, кузьымъёсын зэмос праздник карыны тыршиськом. Но жаляса верано, редакциямы бертӥськомы но, гожтӥськисьёслэн лыдзы уггес буды.

- Кыӵе ёросъёсын тросгес гожтӥськисъёсты, кытын ичигес?

Лыдзисьёсмы ичигес луизы ке но, Алнаш, Пичи Пурга, Кукмор ёросъёс азьпал радын ик мыно. Озьыен вераны луэ, мукетъёсаз эшшо но ичигес кылемын. Чылкак одиг лыдӟисьмы  Яр, Грахово ёросъёсын. Татарстанысь Набережные Челныын одӥг ке но лыдӟисьмы вань шуыса, ми туж шумпотӥськом, со бигер кар ук!

  

- Тӥ понна кыӵе воштӥськонъёс ортчизы газетлэн улоназ берло 5 ар куспын?

Газетмы буёло потыны кутскиз, чебер тӧдьы бумага вылын. Азьло кык буёло гинэ потэ ке вал, али чебересь суредъёсын, фотографиосын шудлыртӥськом газет бамъёсты. Туж оскимы вал, со лыдӟисьёслэсь лыдзэс будэтыны юрттоз шуыса. Лыдӟиськыны яратӥсьлы газетлэн кыӵе буёло луэмез уг люкеты вылэм.  Гожъяськыны яратӥсьёслы но. Милям вань ужрадъёсмы лыдӟисьёсмылэсь лыдзэс будэтон, газетмылэсь пуштроссэ узырмытон, данзэ будэтон понна радъясько ук. «Ӟечбур!» газет «Дэмен» огазеяськонэн ӵош кылдытъяз Герман Ходырев нимо премия. Кӧня пиналъёс но дышетӥсьёс 7 ар ӵоже басьтылӥзы коньдон премиос, лауреатъёс луылӥзы но Удмурт театре Выль ар концертэ дунтэк вуылӥзы!

Берло 5 аръёс ӵоже пӧртэм проектъёс гожъяса коньдон утылӥмы, всероссийской но межрегиональной конкурсъёсы пыриськылӥмы, куд-ог пиналъёсты, асьмеос уксё утчаса, Венгрие ысъяллямы.

- Тӥляд малпандыя, удмурт пиналъёс 10 ар талэсь азьло но туала дыре маин висъясько?

Туала пиналъёс ӧжытгес лыдӟисько, Интернетын пуко, ӧжытгес гожъясько газетэ, бадӟым произведениос – веросъёс, выжыкылъёс – уггес ысъяло. Но со дыре ик туж мыло-кыдо ветло «Шундыкаре», «Усточикаре», соос пӧлысь тросэз – «Ӟечбур!» газетэ гожъяськисьёс. Со шумпотымон.

Лиза Шихова

Просмотров: 256

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования