Uralistica

Сюпав-аволь келенек?

Ютксонок вастневить ломанть, конат секе тев музгордить, келя, эрзянь келесь аволь пек сюпав, сонзэ вельде ламось а ёвтави, а пачтеви кунсолыцянть эли ловныцянть мельс. Тень пингстэ сеске ахолдыть рузонь келенть пелев (лият сынь а содыть): оно, келя, кодамо сон сюпав! Академической валкссонзо лововить малав 250 тежа валт, а минек «сехте сюпав» Р.Н.Бузаковань «Эрзянь-рузонь валкссонзо» (М., 1993) сындест весемезэ 27 тёжат. Ну, истятнэнень васняяк ледстявлинек: сёрмадомсто ды сехте пек кортамсто кияк, зярдояк келенть академической валксолнзо педе пес тевс а нолдтнесы, те тензэ а тееви ды теемскак а эряви—учёнойтне умок уш ловизь, ломанентень «прянзо чамдомга» сатыть весемезэ 6-7 сядо валт.

Ютамсто тешкстасынек сеньгак, англань келень академической валксось кельгсти 750 тёжадо ламо валт, а васов эйстэнзэ кадновить немецень, французонь кельтнеяк. Ансяк потсост пеледе ков седе ламо валтнэ тевс нолдтневить чуродо весть, сеяк эрси зярдо кортамось моли меньгак спецификань, чуродояк чуросто вастневиця темадо: медицинадо, астрономиядо, химиядо д.и.т. Теде башка, эряви ваншкномс, кода чачить те эли тона кельсэнть эриця валтнэ. Тень невтемга сайсыник рузонь кельсэнть «ход» ундокстонть теезь глаголтнэнь ды каршозост аравтсыник эрзянь аналогост. Оно мезе лиси:

- входить – совамс

- выходить – лисемс

- заходить – совамс, валгомс

- отходить – туемс, сыргамс

- находить –муемс

- подходить – пачколемс, молемс

(те тензэ а моли)

- переходить – ютамс

- доходить – пачкодемс

- проходить – ютамс

- происходить – теевемс

Теде башка ловинк, зяро существительной, прилагательной ды лия коень лемть теевить секе «ход» юрстонть: поход, ходики, прихожая, ухоженный, хождение, выходка д.и.т.

Лисни, префикстнэнь вельде рузонь кельсэнть весемезэ вейке ундокстонть (юрстонть) теевить башка смустьсэ мик кемень валт (паряк, седеяк ламо, вешнеде тынсь), эрзянсесэнть вана истямо арась, тосо эрьва валонть юрозо эсензэ. Тесэ ёвтазенть мельсэ кирдезь, чарькодеви, рузонь келеськак минекенть коряс аволь пек сюпав, ансяк, виде, весемесь эйсэнзэ ёвтави ды чарькодевияк седе шождасто. Мекс? Тувталтнэде, минек койсэ, зярыя.

Ютксост сехте покшось, сехте стакась, сехте матрыцясь – тиринь келень а тонавтнемась эли пек беряньстэ тонавтомась. Ледстинк, зяро тенк савкшнось аштемс рузонь келенть велькссэ! Омбо масторонь кельтнеде кортамскак а мезть. А тиринсесь? А-а-а, синдезь-путозь кодаяк содасынек, сеяк саты. А келесь апак тонавто, апак тонатвне карми канаскадомо, эйзэнзэ костояк верде а прыть од форматне, а чачить неень шкань лия вешевкстнэ. Эряви тешктсамс, рузонь келенть пельде тесэ лезкс учнемс а мезть. Минекенть эйстэ сон явови аволь ансяк валкссонзо ды грамматикасонзо, сонзэ философиязояк овсе лия. Секс сонзэ вельде келезэнек совасть ды те шкас норовить совамо истят амаштовикс, аладиця формат, кода «кие мерсь, што сон сы?», эли «мезть ансяк эзь тейне, штобу тей а сакшномс». Эряволь меремс (сёрмадомс) «кие мерсь самодонзо?», «мезть ансяк эзь тейне тей а сакшномганзо». Истя лисни секс: рузонь келесь флективной, эйсэнзэ валрисьмесэнть валтнэнь ютксо сёлмавкстнэ теевить предлогонь ды префиксэнь (приставкань), агглюнативной эрзянсесэнть—аффиксэнь вельде, конась поладови валонть юронзо пес: кардазсо — во дворе, со двора – кардазстом д.и.т.

Ней вере ловнозенть мельсэ кирдезь явовтынк рузонь 250 тёжа валтнэнь кемень кирда ды чарькодеви, - тосояк вал юртнэде 25 тёжадо а седее ламо, кода минек тириньсесэнтькак. Сынь эрявить ванстомс, кода нарвицькась вансты ципаказо, а тиринь келень грамматиканть аволь ансяк тонатвнемс, а кува-кува витнемскак.

А.Лежиков

ЭМ 31.07.14

Просмотров: 130

Ответить на это

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования