Uralistica

2014-15 иень эрзя раськень лемпутомат. - Номинации Эрзя народа 2014-15.

«Руця» эрзянь ярмакпаргось таго ютавты 2014-15 иень эрзянь ломанень мельёвтамот.

Асетяно ютавтомс истят лем путомат:

«Эрзя-2014», мельёвтамонь ловксонть яволявтсынек 31.12.2014, «Эрзянь вал» куросонть.

«Эрзянь тев-2014», мельёвтамонь ловксонть яволявтсынек 31.12.2014, «Эрзянь вал» куросонть.

«Эрзянь моро-2014», мельёвтамонь ловксонть яволявтсынек 31.12.2014, «Эрзянь вал» куросонть.

«Эрзянь сёрмадовкс-2015», мельёвтамонь ловксонть яволявтсынек 16.04.2015, эрзянь келень Чистэнть, Саран ошсо.

 

(2014 – кавто тёжат кемнилее.)

 

Кода меляяк, неть мельпутоматне кармить ютавтовомо сехте покш «Эрзянь вал» Интернет-куросонть, конас совасть малав 8000 ломанть, нама, эйстэст седе ламотне – эрзят.

Мелянь мельпутоманть коряс те иень мельпутоматне аламодо витневить. Тейсынек сынст седе чарькодевиксэкс. Сынек мельс: эрзянь сёрмадоматевень Казнентень максомс мазый лем – «Эрзянь ойме». Мекс? Те шождасто чарькодеви – эрзякс, эрзянь кельсэ ды мельсэ сёрмадыцятне, те алкуксонь эрзянь ойме марто эрзят ды эсь оймест сюпавчисэст эрзянь кельвалонть вельде казить весе Эрзя раськентень.

Лецтясынек мелянь иень мельпутомань ловкстнэнь.

Меля мельпутоматне невтсть:

«Эрзя-2013» лемпутоманть эрзятне максызь Вирень Инзейненень (Челяба ош), эрзянь тевс виензэ-шканзо покш путоманзо кис.

«Эрзянь тев-2013» лемпутомакс эрзятне ловизь Раськень Озксонть, кона ютась Чукал велесэ.

«Эрзянь моро-2013» лемесь сатотсь «Авай» моронтень, конань морызе Е. Самаркин эрзянь цёрась.

2014 иень эрзянь сёрмадома шкинемань Казнесь максозель истя, арневкссэ (диплом) ды сисемень-сисемень тёжань целковойсэ казезельть:

Журавлёв Числав, «Пингень цецине» валморонзо кис,

Подгорнова Алина, «Тюштя» валморонзо кис.

 Арневкссэ ды кемень тёжань целковоень Прявтказнесэ казезель:

Боляень Сыресь, «Оймень пшкадема» валморонзо кис.

 

   Паро мельсэ тердтяно эйсэнк, эрзят, ёвтамс меленк, кинень максомка тенек 2014 иень лемпутоматне. Васня те темасонть ёвтадо меленк панжадо сёрмадозь. Мейле минь кочкатано ветень-ветень лемть-тевть эрьва лемпутомань кочкамос. Конань-кинь кис тынь, эрзят, путтадо седе ламо мельпутомат, сетненень путовить неть вере тешкстазь паро лемпутоматнеяк.

 

Паронь арсезь «Руця» эрзянь Ярмакпаргос эсь мельсэ совазь эрзятне ды

Эрюш Вежай, «Руця» ярмакпаргонть тевветиесь.

2014 ие, ацамков, 11 чистэнть.

Просмотров: 126

Эта запись блога закрыта для комментариев

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования