Uralistica

2014 иень эрзянь мельпутоматне. = Номинации Эрзя народа 2014 года.

2014 иень эрзянь мельпутоматне.

2014 иень ацамковонь перть «Эрзянь вал» вастнема куросонть ютавтозельть эрзя раськень мельпутомат. Те вастнемакуронтень совситьть малав 8000 эрзят.

2014 иень лемпутомас ёвтазельть вана неть лемтне ды тевтне:

«ЭРЗЯ-2014» лемпутомас:

Аношонь Тумай (Николай Аношкин)- эрзянь музеень прявтось, Данильчев Сантяй - эрзянь тевветий, Жегалина Римма – эрзянь раськень тевветий, Нуянь Видяз (Четвергов Е.В.) – «Эрзянь Мастор» кулялопанть витниесь, Темаень Анге – эрзянь раськень тевветий.

«ЭРЗЯНЬ ТЕВ-2014» лемпутомас:

«Эрзянь лисьмапря», «Эрзянь ТВ», Маторкина Татьянань Интернетс эриванмонь путнематне.

«ЭРЗЯНЬ МОРО-2014» лемпутомас:

«Ратор чирева», морыть: Мирослава Копинец, Александр Садварий, валтнэ: Боляень Сыресь, моравксось: В. Девятов; «Стувтынь», моры: Эряна; «Эрзянь Масторонтень мором», моры : Олёш, валтнэ: Татьяна Мокшанова, моравксось: Олёш; «Эрзянь ава, авине, эрзянь бояравине», валтнэ, моравксось: Раиса Плотникова.

«ЭРЗЯ РАСЬКЕНЬ ЯЛГА-2014» лемпутомас:

Мирослава Копинец, русинэнь ава; Тоомас Хендрик Ильвес, Эстэнь Масторонь Президентэсь.

«ЭРЗЯНЬ СЁРМАДОВКС-2015» лемпутомас:

 «Масторов нолдасынек сюкпрянок», Маризь Кемаль.  «Тесэ ты Тосо», Нуянь Видяз. «Ратор чирева», Боляень Сыресь. «Калмазь ледстнема», Боляень Сыресь. "Каргонь кинь ломанть», 3-це пельксэсь , Брыжинский В. С. (Мельпутоматне путневить 31.03.15 видьс)

 

                                     Мезе невсть эрзянь ломанень мельпутоматне? Вана мезе:

«ЭРЗЯНЬ ТЕВ-2014» лементь эрзятне максызь Маторкина Татьянань Интернетс эриванмонь (видео) путнема покш тевензэ кис. (50,0%). Сынь максыть эрзятненень содамочи Эрзя раськеденть, сонзэ кельдензэ, мазычидензэ, мельдензэ.

Омбоце таркас эрзятне аравтызь «Эрзянь ТВ» эрзянь од ломантнень Зинёронь Сантяень ды Ачеватонь Сантяень тевест. (26,9%). Цёратне парсте невтить неень шкань од ломантнень тевест, эрзянь од ломантнень мелест-бажамост.

Колмоце таркась сатотсь «Эрзянь лисьмапря» эрзянь покшчинтень, кона ютавтозель Луга Ян ошонть маласо, Обран ёнкс. (21,3%). Те иестэнть тосо парсте невтезель эрзянь урьвакстомань-чиямонь коесь.

«ЭРЗЯ-2014» лементь эрзятне максызь – Нуянь Видязнэнь (Четвергов Евгений Владимирович), «Эрзянь Мастор» эрзянь кулялопанть прявтвитниентень. Тензэ топодсть те иестэнть 80 иеть. (28,0%). Путовксозэ Эрзянь тевс Видяз атянть алкукс ине: нолды кулялопанть, ярмакт тень кис кодаткак а саи, сёрмады кинигат, публицистикань статьят, конатнесэ парсте невти неень шкань кевстематнень, конат токить Эрзянь раськенек, сонзэ эрямонзо, неень шкань ды икелепелень эрямонзо.

Омбоце таркас эрзятне аравтызь Аношонь Тумаень (Аношкин Николай Иванович), Эрзянь музеень прявтонтень, Луга Ян ош. Сон те иестэнть цёранзо марто тейсь ды стявтсь чувтонь летемрунгот Эрзямасонь Эленанень, Несмеян Васильевнень ды Кузьма Алексеевнэнь, ине эрзянь раськень ломантненень, конат максызь эсь эрямост Эрзянь раськенть кис. (24,0%)

Колмоце таркас эрзятне путызь Жегалина Риммань, Покш Игнат велень паро-превей эрзянь аванть. (22,0%). Истя эрзятне теньсэ тешкстызь сонзэ покш путовксонзо Эрзянь раськенть культуранзо ды питнечинзэ Интернэтсэ невтеманть кис.

 

ЭРЗЯ РАСЬКЕНЬ ЯЛГА-2014.

«ЭРЗЯ РАСЬКЕНЬ ЯЛГА-2014» лементь эрзятне максызь Мирослава Копинец (85,0%) русинэнь раськень морыцятнтень, кона пек парсте моры морот ЭРЗЯНЬ КЕЛЬСЭ. Те иень перть сон морась эрзякс ниле эрзянь морот, конат вечкевсть эрзятненень.

Омбоце таркас эрзятне путызь Эстэнь Масторонь Масторпрявтонть (Президент) Тоомас Хендрик Ильвесэнь. (15,0%). Теньсэ эрзятне тешкстызь сонзэ покш Эрзя раськенек мельваноманзо-арнеманзо кис ды минек раськентень лезэнь максоманзо. Эрзянь содавик ломантнень сеедьстэ тердтнить Эстэннь Масторов инжекс, тосо нолдневить кинигат эрзянь кельсэ. Тедиде Эстониясо нолдазь эрзянь кельсэ «Масторава» морокерьксэсь (эпос).

 

«ЭРЗЯНЬ МОРО-2014» лементь эрзятне максызь «Эрзянь ава, авине, эрзянь бояравине», Раиса Плотниковань моронтень.(48,9%). Морось моразь парсте, мазыйстэ, эрзянь раськень ёжосо, мазый вайгельсэ. Кунсолосак сонзэ ды оймесэть-пилесэть куватьс карми гайгеме те морсь ды лецтявтнеме эрзянь аватнень инень инее мазычидест.

Омбоце таркас эрзятне аравтызь «Ратор чирева» моронть, конань морызе Мирослава Копинец морыцясь, валтнэ Боляень Сыресень (31, 9%). Морось пек виев, смустев. Невти Эрзя раськенть эрямопингензэ ды кемевти: зярдо эрзятне вейсэть – сестэ раськенек виев, сон зярдояк а ёми, карми эрямо пингеде пингес. Валтнэ виевть, морыянть вайгелезэ – мазыйде мазый, теке сырнень баягине.

Колмоце таркас путозь «Стувтынь» морось, конань морызе Эряна (Елизавета Лисина).(10,7%). Морось – вечкемадо. Неень шкань. Истят моротне пек эрявить неень шкань од эрзятненень, кадык содыть, кода мазыйстэ ёвтавить вечкемадо валтнэ минек гайтев-мазый эрзянь кельсэнек.

                                                                    ***

Сюконямот весе эрзятненень, кить путсть мель ды шка ютавтозь 2014 иень эрзянь мельспутоматненень.

Неть мельспутоматне невтить минек раськенть мелензэ, ёжомарямонзо неень эрямонок лангс, содавтыть Эрзя раськенек эрзянь паро тевде, ломаньде, ялгадо.

Мельспаросо, Эрюш Вежай.

01.01.2015.

Просмотров: 175

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования