Uralistica

2015 иень эрзянь тевть. - Дела Эрзя народа в 2015 году.

2015 иень эрзянь тевть

    Эрзят, сась Эрзянь Масторс 2015 иесь. Кандозо сон минек вечкевикс раськентень сэтьме эрямо, раськенек касома, келенек ванстома.

  Секскак лецтясынек, кодат тевть аштить сазь иесэнть эрьва эрзянь ломаненть икеле. Сынь покшт, а шождат. Ансяк содатано, стакачитне изнявить икелев молиця ломанентень, эсь прянь ванстыця раськентень.

Неть тевтне истят:

  1. 2015 иесь – эрзянь келень тонавтома ие. Тонавтодо эрзянь келенк тынсь, тонавтодо эрзянь кельс эсь эйкакшонк, нуцьканк, малавиксэнк.

  2. Чачтнеде эрзянь эйкакшт. Лемдядо эйкакшонк эрзянь лемсэ. Кастодо, трядо сынст эрзянь мельсэ.

  3. Тееде эрзянь раськень вейсэндявкст эрямо велесэнк, ошсонк. Пурнадо эрзятнень вейс. Вейсэ, эрзят, виевтяно! Вейсэ, эрзят, мазыйтяно!

  4. Кундадо эрзянь тевс, совадо эрзянь ломанень вейсэндявксос. Улить содавикст эрзянь вейсэндявкст. Совадо эзэст. Тееде од вейсэндявкст.

  5. Лездадо эрзянь тевтненень превсэнк, вийсэнк, ярмаксонк. Содадо, Эрзя раськесь эряви ансяк эрзятненень. Кирдивиенть пельде лезэсь тенек зярдояк а учови. Сонензэ Эрзя раськесь а эряви.

  6. Лездадо мейсэ машттадо лия эрзятненень, конат ванстыть эрзянь келенть, культуранть, историянть.

  7. Эряви тенек пурнамс-теемс эрзянь од ломанень вейсэндявкс.

  8. Эрямсто-важодемстэ те иестэнтькак тенек эряви кирдемс сеть мельтнень-арсематнень, конат арсевсь 4-це Эрзянь Инекужосонть

     

    Уликс эрзянь вейсэндявкстэ неень иестэнть топавтыть истят содавикст тевть:

     

    - Эрзянь келень идемань Фондось – пурны ярмакт Пургаз Инязоронтень летемрунгос (памятник), коната арсеви стявтомс-путомс Саран ошсо.

    - Эрзянь музеесь арси теме од летемрунгот инее эрзятненень, конат путызь виест-эрямост Эрзя раськенть кис.

    - Пек эрявить эрзянь ломанень вийть-превть, ярмакт, «Эрзянь Мастор» эрзянь кулялопанть нолднемазонзо.

    -«Руця» эрзянь Ярмакпаргось пурны ярмакт «Эрзянь ойме» эрьва иень эрзянь сёрмадоматевень Казнентень, эрзянь ковкерьксэнь нолдамос, кона сы иестэнт алтави «Эрзянь мазыйка» темантень.

    - Эряви поладомс Интернетсэ эрзянь тевтнень, конат невтить Эрзя раськенек историянзо, мазычинзэ, келень сюпавчинзэ.

     

    Эрзят! Кундадо эрзянь тевс, мелявтодо Эрзя раськенк кис. Ансяк вейсэ тенек ванстови Эрзя раськенек! Эрязо Эрзянь Масторось, келемезэ Эрзянь Келесь, касозо Эрзянь Мелесь!

     

    Эрзянь Инекужонь Тевтопавтома Курось.

    2015 ие, якшамков, 2 чистэнть.

Просмотров: 117

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования