Uralistica

Чебоксарыын ортчем семинар сярысь вакчи история

23-тӥ толшоре вазь ӵукна Луша Шиховаен но Лёша Шкляевен вуимы Чебоксарые. Куазь вал туж кезьыт. Автовокзаллэн юртаз пырыса валамы ми картатэк лыктӥмы шуыса, соин ик ум тодӥське вал, кытчы мыныны. Кызьы но озьы, мынам ноутбукысеным интернетэ пырыны WiFi пыр кӧня ке пӧрмытэм оскалтонъёс бере Лёша таксие жингыртӥз но куиньнамы таксиын ветлӥмы Йӧскалык лицее-интернатэ. Со заведениен семинарез радъясьёс кусып возиллям туж дунтэм гостиница радъян понна. Одӥг сутка — 300 манет, а студентъёслы уката ик скидкаен — 150 манет одӥг сутка понна. Мыным сётӥллям инты палата кадь комнатаын, кудаз ог 10 валес вал. Отын луизы, мон сяна, эшшо 3 семинаре пырискисьёс. Палата пырыса ик соосын тодматски. Соос пӧлысь кык — бигеръёс, одӥгез Ильнар — Кузонысь, мукетыз — Рустам — Упоысь. Тунсыко, но Рустамлэн ӟуч кылын вераськемез чик ӧз поты, со ӟуч кылын вазиськись адямиослы бигер кылын вераз вал, соосты паймытыса. Англи кылын юай Рустамлэсь, тодэ-а со ӟуч кылэз, уг-а. Со англи кылын ик вераз «Россиын мон вераськисько бигер но башкир кылъёсын гинэ». Солэн таӵе позициез вал анай кылэз утён понна, дыр. Собере бигер кылэз валасьтэм адямиос соин англи кылын вераськизы. Куинетӥ бускельмы — Анс, Латвиысь Рига карысь. Со анай кылын кадь вераське ӟуч, латыш но латгалец кылъёсын. Со ачиз ӝыныё ӟуч но ӝыныё латгалец. Латгалецъёс — со латышъёслы матын луись Латвиын улӥсь калык. Кылзы латыш кыллы матын, но тросгес Латвиын латыш кыл гинэ кутӥське, соин ик Анс латгалец кылэз утьыны лыктэм. Бускельёсэным тодматскыса валай милемлы бадӟым но кулэлыко уж лэстоно луоз. Дыр луиз Чуваш кун университетэ ветлыны-мыныны, курсъёс 9 часэ ӵукна кутскизы вал.
Универозь сюрес сокем кузь ӧй вал, но нырысетӥ нуналэ милемлы Чеборксарыысь троллейбус маршрутъёсты тодӥллямтэенымы сэрен ог кык иськем пыдын мыноно луиз. Мыныкумы малпай вал Ижозь но вуомы шуыса. Универе пыримы умоен — одӥг но документ юатэк вахтёр милемлы пырыны лэзиз, "Ми семинаре, пе" кылмылы гинэ оскыса. Универлэн терииториез завод кадь заборен забораськемын вал. Солэн шораз вал кулэ "Ж" копрус, кудаз курсъёс ортчизы, а нырысетӥ корпусын, кудӥз пыр ми пыримы — туж умой столовая но буфет. Кӧня меда мон пайми "0 манет 86 коньы" чайлы дунэз адӟыса! Кировам мынам таӵе дунъёсты берпуметӥзэ адӟемелэмь 10 ар ини ортчизы, дыр. Но обед ас дыръяз вал, а ӵукна кутскизы курсъёс. Мукет сиён-юонъёс озьы ик дунтэм но ческыт вал, ваньмызлэсь тросгес кельшиз какао. Котькуд ӵукна собере солы лыктӥ вал.
Ми пыримы "Ж" корпуслэн аудиторияз, кудаз лыктэмын вал трос калык ини, со пӧлысь куинь адямиос — дышетӥсьёсмы. Соос пӧлысь котькудӥз сярысь нимаз кыл верано. Нырысетӥ — тунсыко нимын ог 50 аресъем воргорон, Эктор Алос и Фонт. Со ачиз каталан, но трос дыр ӵоже Россиын улэ. Кышноез но ӟуч кадь. Со кутскон кыл вераз, Россиысь пичи лыдъем калыкъёслэн кылъёссы ласянь югдур туж умой ӧвӧл шуыса, со понна тросмар кароно, пе. Солэн кутскон кылэ бере со Францис Мортон Таерзлы кыл сётиз. Францис — валтӥсь дышетӥсьмы, со Apertium нимаськись программая специалист, соослэн кылдытӥсьёсыз пӧлысь одӥгез. Чапак со программая семинар вал. Франциз сяна дышетӥсьёсмы вал США-ысь Джонатан Норт Вашингтон но Норвегиысь Тронд Тростеруд. Джонатан — тюрк кылъёсъя специалист, со тюрк кылъёсъя лекциосты лыдӟе вал. Тронд, кудзэ мон тодӥсько ини, пуксёнэ гинэ лыктэм. Со — урал кылъёсъя специалист, ваньмызлэсь тросгес саам кылъя кадь ужа. Ми соин Йошкар-Олаын тодматскимы, конференциын, Андрей Чемышев со конференцилэн радъясез вал. Та семинарын Андрей вань адямиослы конференциысь материалъёсын сборникъёсты сётӥз. Тронд но Джонатан тюрк но урал кылъёсъя гинэ лекциосты ортчытӥтзы, а ваньзэ мукетсэ — Францис. Эктор радъясь луыса гинэ ужаз, дышетӥсь луыса кутскон кылэз гинэ лыдӟиз. Али Андрей Чемышевен но комиысь Марина Федина лингвистэн Тронд Коми эклькунын коми кылъя лаборатория кылдытӥллямзы вылэм. Со ик лабораториялэн уж нуэмзыъя Андрей Чемышевен Марина Федина та курсъёсы но лыктӥзы.
Apertium программая пичи лекция бере практика кутскиз. Отын котькудӥзлы пыриськисьлы солэн кыл парезлы вань кулэ файлъёсты лэсьтоно вал. Мынам кыл парае удмурт-ӟуч вал. Лёшаен Лушалэнэз — удмурт-финн. Андрей Чемышев Марина Фединаен коми-пор переводчик лэсьтӥзы. Кыл парлы кулэ вал пӧртэм файлъёс — котькуд кылъя морфология (падежъёс, суффиксъёс но совыллем), фонемаослэн правилооссы, но кык кылъёсты огазеязсь кык кылъем словарь но трансфер (берыктон ӵоже предложениослэн но словосочетаниослэн структураоссэс воштонъёс) правилоос. Со файлъёс дасесь луозы ке — переводчик ужа. Правилоос но кылъёс тросгес ке — переводчик умойгес ужа. Переводчик одӥг текстлы лэсьтыны кулэ вал, кудӥзлэн удмурт версизэ семинар бере Луша дасяз. Ми сяна, отын трос мукет пӧртэм улосъёсысь лыктэм адямиос вал, кудъёсыз ужазы пӧртэм кылъёсъя. Трос вал интыысь чуваш филологъёс.
Мон нырысьсэ удмурт кыллы правилоосты лэсьтыны кутски, Лушаен но Лёшаен ӵош кариськыса. Лэсьтӥмы-лэсьтӥмы, мар ке ужаны кутске вал, милемыз шумпотыса. Дыр луиз ӟуч кыллы марез ке но лэсьтыны. Мон юай, кин-о татын мон сяна ӟуч кыл бордын ужа. Францис вераз отын вань одӥг нылаш, Санкт-Петербургысь Оля. Соин мон нош ик тодматским но ӵошен ужаны кутскимы. Оля Санкт-Петербургын кыӵе ке тунсыко нимын специальностьын дышетске, "Искусствоын прикладной информатика-а" мар-а. Со ачиз ӟуч, соин ик кыкетӥ кылтэк со ӟуч кыл сяна серб кыл бырйиз. "Сое мон коть кӧня ке гинэ но дышетскем, пе." вераз. Ужамы-ужамы, но тросгес вераськимы, серекъямы но мукет адямиосты юрттӥмы — Оляен ми англи кылэз умой тодӥськом, а интыысь чуваш, кылсярысь, лингвистъёс уг тодо, кызьы дышетӥсьёсмы уг тодо ӟуч кылэз. Англи-ӟуч берыктӥсьёс ужамы кӧня ке (а мон уката ик англи-удмурт) Дыр луиз удмурт, серб, ӟуч но вань кылъёслы морфология быдэстыны, но милям ӟуч морфологимы ӝыныезлы но дась ӧй вал. Семинарын быдэс переводчик лэсьтыны уд ваньмы, ваньмыз сярысь вакчияк гинэ. Азьлань мыныны дыр луыкуз Францис серб но ӟуч кылъёслы аслэсьтыз файлъёсты сётӥз. Азьланьын кулэ вал программаосты омономъёсты валэктӥсь коммандаосты гожтыны, кык кылъем словарь гожтыны. Котькуд нунал ортчизы вал лекциос но практикаос, вал одӥг час обедлы одӥг часъем вис но. Кык пол кофе яке чай юонлы ӝыны час висъямын вал, но кӧня ке пол уж вал туж трос но та висъёс ӧй вал. Ӝытазе бертӥмы лицее-интернатэ.
Мар милемыз отын возьмаз? Лицейын вал, нырысь ик, комнатаосмы. Милям (ньыльнамылэн) палата кадь комнатамы вал кыкетӥ этажын, отын вал туж шуныт. Ми улын, нырысетӥ этажын, вал пичи кык интыё комнатаос. Отын вал туж кезьыт, та комнатаосын улӥзы Лёша, Луша но Мускоысь налыш Варя, кудӥз финн-эстон переводчикез лэсьтӥз. Ӝытазе лицее пырыкумы, милемын, Варя сяна вал эшшо но куинь нылъёс: Оля (кудӥныз ӵош мон ӟуч кыл файлъёсъя ужай), Рамиля но Диляра. Соослы нырысь ик кыӵе ке "изоляторын" инты сётӥзы, а собере — кыӵе ке мукет комнатаын. Пиосын палатаямы пырыса валамы милемлы отын туж мӧзмыт луоз бер уйёзь пукыса вераськыны, соин ик ӵектӥмы-малпамы вина басьтыса но сылӥсь буш шкафез бадӟым ӝӧк кадь комнаталэн шораз поныса нылъёсты ӧтьыны. Нылъёс шумпотыса лыктӥзы, валче вераськон но мар ке сиён-юон кутскиз. Вераськыса ӝыт туж шулдыр, кузь дырез шӧдытэк ортчизы. Вань ӝытъёс, кыкетӥ сяна, тазьы ик ортчизы, пумиськыны милемлы ӧз акыльты. Но кыкетӥ ӝытэ Ансмы та ик юртын интыяськись столовое ветлӥз но отын интыысь пичи нылъёсын но пиосын тодматскиз. Интернат — со анай-атайтэк нылпиос понна гинэ дышетскон инты ӧвӧл вылэм, отын дышетско гуртъёсысь нылпиос. Соос туж шулдыресь, соку куинетӥ ӝытэ комнатаямы нылъёсмы сяна, туж возьдаськыса ке но, интыысь нылпиос но лыктӥллям. Соос пӧлысь нылъёс туж чебер ӟуч но чуваш кылъёсын кырӟазы, пиос арганэн шудӥзы, шудӥз арганэн но кырӟас Ансмы но (ӟуч, латыш но латгалец кылъёсын). Ми шумпотыса кылӥмы. Нылпиослы 22 часэ выдоно вал, соин ик соос изьыны выдыны кошкозы вал. Ми нош уйшорозь пукимы, а берпуметӥ уе 2 часэ но 45 минутэ выдӥмы вал, а 5 часэ но 45 минутэ султӥмы — автобусэ мыноно вал.
А со сяна, покчиарнялэн ӝытаз вал фуршет. Туж тунсыко СССР нимаськись кафеын луиз пумиськонмы. Отын ми сиимы пицца, салатъёсты но юимы чай. Интерьерзэ но менюзэ мыным кельшизы. Соик ин семинармы туж умой йылпумъяськиз. Берпуметӥ нуналэ — удмуртарняе ӟуч но чуваш кылъёсын гожтэмын сертификат сётӥзы.

Просмотров: 153

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования