Uralistica

Кемалась ик ӧвӧл Татарстанысь Менделеевск карын бадӟым ужрад ортчиз. Отысь культурая юртэ уно калык  «Тэремшур кускылиос» нимо ансамбльлэсь 10 аресъем юбилейзэ пусъён понна люкаськылӥз. Тэремшур (Енабердино) черкогурт Алнаш ёрос возын ик интыяськемын, отын удмуртъёс уло, Татарстанын лыдъясько ке но. «Тэремшур кускылиос» ансамбле вань классъёсысь дышетскисьёс ветло. Та коллективез кылдытонэ, азинтонэ, калыке поттонын трос кужымзэ, мылкыдзэ сётиз но сётэ Вера Семёновна Степанова.

Уно школаосын нылпи коллективъёс вань. Кудъёсыз ке соос пӧлысь чебер экто, мукетъёсыз вашкала кырӟанъёсыз улӟыто но азинто, кин ке туалазэ дышетэ. Но тросэз ансамбльёс, группаос, трос аръёс чоже тыршыса, шаермылы тодмотэм кылё. «Тэремшур кускылиос» сыӵеосыз пӧлы уг пыро.

Ансамбльлэн юбилеяз быдэс зал тыр калык люкаськиз, трос ӟечкыланъёс, шуныт кылъёс верамын вал. «Тэремшур кускылиосыз» гажамзэс, яратэмзэс черкогуртысьтызы адямиос гинэ ӧз вералэ,  Лулчеберетъя колледжысь В. С. Степановалэн дышетӥсьёсыз В. Ю. Семёновых но С. Г. Спиридонов, ӵош дышетскем эшъёсыз, Менделеевск ёросысь кивалтӥсьёс но вуылӥзы. Соос пӧлысь одӥгез – Константин Геннадьевич Макаров.  Со ик бадӟым инты басьтэ ансамблез кылдытонын. Ӵапак Константин Геннадьевич, Тэремшур шоръёзо школаын директор луыса ужакуз ай, нимысьтыз ансамбль кылдытон сярысь кылпум поттэм, мылкыдзэ шараям.  Со бере ик, 10 ар талэсь азьвыл, Вера Семёновна «Тэремшур кускылиоссэ» бичаз.  

Ансамбль сярысь трос ӟеч, шуныт кылъёс верамын вал. Уноез пусйизы, та коллектив В. С. Степановалэн быгатонлыкъёсыз, мылкыдыз, кутскем ужзэ азьланьтыны тыршемезлы луыса кылдӥз но зол азинске шуыса. Валамон, сюресэз коллективлэн сокем капчи ӧй вал. Шуг-секытъёсыз но пырпотоно луиз, шумпотонъёс но вал. Туннэ нуналлы «Тэремшур кускылиослэн» вормонъёссы ӧжыт овол ни. Россилэн пӧртэм каръёсаз ортчись конкурсъёсы вуылыса (шуом, Казане, Санкт-Петербурге но трос мукет азе), соос асьсэды туж йӧно, чебер возьматылӥзы, призовой интыос октӥзы. Соин соосты асьсэ ёросазы гинэ уг тодо, палэнын но.

Шумпотымон, 10 аресъем юбилеязы «Тэремшур кускылиос» алиосыз но, азьвылъёсыз но люкаськылӥзы, ваньзы ӵош вуэм калыкез шулдыртӥзы. Ансамбль пыр потэмъёс табере дышетско, ужало ни, «Айкай» но мукет коллективъёсын кырӟасьёсыз вань, но огзы но уг вунэто дышетскон, кружоке ветлон аръёссэс, но юбилей нуналэ огазе бичаськизы, дэмен шулдыръяськизы.

 Ортчем концертэз тросйӧслыко (многонациональной) ниманы луоз, малы ке шуоно ӟечкыланы «Тэремшур кускылиосыз» соослэн матысь эшъёссы – поръёслэн «Шӱшпык» но бигеръёслэн «Бигешкей» коллективъёссы вуылӥзы. Соос сяна будӥсь куараослы паськыт сюрес, выль азинсконъёс но вормонъёс сӥзизы «Тэремшур» калык ансамбль, Удмурт кун университетысь «Важнин ключ», Набережные Челны карысь Эшъяськон юртысь коллектив но мукетъёсыз. Концертын чузъяськизы удмурт, ӟуч, бигер, пор кырӟанъёс, эктонъёс. Ӝытэз Виктор Никифоров но Мария Александрова нуизы.

«Тэремшур кускылиосыз» мон кемалась тодӥсько ни. Азьвыл но синмаськылӥ быгатонлыкъёссылы, капчи мылкыдзылы.  Концерт мыныку, паймемысь ӧй дугдылы, кызьы шаермылэн палэнысьтыз удмуртъёс культурамес, кылмес, сям-йылолъёсмес гажало но дунъяло, мукет калыкъёс азьын данъяськыса возьмато. Эшшо туж кельшиз на, «Тэремшур кускылиослэн» сыӵе усто пӧртэм костюмъёссы вылӥллям, мукет дыръя уд но вала! Чиляло, ворекъяло, синъёсыз мальдыто… Нош концертлэн пумаз ке туж тунсыко амал кутэмын вал: ансамбле ветлӥсьёслэсь нимъёссэс одӥген-одӥген ӧз вералэ, апай-вынъёсыз, агай-сузэръёсыз чош нимазы, соос возьматскылӥзы, дэмен эктӥзы. Та пыр валамы, «Тэремшур кускылиосолэн» азязы – кузь но вольыт сюрес. Одӥгъёсыз кошко, мукетъёсыз вуо, нош ансамбль - азинтӥське.  Азинсконъёс но выль вормонъёс тӥледлы, «Тэремшур кускылиос»!  Вить, дас, дас вить, куамын... аръёс ортчыса но, юбилейёсты таӵе ик шулдыр мед ортчозы! 

Просмотров: 218

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования