Uralistica

Нош ик кытысь ке выль кылъёс поттиллям! Одигъёсызлы дышыны ом на вуэ, мукетъёссэ верало ни! Ори, кивалтэт, дугдылонни, кат, чектос… кин соосыз малпа? Радиоез но, телевизорез но тазьы палэнтод. Аслад вордскем кылыд мурт луэ ни!» - одиг пол гинэ таче жожтиськонъёсыз кылыны оз кылды ни. Мойыос сяна, озьы шор арлыдо калыкмы но вера. Кыллэн воштиськонъёсыз секытэн пычало вераськонамы. Валамон, журналистъёс соосыз волмытыны кулэ, амалтэк но верало. Но кин ке юри со кылъёсыз малпа ук!

Кылем гужем Ижкарын, Сыктывкарын, Йошкар-Олаын, Саранскын но Бадачоньтомайын (Венгрия) удыскылъёсын кыллюкамъёс удмурт, коми, пор, эрзя но мокша кылъёсын потизы. Ваньмыз соос терминологической комиссиосын умоен лыдъямын вал. Та бичетъёсыз поттон понна фин-угор улосвылъёс Европалэн Кенешезлэн но Европейской Союзлэн «Национальные меньшинства в России, развитие языков, культуры, СМИ и гражданского общества» программаяз ас чектосэнызы вормизы.

Мар понна со кыллюкамъёс лэсьтэмын? Мадяр тодосчи Янош Пустаи верамъя, кыл улоз но азинскоз соку гинэ, соин ми дорын, школаын – котькытын ке вераським. Соин огъядышетсконъя шоръёзо школаослы удмурт кылын удыскылъёсын кыллюкамъёс пичи дырысен ик пиналъёслы выль кылъёсыз тодыны, дышетыны юрттозы. Соос лэсьтэмын удмурт кылэз школае берыктон понна. Азьланяз, выль удыскылъёсыз кутыса, тунсыко справочникъёс, дышетскисьёс понна портэм сериосын энциклопедиос («Тодэм потэ», «Будосъёс», «Пойшуръёс» но мукет) кылдытыны луоно. Но тужгес валтисез, Удмурт кун университетысь удмурт филология факультетысь декан Л. П. Фёдоровалэн пусъемезъя, «Удмуртилэсь Энциклопедизэ» удмурт кылэ берыктон.

Кыллюкамъёсыз лэсьтонэ пыриськизы Удмурт кун университетысь тодосчиос, дышетисьёс, дышетскисьёс, Кыллэн но литературалэн историзыя институтысь ужасьёс: Л. П. Фёдорова, Н. Н. Тимерханова, О. Б. Стрелкова, В. Л. Шибанов, Н. А. Сергеева, О. А. Тронина, А. В. Егоров.

Ольга Тронина – егит нылаш, Удмурт кун университетысь удмурт филология факультетысь 5-ти курсын дышетскись – мыло-кыдо пыриськиз хими удысысь удыскылъёсыз берыктонэ. Олялэн верамезъя, со пыкиськиз М. Н. Конюховлэн «Зуч-удмурт но удмурт-зуч хими терминъёсын кыллюкамез» вылэ. Озьы ик нылаш пусъе, солэн ужаз тросгес терминъёс берыктэмын шуыса. «Кыллюкамез дасякумы, куд-ог калыккуспо кылъёсыз чик ом йотылэ, кыче вань кельтим. Куд-ог терминъёсыз 2 вариантэн сётим (автокатализ – аскуашкатон; ангидридъёс – вутэк кылемъёс). Мукетъёсыз борды удмурт суффиксъёс ватсамын (изомеръёс, фунгицидъёс). Трос кылъёс кылдизы таче амалъя: зуч кыл + удмурт кыл (буферлыко сылметъёс, кристалло ву).

Россиын огъя дышетскон кыл – зуч. Берпумети аръёсы куд-ог курсъёс англи кылын мыныны кутскизы. Озьыен, кунын улись калыкъёслэн ас вордскем кылзы ужын, портэм удысъёсын кулэ уг луы. Соин ик трос оръёсын удыскылъёсмы овол. Компьютер, арт-форум, промо-акция… Валамон, таче калыккуспо кылъёслы берыктон кулэ овол. Но зучысь тросэз кылъёс озьы пыремын, кылпумыз гинэ «удмуртомытэмын». Куд-огез зол пелез вандэ.

Удмурт кун университетысь удмурт филология факультетысь деканлэн Л. П. Фёдоровалэн верамезъя, кыллэсь азинскемзэ выль валатонъёстэк, терминъёстэк син шоры пуктыны уг луы. Угось кылдись явлениос, усьтиськись арбериос кулэ котькуд кылэ пычаны. Азинскытэк, ог интыысьтыз вырзытэк, будытэк, адями но уг улы, будос но, пойшур но. Кылэн озьы ик. Со улонлэн азьланьтиськемезлэсь (прогресс) палэнэ кыльыны уг быгаты. Удыскылъёс (терминъёс) сярысь тодос мерлыко шуг-секытъёсын нюръяськыны кулэ, нырысь ик портэм удысъёсысь ужасьёс вискын кылдись валантэмъёсты быдтонын.

Виктор Шибанов лэсьтиз физика удысысь нимкылъёсын кыллюкам. Тодосчи вера: «Та малпан нырысь мыным туж ик оз яра, но валай, берыктон борды кутсконо ни, пичиысен котькуд уж потэ шуыса. Мынам малпамея, троссэ калыккуспо кылъёсыз берыктоно овол, дыр (электрон, нейтрон, протон но мукет). Но туж секыт учыр кылдэ кылъёсын но кылтэчетъёсын, кудъёсыз соосын кутисько. Нырысети вамыш, кудиз бордын мон кема курадзи, Архимедлэн катэз вал. Собере уж калленэн интыысьтыз вырзиз. Трос удыскылъёс суффиксъёс но кылъёс ватсаса кылдизы. Удмурт суффиксъёс быгато кызьы зуч, озьы ик калыккуспо терминъёс борды «лякиськыны», кылсярысь коэрцитивная сила – коэрцито кужым, сферическая – сфераё но мукет. Ужлэн мукетыз вамышез – одиг терминъёслэсь портэм удысъёсысь (физика, химия, информатика…) валатонъёссэс чошатон. Уж кутскемын. Сое нуо тодосчиос, озьы ик студентъёс. Оскиськом, ваньмыз пормоз».

Удмурт кылын татчыозь портэм удысъёсысь туж ожыт терминъёс кутиськизы. Нош азьвыл, 1920-ти – 30-ти аръёсы, школаын вань предметъёс анай кылын мыно вылэм. 1950-ти аръёсы, дышетскон система быдэсак зуч кылэ выжемен, трос удыскылъёс но выль кылдытэм кылъёс быро.

«Политикаын но лулчеберетын воштиськонъёс зол пычало вераськон кылэ. Литературной кыл азинскемен, тодосъя выль удыскылъёс кылдо. Литературной кыллэсь азинскемзэ чакласа, синйылтоно, XVIII-XIX-ти дауръёсы оскон литератураысь кылъёс, терминъёс удмуртэ (но мукет кылъёсы) берыктэмын вылиллям шуыса. Научной удыскылъёс кылдылизы XIX-ХХ-ти дауръёсы, со герзаськемын анай кылынымы дышетскон книгаос потэмен. Соосыз гожтизы И. Михеев, И. Яковлев, Я. Ильин, С. Жуйков, Д. Корепанов (Кедра Митрей). Выль кылъёс но терминъёс кылдытонын тужгес бадзым саклык висъяны кулэ 1920-ти-30-ти но 1990-ти-2008-ти аръёслы»,- пусъе Л. П. Фёдорова.-«Со бордын бадзым уж нуиз Кузебай Герд. И. Тараканов профессорлэн лыдъямезъя, Герд 300 пала удыскылъёс малпаз, соос полысь тросэз удмурт кыламы мур пычазы».

1995-ти арын Удмурт Элькунысь Кун Кенешлэн но Правительство Президиумлэн удмурт кылъя «Шаерысьтымы термино-орфографической комиссия сярысь» Постановленизы кутэмын. Со луонлык сётиз:

-выль удыскылъёсын кыллюкамъёс кылдытыны;

-выль нимкылъёс малпаны;

-азьвыл но выль кылдытэм нимкылъёсыз азинтыны, тодосын кутыны.

«1990-ти – 2000-ти аръёсы портэм удысъёсъя 2 кылъем терминъёсын кыллюкамъёс пото. Жаляса верано, татчыозь удмурт кылын удыскылъёс катъёсын юнматэмын овол на», - мылкыдзэ усьтэ Любовь Петровна. Но азьланьтэ: «Валамон, выль кылъёс юнматозь, дыр ортчыны кулэ».

Александр Егоров берыктиз информатика удысысь кылъёсыз. «Кыллюкамез кылдытыку, ми учкимы «vkontakte» сайтлэсь интерфейсэзлэсь берыктонзэ, трос удыскылъёсмы кылдизы суффиксъёсыз но кылъёсыз ватсаса. Пусъёно, куд-огезлы удмурт кылын валатонъёс оз шеде. Озьы ке но, вань берыктымтэ кылъёс калыккуспоос полы пыро, соос зуче но англи яке мукет кылысь асэстэмын. Соин ик, мон малпасько, тачеоссэ берыктытэк но кельтыны яра. Та кыллюкамысь материал быгатоз портэм удмурт сайтъёсыз, удмурт кылын социальной вотэсъёсыз («ВКонтакте», «Одноклассники»-лэн типезъя) кылдытонын юрттыны. Со сяна, соосыз пыртыны луоз Microsoft программаез берыктонэ».

Любовь Фёдоровалэн верамезъя, удмурт литератураын интернационализмъёс тырмыт: гротеск, дискурс, сонет, структурализм но мукет. Со алама овол. Та кылъёс понна узырме анай кылмы. Кин тодэ, оло, азьланяз со кылъёслэн берыктонзы кылдоз? Вань кылъёслэн, терминъёслэн кылдэмзы ми понна валантэм ук. Тодосчиос полын та ласянь портэм малпанъёс уло, соиз яке таиз шонер – нокин вераны уз быгаты. Дунне вылын кылъёс (языки) туж уно, нош кызьы меда вашкала дыръёсы адямиос ог-огенызы кусып возьыны дышизы? Кызьы ог-огзэс валазы? Кин тодэ, оло, чапак асьсэос кылъёсыз малпано луизы? 1920-ти - 1930-ти аръёсы малпам кылъёс калыклэн вераськоназ юнматозь, трос дыр ортчиз. Али чем кутиськись «верос», «Элькун» но уно мукет кылъёс зэмос удмурт, кемалась кылдытэм кадь пото ни. Но куке чужанай-чужатайёсмы соосыз оз валалэ но оз вералэ на, дыр. Али анай-атайёслы, дышетскисьёслы, егитъёслы валано та выль удыскылъёслэн кылдэмзылэсь мугзэс. Чапак удмурт калык киын удмурт кыллэн азьланез.

Просмотров: 146

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования