Uralistica

Туэ Удмурт кылъя гужем курсъёсы пӧртэм кунъёсысь 5 егитъёс вуизы. Одӥгез соос пӧлысь – Австриысь Кристиан Пишлёгер – Ижкаре куинетӥзэ лыктӥз но оске, берпуметӥзэ ӧз шуыса.

 

- Кристиан, тон азьвыл но удмурт кылэз дышетӥд-а яке нырысетӥзэ сыӵе муген шаерамы лыктӥд?

- Удмурт кылэз мон дышетӥ Венаысь университетын Финноугроведение специальностея. Соку ик ӟуч сямен но вераськыны кутски. Удмурт кылысь кушето каронкылъёс (кырӟаса пукисько, дыртыса ветлӥсько) сярысь диплом ужме гожъякум ик, Ижкаре вуылӥ, 1998-тӥ но 2001-тӥ аръёсы. Немец кылын та темая нырысетӥ уж вал со.

- Удмурт кылэз сокем мур эскериськод бере, малы тыныд Удмурт кун университетын радъяськись курсъёс кулэ на?

- Жаляса верано, мон 12 ар ӵоже мукет удысын ужай, удмуртэз вунэтӥ. 5 ар Венгриын немец кылэз но австрийской литератураез нуи, 1 ар Финляндиын докторской диссертация гожъяй, Венаысь аэропортын тырши. Ӟуч кыл Австриын кулэ луыны быгатэ, нош удмурт сямен нокинэн вераськыны. Но али выльысь мылкыды ӝутскиз сое тодэ вайыны. ВКонтактеысь адӟи «Удмурт кыл котькуд нунал» нимо группаез. Со ӟучъёс понна дасяське. Соку малпай, малы сое мукет кылъёсын но лэсьтонтэм меда, шуом, немец, англи сямен? Та уж борды басьтӥськыны мыным юрттӥзы Ольга Урасинова, Алексей Шкляев но одӥг венгер эше, но лэсьтӥсько мон сое Facebook-ын. Нырысь ВКонтактеысь кылъёсыз берыктыны кутски. Мае ке уг валаськы ке – удмурт эшъёсы юртто. Муш Нади туспуктэмъёс ысъя.

- Озьыен, ужед мынэ. Кызьы малпаськод, удмурт кылэн тунсыкъяськисьёслэн лыдзы будэ-а?

- Уж мынэ. Группаме немец кылын гинэ нырысь лэсьтӥсько вал, нимыз «Jeden Tag Udmurtisch“ («Котькуд нунал удмурт кыл»). Но немец кылэз ваньзы уг тодо бере, эшъёсы но тодмоосы куремен, англи кылын но лэсьтыны кутски. Но со анай кылы ӧвӧл, соин куддыръя туж секыт кулэ кылъёс, валэктонъёс гожтыны. Шумпотисько, группа улэп, пырасьёсыз но комментарийёсыз трос. Озьыен, ӟеч уж нуисько.

- Азьланяз астэ удмурт кылэн герӟаны малпаськод-а?

- Малпасько. Ваньмыз пӧрмиз ке, улонэ проектме пыӵато но Удмурт кун университетын немец кылэз дышето. Проектэлэн бадӟым ужпумеӟ тодэме потэ, кыӵе инты басьто социальной сетьёс удмурт кыллэн статусаз. Азьвыл гуртъёсын пересьёс соин верасько вал, нош городын егитъёс ӟучомылӥзы. Туннэ нуналлы, мон малпамъя, югдур воштӥськемын. Ижкарысь егитъёс туж тыршо анай кылзэс поттыны, азинтыны. Малпасько, ВКонтакте, Facebook, Twitter но мукет социальной сетьёс бадӟым уж лэсьто.

 

Озьыен, возьмалом Кристианэз.

 

Туспуктэмез Ирина Зангариклэн

Просмотров: 336

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Shkljaev Aleksej, Август 8, 2012 в 8:40am

умой ужа

Комментарий от: Ortem, Август 7, 2012 в 7:39pm

зарни адями

Комментарий от: Oli, Август 7, 2012 в 2:03pm

 ӟечок!

Комментарий от: Niimshur, Август 7, 2012 в 1:53pm

kualjisjko – pörmoz: pishmyny = gelingen in de. ))

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования