Uralistica

«Нош удмуртъёс вань на-а мар-а?»

Удмурт филология факультетысь немец кылъя люкетын дышетскемелы луыса, мон тыршисько Германиысь, Австриысь, Швейцариысь Ижкаре вуись куноосын вераськыны, кунсьӧр кыл тодонме волятыны. Тани кылем арняе но Сыктывкарысь нимысьтыз «Сӥзьыл академия» семинаре вуэм егитъёсын пумиськон понна бертӥ.


«Сӥзьыл но тулыс академиос» - Германиысь Роберт Бош нимо фондлэн одӥгез бадӟым проектэз. Вераны кулэ, немецъёс берпуметӥ аръёсы тужгес но сюлмаськыны кутскизы вордскем кылзэс мукет кунъёсысь пӧртэм калыкъёс пӧлы пыӵатон понна. Озьы кылдӥзы уно проектъёс: кунсьӧр студентъёслы Германиын радъяськись немец кылъя курсъёс, пӧртэм магистр программаос, школаысь дышетскисьёслы экскурсиос… Дышетсконлы, сиёнлы, сюрес вылэ быдтэм уксёез немецъёс ӵемысь быдэсак берыкто.
Нош Роберт Бош нимо фондлэн кӧня ке мукет ужпумез. Со пыр Германиысь егитъёс вуыло пӧртэм кунъёсы но дышето отысь студентъёсыз яке школаын дышетскисьёсыз немец кыллы. Ижкарын лекторъёс 8-тӥ арзэ тыршо ни (но соос котькуд ар яке кык ар ортчыса вошъясько). «Сӥзьыл но тулыс академия» нимо семинаръёсын немец кылъя егит дышетӥсьёс кунсьӧр кылъёсыз дышетонъя методикаен матысьгес тодматско (вераны кулэ, Роберт Бош фондлэн лекторъёсыз чик педагогической образованитэк дышетыны быгато), выль дидактической материалъёсыз учко, ог-огенызы тодматско но шуг-секытъёссэс сэртто-пертчо.


Ижкарын таӵе семинар нырысетӥзэ радъяськиз. Мон пайми огвакытэ сомында кунсьӧрысь егитъёсыз университетамы адӟыса. 50 пала пӧртэм тусо, ӝуждалаё, куд-огез чик дышетӥсьлы кельшисьтэм 24-30 аресъемъёс арня ӵоже Удмурт кун университетысь Кунсьӧр кылъёсъя но литературая институтысь студентъёсын тодматскизы, пумиськонъёс ортчытъязы, Ижкартӥ поръязы, Лудорвае вуылӥзы.
Мыным шуд усиз соосын кафеын пукыны, матысьгес тодматскыны но вераськыны. Тунсыко, котькудӥз вуэм егитъёс пӧлысь ӧжытсэ 4 кыл тодэ шуыса. Озьы ӝыт куспын немец кыл пыр кӧня ке китай иероглифъёсыз но тодӥ. Огез немец аслаз юанэныз паймытӥз: «Нош удмуртъёс вань на-а мар-а? Мон кожасько вал, Россиын ӟучъёс но бигеръёс уло». Мукетызлы тунсыко потӥз, кыӵе асьме калык сярысь стереотипъёс вань. Паймизы, «пельнянь» кыл перм выжыысь шуыса.


Пумиськонмы туж пайдаё ортчиз. Удмуртиысь но Германиысь егитъёс, дышетскон системаос, мерлыко огазеяськонъёс, пӧртэм калыкъёслэн диаспораоссы, кылъёсмылэн диалектъёссы сярысь вераськимы, трос выльзэ тодӥмы. Таӵе ӟеч ужрад ортчытэмзы понна бадӟым тау карем потэ Кунсьӧр кылъёсъя но литературая институтысь дышетӥсьёслы, тужгес но – Наталия Павловна Мерзляковалы. Палэнысь вуэм куноосыз пумитаны, интыяны, визаен лэсьтонэн кылдӥсь шуг-секытъёсыз сэрттыны-пертчыны ваньзы уз дӥсьтэ, нош соослэн ужасьёссы номырлэсь уг кышкало, ялан выль кусыпъёс юнмато.


Лена РЯБИНА

Просмотров: 113

Комментарий

Вы должны быть участником Uralistica, чтобы добавлять комментарии!

Вступить в Uralistica

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования