Uralistica

Беромыса ке но, вакчияк гожтӥсько Россиысь фин-угор калыкъёслэн ассоциацизылэн Саранскын ортчем 5-тӥ съездэз сярысь.

Мордовилэн шоркараз – Саранскын – 26-тӥ-28-тӥ сентябре кунысьтымы фин-угор калыкъёслэн ассоциацизылэн (АФУН РФ) V съездэз ортчиз.

Та съездлэн темаез вал «Россиысь фин-угор калыкъёс но трос калыкъем кунмылэсь огсыр улонзэ (стабильностьсэ) утён».

Нырысь ик вань люкаськемъёс буре вайизы элькунысьтымы нациосын ужан политикая министрез Владимир Завалинэз – со вал Россиысь фин-угор калыкъёслэн ассоциацизылэн ёзчиез.

Нырысетӥ нуналаз ик быръемын вал Президиум, отчы пыриз 8 мурт.

 Удмуртъёс пӧлысь Президиуме пыртӥзы «Удмурт Кенеш» ассоциацилэн Ижкарысь Индустриал ёрос ёзэтэныз кивалтӥсь Любовь Зайцеваез.

Съездэ люкаськемъёслы ӟечбуръяськон кылъёссэс ыстӥллям Россилэн Президентэз Владимир Путин, Россиысь Федерал Собраниысь Федерацилэн Кенешезлэн Председателез Валентина Матвиенко, Россиысь улосвылэз азинтонъя министр Игорь Слюняев, Россиысь калыкъёслэн ассамблеязы но трос мукетъёсыз.

- Россиысь фин-угоръёс юртто странамылы азинскыны, соослэн ужъёссы культураын, политикаын, экономикаын но мукет удысъёсын ушъямонэсь, - вераз Россиысь Президент Администрацилэн кивалтӥсезлэн воштӥсез Магомедсалам Магомедов но сӥзиз вань люкаськемъёслы ӟеч ужъёс но азинсконъёс.

4 ар ужамезлы йылпумъян лэсьтӥз Россиысь фин-угор калыкъёслэн ассоциацизылэн тӧроез Пётр Тултаев.

Пётр Тултаев 

Ӧтчамлэн кыкетӥ нуналаз ужазы 4 секциос.

«Кыл. Тодос. Дышетон» секциын 23 доклад лыдӟемын вал. Пӧртэм фин-угор улосъёсысь дышетӥсьёс, гожъяськисьёс, кылзы понна сюлмаськисьёс кенешыса резолюцие пыртыны ӵектӥзы таӵе куронъёссэс: Россиысь Наукаосъя академилэсь улосъёсысь филиалъёссэ утёно, ингерманландской финъёсыз пичи калыкъёс пӧлы пыртоно, АФУН-лэсь тодос удысын премизэ кылдытоно но мукет.

«Культура. Литература. Туала информационной технологиос» секциен кивалтӥсьёс пӧлын вал «Мынам Удмуртие» телерадиокомпаниысь национальной передачаосъя редакторлэн воштӥсез Сергей Касаткин. Со вераз:

- Милям секциямы кызьлэсь уно делегатъёс пыриськизы, эскеримы культура, литература но СМИ удысъёсысь тужгес лэчыт ужпумъёсты. Али тросэзлэн телевидениез цифровой, нош отын ӧвӧл одӥг но пичи калыклэн каналэз. Тыршоно улосвыл каналъёсыз но цифровой карыны. Мукетыз лэчыт ужпум - фин-угор калыкъёслэн вӧсь лудъёссы. Туннэ нуналлы соос трос лыдъясько, но соосты нокин уг чакла-уг утялты. Та борды но рос-прос басьтӥськоно.

Секцилэн та но мукет ӵектонъёсыз пыртэмын вал съездлэн резолюцияз.

«Тазалык. Демография. Семья» секциын целевой программаос сярысь вераськизы, фин-угор калыкъёслэн семьяоссы, азьвыл аръёсын ӵошатоно ке, пичигес но пичигес кылё шуыса, пусйизы. Резолюцие пыртыны ӵектэмын вал таӵе вазиськонъёсыз: спортысь йӧскалык удысъёслы тросгес саклык висъяно, пиналъёсты асьсэ выжыосынызы тунсыкъяськытоно но мукетсэ.

Тужгес лэчыт ужпумъёс ӝутэмын вал егитъёслэн шуг-секытъёссылы сӥзем «Глобализация. Идентичность. Традиция» котырес ӝӧкын. Отчы вуылӥз 80 пала мурт. Фин-угор егитъёслэн ассоциацизылэн вице-президентэз Василий Немечкин фин-угор калыкъёс пӧлын кыл, дышетон, семья удысъёслы сӥзем докладзэ лыдӟиз, собере Ленинград улосысь Ксения Каневская кӧня ке гинэ кылем ижораослэн улэмзы сярысь мадиз. Ӵапак соослэн шуг-секытъёссы (ӧвӧл тупась уж но улон инты, калык культураезлэсь палэнске) бордысен кутскизы лэчыт вераськонъёс. Пусйыны кулэ: котырес ӝӧке егитъёслэсь тросгес вуизы мӧйыос. Кин ке соос пӧлысь тодаз вайиз комсомол вакытэ будэмзэ, мукетыз ӵектӥз егитъёслы, доразы берытскыса, куашкась колхозъёсты ӝутыны но нылпиоссэс, ас калыксы пӧлын вордскем кылынызы вераськытыса, будэтыны. Мӧйыослэсь туала егитъёс вылэ ӝожтӥськемзэс кылзэмзы бере котырес ӝӧклэн кыкетӥ люкетаз егитъёс пӧлысь 3-4 мурт гинэ на вуиз. 


АФУН-лэн Кенешаз удмуртъёс пӧлысь шедизы «Мынам Удмуртие» телерадиокомпаниысь национальной передачаосъя редакторлэн воштӥсез Сергей Касаткин, Удмурт кун университетысь удмурт филология факультетлэн деканэз Наталья Кондратьева, «Удмурт Кенеш» ассоциацилэн президентэз Игорь Семёнов но Удмуртиысь Правительстволэн воштӥсез Николай Мусалимов. Нош Президиуме пыризы Игорь Семёнов (кыл кутэ кивалтон ёзъёсын кусып возён понна), Николай Мусалимов (калыккуспо огазеяськонъёсын ужан) но Сергей Касаткин (ивор вӧлмытон). Ассоциациен матысь 4 арзэ нош ик кивалтоз Мордовиысь Пётр Тултаев.

Съезд пумысен куд-ог малпанъёс:

Игорь Семёнов, "Удмурт Кенеш" ассоциацилэн кивалтӥсез:

- Азьвыл аръёсы фин-угор калыкъёс съездэ лыкто но ӝожтӥсько вал: милям таиз ужмы уг лэсьтӥськы, соиз уг мыны... Таяз ӧтчамын тросэз калыкъёс веразы вормонъёссы сярысь. Со син шоры йӧтӥз но шумпоттӥз. Шумпоттӥз анай кылъя югдур но - тросэзлэн фин-угор калыкъёслэн со азинтӥське.

Наталья Кондратьева, Удмурт кун университетысь удмурт филология факультетлэн деканэз:

- Мон малпасько, та выллем съездъёс туж кулэ, отын вераськонъёс гинэ луо ке но (проблемаосыз отын ум сэрттӥське). Шуг-секытъёсыз но шараяно, мед соосыз кылозы. Со сяна, та выллем ужрадъёс возьмато, фин-угоръёс ужало шуыса, огазе люкаськонъёс соослы азинскыны юртто. Таӵе ужрадъёсын шаеред шоры палэнысен учкыны быгатӥськод: кыӵе инты басьто мукет калыкъёс, кызьы азинске тынад калыкед. Вератэк уг луы выль тодматсконъёс сярысь (мукет улосъёсысь адямиосын но, аслад делегациеныд но) - кыӵе соос юртто проектъёсыз улонэ пыӵатыку!

Делегация дасяку, чаклано делегатъёслэсь арлыдзэс но кыӵе удысын тыршемзэс: мед пӧлазы луозы егитъёс но, шоро-куспо арлыдъемъёс но, мӧйыос но, мед луоз соосты пӧртэм удысъёслы сӥзем секциосъя люкылыны. Милям та ласянь делегацимы туж умой быръемын вал, нош куд-ог улосъёс со юанлы саклык висъяллямтэ. Со сяна, лыдэ басьтэмын ӧй вал, пичи калыкъёслэн, кудъёсызлэн ӧвӧл шаерзы, кылзы кун кылэн уг лыдъяськы, но выжы калыкъёслэн шуг-секытъёссы пӧртэмесь шуыса. Азьланяз, оло, нырысь вань калыкъёслы котырес ӝӧк сьӧры ӵошен люкаськоно, нош собере нимаз ужано? Озьы пайдаез тросгес луысал, дыр.

Пыр-почгес та съезд сярысь лыдӟыны луоз "Удмурт дунне" газетлэн "Герд" приложениысьтыз (со потоз ӵуказе, 8-тӥ октябре).

Просмотров: 427

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Ortem, Октябрь 10, 2013 в 12:53am

валасько, тыныд пайдаё вал шуыса) тэкшеронъёс шоры учконо ке, кызьы-о соосты дунъясалыд? соглаш-а тон монэн, со выллем форумъёсын нокыче выль юанъёсты уг пукто шуыса?

Комментарий от: Albert Agzam, Октябрь 9, 2013 в 8:52am

Татар теленә охшаш. Күп нәрсә тәрҗемәсез аңлашыла.

Комментарий от: Лена Рябина, Октябрь 9, 2013 в 8:30am

кинлы кызьы, дыр, Артём. Мон егитъёслы сӥзем котырес ӝӧкын выльзэ но тунсыкозэ А. Цыкаревлэн докладысьтыз гинэ кылӥ. Образованилы сӥзем секциын 2 доклад кылзӥ, кыказ но ӝожтӥськизы, кылзы быре шуыса. Резолюцие вань ӵектонъёс ӧз пыре (но тужгес кулэосыз пыртэмын вал). Соин ик, учком ини, мар пӧрмоз. 

Мон понна бадӟым пайда луиз выль эшъёс шедьтон, фин-угор журналистъёсын тодматскон, асьме удмурт азьветлӥсьёсын кусып тупатон)

Комментарий от: Ortem, Октябрь 9, 2013 в 12:57am

пайдаё-а ортчиз, Ленӥ?

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования