Uralistica

Мон - XXI-тӥ даурын улӥсь. Дуннеез котыръяны яратӥсько, кунсьӧр кылъёсыз дышетӥсько, туала техникаен эшъяськисько. Тунсыкъяськисько историен - семьяелэн историеныз но огъя странамылэн, тужгес но - Быдӟым Атыкай ожен - но бадӟым мылкыдын дышетӥсько немец кылэз.
 

***

Куд-огез пайме:  Быдӟым Атыкай ож сярысь книгаос лыдӟыса, ожмаськемъёслэн тодэ ваёнъёсынызы тодматскыса, кызьы быгатӥсько на немец кылэн тунсыкъяськыны? Вераны кулэ, та предметэз школаын ӧй яраты: песятае но ӵемысь оже бырем атайзэ тодаз вайылӥз, сое виисьёсты адӟемпотостэм кариз, кылъя дышетӥсе но чик ӧз кельшы. Одӥг учыр ваньзэ йырчукин берыктӥз.

Школаын дышетскыкум ай, "Ӟечбур!" газетлэн конкурсаз вормыса, шуд усиз вуылыны Венгрие, Балатон ты дуре интыяськем лагере. Милемын огвакытэ отын шутэтскизы Австриысь пиналъёс. 5-тӥ классысен немец кылэз дышетыса, дӥсьтӥ ик нылъёслы немец сямен вазиськыны. Огкыл ӧм шедьтэ: соос ӧз валалэ монэ, мон ӧй вала соосыз, ӝожоми (уг на тодӥськы вал угось, Австриын немец кыллэн диалектэз литературной кыллэсь зол висъяське шуыса). Соку ик ачим азе ужпум пуктӥ - кылъёсыз дышетоно. 

Школаез йылпумъяса, пыри Удмурт кун университетысь удмурт филология факультетэ, немец ёзэтэ. Яратӥ та кылэз, нош 3-тӥ курс бере дышетскон программая Германие потаны быгатӥ. Кыӵе та кун, отын улӥсьёс висъясько вылэм асьме дорын соос сярысь кылдэм стериотипъёслэсь! Толэзь ӵоже капчи мылкыдо, вазиськись, юрттыны дась адямиосын пумиськылӥ. Куд-огеныз али но ӟеч кусыпъёс возисько.

***

Быдӟым Атыкай ожен тунсыкъяськыны кутски вазенгес,  7-тӥ классын. Гожтӥськи шаертодонъя  кружоке. Кивалтӥсе, Н. А. Новгородцева, "Мынам родословное" темая ужаны ӵектӥз. Та ужелэсь бадӟым люкетсэ мон интые мамае лэсьтӥз, мон вӧзаз пуки, кылзи, солэсь малпамъёссэ-верамъёссэ гожъяй. Но соку ик войнаысь бертымтэ пересь песятае - Алнаш ёросысь Шадрасак-Кибья гуртысь Гаврил Иванович Рябин - но пересь ӵужатае - Кияса ёросысь Уддяди гуртысь Фёдор Александрович Бронников - сярысь тодэме потӥз. Буре ваён Книга рос-прос валэктон ӧз сёты: песятае быриз Украинаын, ватэмын Запорожьеын. Ӵужатае, пе, 1942-тӥ арын феврале чиптэм-чаптэм ышиз.

Мон пӧртэм архивъёсы гожтэтъёс лэзьяй, тросгес ивор тодыны тыршыса. Пересь песятаелэсь ватэм интызэ адӟыны уз ни кылды, дыр: Пришиб хутор (нош Буре ваён Книгаын со Пришно гожтэмын, янгышен) кемалась ӧвӧл ни, пе, отысь калык бускель гуртъёсы но городъёсы кошкылэмын, хуторысь братской могилаез нокин уг чакла. Украинаысь поисковикъёслэн верамзыя, сое жуг-жаг но куакъёс пӧлысь шедьтыны али туж секыт луоз.

Бронниковъёслэн семьязы. Нырысетӥ радын бур палаз - пересь ӵужанае. Кыкетӥ радысь паллянысез - пересь ӵужатае. 

1934-тӥ ар, 30-тӥ толсур.

Пересь ӵужатае сярысь 71 ар ӵоже номыр тодмо ӧй вал. Запросъёсылы Литваысь (ӵапак отысь войналэн кутсконаз со келям берпуметӥ гожтэтсэ), Белоруссиысь, Украинаысь, Латвиысь, Германиысь валэктонъёс вуизы, ӵужатае сярысь нокыӵе ивор ӧвӧл шуыса. Кылем сӥзьыл гинэ тодӥ: со Германиысь одӥгаз концлагерьын бырем. Отын ик ватэмын Удмуртиысь трос мукет солдатъёс, пӧлазы - Уддядиысь ик воргорон но, пересь ӵужатайме 1941-тӥ арын март толэзе соин ӵош нюлэс коранэ шуыса нуиллям. Оэрбке концлагерьын быремъёс - тросэз война кутскытозь яке вайналэн нырысетӥ нуналъёсаз мобилизовать каремъёс, со сярысь тодӥ концлагерьлэн историысьтыз. Жаль, Германие ветлытозям та иворез ӧй басьты - соку ик пересь ӵужатаелэн ватэм интыяз вуылыны тыршысал. Азьланяз кылдӥз ке Оэрбкее ветлыны, туртто документъёсын тодматскыны, коть маке но пересь ӵужатаелэн быремез сярысь тодыны - талы немец кылъя тодон-валанъёсы тырмыны кулэ кадь.
***

Тодӥськом: Быдӟым ожын уно миллион адями быриз. Асьмелэнъёс но, тушмонъёс но. Но ваньзы соос - адямиос. Кудӥзлэн меда улэмез уг поты вал? Кудӥзлэн ӧй вал льӧль малпанъёсыз тупаса улон сярысь? Ӧз сётэ улыны. Пересь песятае быриз 40 аресаз, пересь ӵужатае - 31-ын. Тросэзлы пиослы со вакытэ 20 аресозь но улыны ӧз кылды. Макем дуно усем Быдӟым Вормон!

Но вунэтоно ӧвӧл, тушмонъёс но адямиос шуыса. Ожмаськем немецъёслэн туж потэ вал меда войнае пыриськемзы? Книгаоссэс лыдӟыса, нокыӵе пӧртэмлыксэ уг адӟиськы асьме странаямы улэмъёслэсь но Германиысь калыклэсь (кивалтӥсьёс сярысь уг вераськы, огшоры адямиосыз). Соослэн но ӧз тырмы сиёнзы, отысь но нылпиос будӥзы анай-атайёстэк, соослэсь но страназэс тарказы. Мыным шонертэм потэ, кивалтэтлэн янгышъёсыз понна быдэс нациез, быдэс калыкез янгыше уськыто ке.

Кӧня егитъёс быро, кӧняез соос пӧлысь чиптэм-чаптэм ышо! Быдӟым Вормонлы ӝоген 69 ар тырмоз ни, нош со оже пыриськемъёс пӧлысь тросэз сярысь номыр тодмо ӧвӧл. Поисковикъёс арлы быдэ быремъёслэсь шӧйёссэс (останки) поттало. Кӧня соос луозы на - тодмо ӧвӧл (озьыен, тодмо ӧвӧл на, кӧня адями со ожын быриз).

Концлагерьёсын быремъёслы синпелет. Хинцерт концлагерьлы сӥзем музей вӧзын. Германия.

Алигес "Мынам Удмуртие" телерадиокомпаниын ивор вал, Удмуртиын вордскем но 1942-тӥ арын Смоленск улосысь Слободской ёросысь Шиши гуртысь госпитальын сӧсырмыса  бырем солдатъёсыз шедьтӥзы шуыса (http://www.myudm.ru/node/46913). Соос пӧлын:

Плетнев Федор Петрович (Сюмси ёрос),

Стерхов Сергей Яковлевич (Ижевск ёрос), 

Урсегов Илья Сергеевич (Понино ёрос),

Балабанов Василий Яковлевич (Грак ёрос), 

Ильин Василий Ильич (Локатышна гурт), 

Мохов Николай Васильевич (Талый Ключ гурт),

Петров Александр Никифорович (Б. Норья гурт), 

Ушаков Павел Яковлевич (Пудем ёрос), 

Юшков Александр Афанасьевич (Камбарка ёрос).

Оло, соос пӧлын тӥляд ӵыжы-выжыосты вань? Вазиське! Солдатлэн ватэм интыяз ветлыны ӧд пӧрме ке но, базаын бырем солдат ӵыжы-выжытэм  медаз лыдъяськы - со улонзэ сётиз тӥ понна!

***
Та темая малпаськыкум, син азям пуксё ветеранъёс: войнаез пырпотэмъёс, уно кулонъёсыз ад
ӟемъёс, сютэм кыллемъёс - зэмос вормисьёс (войнаез но, секыт тодэ ваёнъёссэс но). Дан соослы но юн тазалык! Но соку ик малпасько ӵужанай-ӵужатайме, нэнэй-песятайме. Соос - война вакытэ будэмъёс, "ож нылпиос", странаямы сыӵеос ӧжыт ӧвӧл. Фронтэ вуылытэк но, соос адӟизы уно сӧсырмемъёсыз, кулонъёсыз, чидазы сютэм улонэз но вормонтэм секыт ужез. Анай-песятайёссы нюлэс кораку, соос доразы юрттӥськизы, вань кужмынызы тыршизы вормонэз матэктыны. Но али соос сярысь сюлмаськисьёс ӧвӧл. Пичи дыръязы атайтэк будэмъёс, номыр ӟечсэ адӟымтэос, соос али но нокыӵе юрттэт уг басьто. Вормон нуналэ но соос доры ӧжытэз, дыр, пыра, тазалыксы сярысь юа. Нош пересьёс понна саклык  - бадӟым шумпотон. Туж жаль пото "война нылпиос".

Секыт кылзыны ч:ужанаелэсь - Валентина Фёдоровна Бигбашевалэсь - пичи дырысьтыз тодэ ваёнъёссэ:

- Война вакытэ но со бере анайме шер адзылӥ - со нюлэс погыръяз, доре ӵем бертылэмез ӧз лу. Мон песяеным-песятаеным кылли. Тодӥсько на, кызьы кезьытын кынмыса, гур вылэ тубыса, куиньнамы кӧлаллям. Нош кызьы улӥзы нюлэсэз погыръясьёс, сюрес лэсьтӥсьёс? Векчи куэм дэрем пыр тӧл потэ, дукес зол уг шунты, кезьытлэсь пыдъёс борды кутъёс лякисько но кынмо, малы ке шуоно соосыз куасьтыны нокытын вал, кезьытлэсь пиньёс висё-усьыло. Пиньёс гинэ ке... Анае верамъя, кӧлазы соос эстымтэ баракын, - тодаз вае ӵужанае.

Озьы ик солэн йыраз кылем, кызьы огпол пересь Лена ӵужанае ужамез понна нянь басьтэм, нош со няньзэ чебер сьӧд кышетлэн ньыльмосэзлы воштэм - соку сое шедьтыны уг луы вылэм.

Осконтэм пото тылпоттон но сылал сярысь верамъёс:

- Война вакытэ туж секыт вал кыӵе ке товар шедьтыны, тужгес но - тылпоттон но сылал. Песятае, чакма шуккыса, тыл поттылӥз, нош песяе вӧзаз, чаг кутыса, возьмалляз. Гуртын кин ке эстӥське ке, солэсь эгырзэ нуо вал. Ӝуась эгырез уйлы пенен шобыръямы ӵукна выльысь кенжытон вылысь. Со пенез йыр висьытозь пелляллям, - вера ӵужанае. - Озьы ик война вакытэ быриз сылал. Тросэз, сылалтӥськемъёслэн бервылъёсынызы вышкыоссэс кораса, позьтылӥзы. Сыӵе улонэз адӟемъёс ож бере сылал но, тылпоттон но басьтыса возизы (запас).

***
Отечественной война (1812) бырем дырысен туэ 202 ар тырме, Нырысетӥ мировой война (1914-1918) кутскем дырысен - 100 ар, Быдӟым Атыкай ож кутскемысен (1941-1945) - 73, Афган ож (1979-1989) йылпумъяськемысен - 25 ар, Чечняе войскоосыз пыртэм дырысен (1994) - 20 ар. Со сяна, вир кисьтонъёс вал Уйпал Осетиын, Грузиын, Чечняын но мукет кунъёсын. Кӧня янгыштэм муртъёс отын улонъёссэс ыштӥзы? Валазы меда, кин понна, мар понна? Али тани (21-тӥ даурын!) Украинаын секыт югдур кылдэмын. История уг дышеты вылэм. Туж кышкыт. Нош ик-а вылӥ муртъёслэн валантэм вамышъёсынызы йырин юнме кисьтӥськоз вир?

 

Просмотров: 352

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Лена Рябина, Март 5, 2014 в 3:28pm

адями приказэз быдэстыны кулэ, со понна со приказ.

кылкутон пумысен. война сярысь книгаосыз лыдзыку, куддыр паймоно солдатъёслэн малпаськемзылы: мыным косизы, мон быдэстисько гинэ, соин ик мон янгыш овол. мон малпамъя, приказ понна солдат янгыш овол, куке быръёнэз овол. нош куке адями приказэз быдэстэ, аслэсьтыз фантазизэ кутыса, соку ини со вылэ но лэсьтэм ужез понна кылкутон мынэ.

Комментарий от: Ortem, Март 4, 2014 в 3:31pm

приказ быдэстон понна адями кыл кутыны кулэ-а?

кытысен адямилэн кылкутонэз кутске? но кытын солэн пумыз?

Комментарий от: Лена Рябина, Март 4, 2014 в 12:19pm

сьось куронъёсты быдэстизы кызьы асьмелэнъёс, озьы ик тушмонъёс. приказ.

алигес та пумысен вераськи эшеным. со вераз кылем даурын Америкаын ортчытэм эксперимент сярысь (шедьти ке со иворез, ысто ай ссылка). отын адямиос 5-6 доллар понна мукет адямиосыз вийылиллям.

Комментарий от: Ortem, Март 4, 2014 в 11:57am

Мыным шонертэм потэ, кивалтэтлэн янгышъёсыз понна быдэс нациез, быдэс калыкез янгыше уськыто ке.

мон соглаш тонэн, но со дыре ик, малы соос таче сьось куронъёсты быдэстиллям? куд-ог верамъёсъя, тросэз мыло-кыдо сьось йыртэманъёсы пыриськилиллям, вирлэн зыныз йырсазьзэс сурам.

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования