Uralistica

"Дуннеез адӟон котьмалэсь тросгес дышетэ. Куддыръя палэнын ортчытэм 1 нунал дорын улэм 10 ар мында сётэ", шуэм француз гожъяськись Анатоль Франс. Соин споръяськыны секыт: сюрес вылэ потыса, зэм но, уно интыосыз адӟиськод, выль тодмоос но эшъёс шедьтӥськод, трос тунсыкозэ тодӥськод. Трос тунсыкозэ дунне котыръямез сярысь вераз Алнаш ёросысь Варзибаш гуртын вордскем Игорь Загибалов но.

Кун сьӧры потан сярысь малпанъёс Игорь доры школаын дышетскыкуз лыктӥзы, куке солэн агаез Ижысь гурт удысъя академиын тодон-валан люказ. Алёша пӧртэм кунъёсы вуылэм но отын ужам, дышетскем эшъёсыз сярысь трос мадиз. Игорьлэн со соку ик йыраз кылиз, соку ик кылдӥз лемлет малпанэз но – Европаез адӟыны (тужгес вуылэмез потӥз Швейцарие).

Школаез йылпумъяса, Игорь агаезлэн пытьыостӥз вамыштэ – пыре Ижысь гурт удысъя академие, электрификация факультетэ. Нош 3-тӥ курс бере малпанэз быдэсме – студент шонтэ Швейцарие, фермер дорын практика ортчыны.

- Зэмзэ вераса, вуыса, берен бертэме потӥз. Ми лыктӥм гинэ, ял карын ӧз сётэ, соку ик киямы ужан тӥрлыкъёссэс мычизы. Бер ӝытозь тыршим. Дорын сыӵе кема дугдылытэк ужаме ӧй на вал, дыр! - тодаз вае Игорь. - Но бӧрысь дышим. Нырысь валантэм потӥз, кызьы швейцаръёс шутэтскон нуналъёсы, ужзы трос ке но, палэнто соосыз но ваньзы ял каро, кытчы ке потало, ог-огзылы дырзэс висъяло. Собере таизлы но дышиськиз.

Игорьлэн но кӧня ке дырыз вал матысь каръёсы но кунъёсы вуылыны. Озьы со тодматскиз Цюрих, Люцерн но Берн швейцар городъёсын но потаз Германиысь Боденской ты дуре, Майнау шормуӵе, Руст каре.

Таин пияшлэн кунгож сьӧры сюресэз ӧз ворсаськы. Вылӥ образование басьтыса, со армие мынӥз, Калининградэ шедиз. Вож форма сётэмзы бере Игорь туж ӝожомиз, угось солэн бадӟым мылкыдыз вал моряк луыса службазэ нуыны, корабльёсын уяны но, кызьы тодӥськом ини, котыр дуннеен тодматскыны. Нош вож форма сётэм бере со малпаз, казармалэсь ар ӵоже кыдёке кошкемез уз луы. Кыӵе котыр дунне! Калининградэз адӟид ке, шумпотод ни. Но солдат пумтэм шудо вал, куке лыдӟиз приказэз, зарезе потэ шуыса. Ӵош служить карись эшъёсызлы ваньмызлы сыӵе ӧз удалты.

Африкаысь кӧня ке кунъёсы вуылозы шуыса, Игорьлэн малпанэз но ӧй вал. Соин Огазеям Араб Эмиратъёсы, Султанат Оманэ, Сейшельской шормуӵъёсы, Кение но Мальтае дугдылэмзылы верантэм шумпотӥз.

- Котькуд кун ас сяменыз тунсыко но паймымон, - вера Игорь. – Но мыным тужгес кельшиз Мальта аспӧртэм юртъёсыныз, ульчаысь «улэп» крезьгуреныз: котькытын крезьгурчиос шудо, мылкыдэз буйгато. Отын паймымон архитектура, со историе, азьвыл дауръёсы вуттэ кадь. Нош калык туж ӟеч, вазиськись. Жаль потӥзы Кениын улӥсьёс. Соос туж куанересь, урамъёсын уно кураськисьёс. Сюлэм тужгес но шымырске, куке пӧлысьтызы трос пичи нылпиос шоры учкиськод. Соос 4-5 аресазы ик сютэм улонэз адӟо ни, солы дышо, - вера Игорь Загибалов.

Алигес со берытскиз армиысь но дышетскемезъя уже интыяськиз.

- Мон чик уг жаляськы, служить кари шуыса. Ку сомында тунсыкозэ адӟысал ай, кытысь ӟеч эшъёс шедьтысал? – шуэ Игорь. - Родинаез утьыны пӧртэм сямен луэ. Со одно ик казармаын улонэн но дедовщинаен герӟаськемын уг луы. Казармаын ке но улӥд, ку сыӵеез луоз на? Ваньзэ эскероно, утчано, ваньмызлэсь дунзэ валано.

Дуннеез котыръяны пияшлэн мылкыдыз ӧз пуксьы на. Выль лемлет малпанъёсыз вань ни, кудъёссэ азьланяз быдэстыны тыршоз. 7 пол кылэм интые, 1 пол адӟы, шуо – тае Игорь умой валаз ни.

Просмотров: 681

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Ortem, Апрель 23, 2014 в 12:05am

удмурт флот Африкаын!

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования