Uralistica

Куля «Руця» Ярмакпаргонть пельде.

«Руця» эрзянь культурань ванстома-кирдема Ярмакпаргось ушодсь кочкамо эрзянь кинигат ды сёрмадовкст, конат кармить ванкшновомо 2015 иень Эрзя раськень сёрмадоматевень Казнес.

Эрзянь сёрмадоматевень Казнень макснемась ушодовсь тедиде, 2014 иестэ, чадыковонь 16 чистэнть. Те чистэнть (Эрзя раськенть ютазь эрямопингестэнзэ ВАСЕНЦЕДЕ!) Казнетне ды Арневкстэ максозельть истяня:

Арневкссэ (диплом) ды сисемень-сисемень тёжань целковоень Шнамоказнесэ казезельть:

 - Журавлёв Числав, «Пингень цецине» валморонзо кис,

-  Подгорнова Алина, «Тюштя» валморонзо кис.

Арневкссэ ды кемень тёжань целковоень Прявтказнесэ казезель:

- Боляень Сыресь, «Оймень пшкадема» валморонзо кис.

 

Сы иестэнть кармить ванкшновомо эрзянь кельсэ сёрмадозь кинигатне ды сёрмадовкстнэ, конат нолдазельть сельмс 2013-2014 иетнестэ.

Эрзят, ялгат. Эсь меленк кинигатнеде ды шкиневкстнэде, конат тынк меленк коряс маштовить ванкшновомо Эрзя раськень сёрмадоматевень Казнес, кучодо тей: erush2002@mail/ru эли путодо «Эрзянь вал» кортнема И-курос те куляпутовксонть ало.

Те шкантень «Руця»-с совазь ломантне редизь вана неть кинигатнень ды сёрмадовкстнэнь: Маризь Кемалень «Масторов нолдасынек сюкпрянок» (кинига, Саран ош, 2013 ие), Боляень Сыресень «Ратор чиресэ….» валморонть, (путозь «Эрзянь вал» И-кортнемакурос, 2014 ие), Нуянь Видязонь «Тесэ ды Тосо» (кинига, Саран ош, 2013 ие).

Учотано од мельть тынк пельде, вечкевикс ловныцят, кодат од сёрмадовкст саемс мелезэнек Казненть анокстамсто.

Казнесь карми максовомо Саран ошсо Эрзянь келень Чистэнть. Ули мель Эрзя раськень сёрмадоматевень Казненть лемдямонзо «Эрзянь Ойме». Учотано тень коряс, эрзят, тынк меленк, кода эрзянь Казненть лемдямонзо?

Казнентень анокстатано колмо Арневкст (Дипломт): Прявтказненть кис ды кавто Шнамоказнеть.

Казнетнес пурнатано ярмакт сеть эрзятнень ды эрзя раськень ялганок пельде, кить чарькодьсызь те эрзянь тевенть ине питнензэ, кить вечксызь эрзянь келенть ды эрзянь сёрмадоматевенть-литературанть. Кинь ули мелезэ лездамс те тевентень, пшкадеде тенек, ёвтасынек, кода «Руця»-с ютавтомс ярмакт.

 Арсеманок зярс истят: Прявтказнекс пурнамс 10000 целковойть, Шнамоказнес – сисемень-сисемень тёжат целковойть. Содазь, ярмактнэ а покшт. Муевить ва седе ламо ярмаконь каицят, нама, сестэ покшолгавтовить Казнетнеяк.

Эрзят! Топавтсынек те тевенть вейсэ! Невтьсынек Эрзя раськенть сёрмадоматевс маштыця таланов ломаненек! Какдык сынст виев сёрмадовкстнэ совить эрьва эрзянь кудос, кармить эрьва эрзянь ломанень кедьсэ.

Истя минь тейтяно паро, покш тев эрзянь келенек ванстомга.

Эрюш Вежай, «Руця» Ярмакпаргонь тевветиесь.

Просмотров: 84

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования