Uralistica

Эрзянь каштомо. - Эрзянская печка.

                                                                           

  ЭРЗЯНЬ КАШТОМО

   Мон а чарькодян сеть ломантнень, конат лемдить сонзэ «русская печка». Ванкшнынь кинигасто, вешнынь Интернетстэ… Те каштомось ульнесь ансяк сеть таркатнева, косо эрясть рузыявтомадо икеле ансяк эрзят. Секскак лован сонзэ ансяк эрзянь каштомокс. Сонензэ истя ванькс эрзякс меремка – каштомо, каштом, лиякс – уштома. Рузыязь эрзянь велесэ тензэ мерильть «пецька».

Сондензэ  лецтни Кията эрзянь цёрынесь….

  Каштомось – эрзянь кудо юртонть, эрзянь кудонть – куншказо. Каштомовтомо эрзянь кудось аволь кудояк, ансяк утом, утомо, «удомс» валстонть.

А стяко эрзятне кемильть Каштомавас. А стяко эрзятне тешкстнильть Од толонь Чинтькак. Каштомось – Толонь кудо. Ули эрзянь кудосонть Тол – карми эрзятненень лембеяк, тол валдояк, шумбра кшияк, шумбрачияк. Толось эриль Каштомсо. Секскак те шкас эрзятне кортыть: -« Толонть пувик…. - Толонть мадстик… Толонть совавтык…. Толонть ливтик….» Каштом толсто кирвазтнильть чевкст, зярдо арасель уськевиень тол. Каштом толсто кирвазтнильть штатолт….

  Каштомонь ванстыцясь эрзянь кудотнесэ ульнесь эрзянь авась, кодо азоравась. Сон вансь каштомсо толонть мельга. Ванстсь сонзэ. Вень перть а весть стякшныль варчамонзо, улить-арасть кулов потсо ченгиця тонолнэть, иляст маде пиже валскес, зярдо сыре авась стиль каштомонь уштомо.

Эрзянь кудотнесэ сон, каштомось,  аштиль азоравакс. Сонзэ путнильть удалць кудосо, совамо кенкшстэнть, кодак соват, керш ёно. Ваныль икелев, ушов ваныця вальматнес. Те а стяко. Вальматнестэ прыль валдось, секскак парсте неявильть томба лангоськак, вишкеземеськак.

  Теезель калязь якстере кирьпецьстэ ды ашо сёвонь ведьсэ ашолгавтозь. Вить ёнксканзо  аравтозь келей чалгамо, кона лездыль куземе каштом лангов. Чалгамонть велькска – 3-4 каштом варинеть-печуркат, косо костильть варьгат. Кодак соват, каясыть начко варьгатнень, ды сеск сынст чошк! тонгсыть лембе каштомварятнес. Сынь тосо курокке коськить!

 Каштом лангось! Те эрзянь кудосонть пародо паро, лембеде лембе, ёндо ён тарка! Седе пек тельня. Кельмат, начкат, тарькс стардтанзат… Соват кудос, каясыть оршамкат, варьгатнень тонгсыть каштом варинетнес, ды сеск, ёрокс, кузят каштом лангс… Кодамо лембе тосо! Ацазь кодамояк тёшак, кенде, эли ревень кедь, весе вельтязь ванькс вельтявкссо. Тонгсыть кельме кедь лапушкат подонть видьс – ды сек лембесь юты верь сангат ды эждясынзе кедеть-пильгеть, весе рунгот…

  Турбанть томбальде, каштом кургостонть тантейстэ качады капста эли сараз ямсо, шумбра кшисэ… Тосто маряви сыряванть котьмамонзо гайтькеть: - Клянцьк-клянцьк…  Тыж…   Жоль…. Плеськ… Кальцьк…

 Ёвкс! Аволь эрямояк! Ансяк ламо иень ютазь чарькодьсак се ине паронть, конань эсь а неявикс тевсэст казильть тенек сыряванок-покштянок, конань алкуксонь лемезэ – эрзянь ломанень уцяска….

Сундергадомас Киятанень эряви керямс пенгть каштомонь уштомас. Кото-сисем иестэ саезь те тевесь ульнесь эрзянь цёрынень. Пенге тарадтнэ ульнесть удалць ортатнень томбале, вельтязельть-валязельть ловсо, ульнесть ловшушмо потсо. Пенге оровтонть икелель эчке мукорь. Эряви керямс оровт пенгть, костёрсто саемс ором лазнозь пенгеде ды кандомс сынст кудос, каштом икелев. Начко пенгтнень Федай сырявазо путылинзе чокшнэ каштомос, вень перть сынь лембе каштомосонть седе парсте коськильть, валске, уштомсто, сынь седе парсте сыремить.

 Чокшнэ ланга каштом лангсо пурнавилть сырькаенть карязонзо удало весе нуцькатне. Пельсчоподасонть сырявась ёвтниль эрзянь ёвкст: ёжов ривезькадо, пеляза нумолкайде, тюрьган атякшто, инязоронь тейтерьде ды цёрадо… А редяткак, кода удомась сайттянзат-вельтятанзат ды конявтсынзе сизезь сельме кереть…  Каштом лангсонть кодамояк пелема а сайттянзат. Пек паро кекшема таркась. Сырькаесь мерекшныль, келя, сонсь идемевсесь-шайтяноськак паро эйкакшонь каштом лангсто а мусы….

    Секскак, зярдо телень чокшнэтнестэ покштнэ ковгак тукшныльть, ды кудось чамокшныль, ды мик марявсть, кода та-косо вишка чувто лазксо цирьнильть кудо цирькунтнэ, Кията пачк кузиль каштом лангс, ды ансяк шкань-шкань варштныль чопода вальматнес, конатнесэ липниль керасинэнь лампа толнэсь…. Та-кие Киятанень мериксэль, келя, те сляникасонть аволь толнэтькак мик липнить, те келя, сонсь идемевсенть якстере сельмензэ вень чоподанть пачк неявить. Ды ялатеке, идемевсесь каштом лангс а совави, сонсь Каштомавась кашомонть идемевсте ваны. Секскак Кията каштомонть лангсто эзь валгонеяк мики покштнэнь кудос совамозост…

Валске каштом икеле пивтьсь-эвтьсь Федай сырявсь. Ансяк мезезэ сонзэ каштом икеле арасель… Кичкере, чентязь, коцькерьганось, конань эйстэ та-мек пелильть каткаськак, Киятаяк… Капочувт-ухватт, песчувт, чугунт, вакант, левштапот… Каштомонь кедьёнкстнэ кирдевильть каштомонть ало каськасо, косо эрясь каткаськак… Улема, лембе тензэ тосо ульнесь.

  Чопода томба лангсонть, каштомонь кургосонть, учость эсь шкаст каштомс путомадо икеле ямт, кашат, саразтнэнень – вишка модамарьть. Курок ва каштомось яви уштомадо мейле, ды те карми весе пидевеме-паневеме…

     Нама, сехте паро читне улнесть сеть, зярдо сырявась паниль кшеть ды пачалксеть. Кода тантейстэ качадыть ансяк панезь пачалксетне! Сырявась васня ваднилизе пачалгонть потмо ойсэ, мейле толгасо вадяштылизе скал ойсэ ды мейле покш пенчсэ каиль пачалгонтень пачалксе вецана чапаксонть…. Пачалксетнень пансь кавто пачалго лангсо. Вейкенть аноксты, омбоцесь – каштомсо. Истя кавксть седе курок пачалксетне паневить. Ды сеск сынст стуворонть лангс, косо вакансо – велькс ды симемвакансо – паро ловсо…Навасак пси пачалксенть ламбамо вельксэс, ды сеск кргозот! Тансть! Расть! Келетькак ва нильсак!....

    Вана истямо покшто покш питнезэ эрзянь каштомонть ульнесь эрьва эрзянь кудосонть. Сюконямот теть, эрзянь каштомо!

Эрюш Вежай

25.11.2014. Полярной ош.

Просмотров: 322

Эта запись блога закрыта для комментариев

Комментарий от: Erush Vezhai, Ноябрь 27, 2014 в 9:59am

Кузоват, Кижеват, Инжеват, Беговат - эрзянь цёраломанень лемть.

Комментарий от: Erush Vezhai, Ноябрь 27, 2014 в 9:58am

печь в доме Сивковой Анны Петровны из Села Беговатово Нижегородской области.Село Беговатово расположено в 19 км на юго-запад от г.Арзамаса.

Комментарий от: Erush Vezhai, Ноябрь 27, 2014 в 8:56am

Кодамо тантей эрзянь пачалксесь…

Кодамо тантей эрзянь пачалксесь…
Кода качады ансяк педязь ловсось,
Кодамо лембе панезь прякинесь,
Кодат ламбамот авань сюкоронзо…
Лембе варьгатне тонгозь кедезэть,
Лембе кудось, конасонть ават-тетят,
Тия ялгат мартот кепе чийнесть,
Тесэ пильгинеть модас-масторс  чалгасть…
Кодат тесэ валдот валскеть,
Кодат тердицят опаня чокшнэтне,
Тов, косо рангить веньперть атёкшкеть,
Тов, кува ойметь ливти менель верьга…
Бути чарькодик ойметь мелявксонть,
Бути ванстат седейсэть тиринь авать чаманть,
Сестэ иля стувто эрзянь келенть!
Иля мие эсь Эрзя раськень лементь!

Эрюш Вежай.

Комментарий от: Erush Vezhai, Ноябрь 27, 2014 в 8:55am

КАШТОМ, БОЯРАВИНЕ, КАШТОМ, АЗОРАВИНЕ…

 Лембе каштом ланго. Сон ледстямсто превезэть сеске
сы седикелень эрямось, велесь, покштятне-сырькайтне. Седееть китордозеви,
рунговат юты лембе зыйть. Цят якшамоне, зярдо косояк кельмсят-тарькстнят,
маряви: эрямосонть каштом лангодо паро мезеяк арась. А стяко кудосо каштомось
ашти сехте неявикс таркасо. Ашо, теке пор пандо. Сон андтанзаткак,
эждятанзаткак, ёжоткак витьсы. Секскак кортыть: «Каштомось – тиринь аванок».
Тень кувалма каштомонть марто сюлмавозь эрзянь пек ламо койть-кирдат. Саемс
свадьбань коенть, зярдо одирьвань кудос совамсто кудатне васня токшилизь лембе
каштомонть – те невтсь паро мелест-бажамост. Фатасо копачазь одирьванть
совавтылизь каштом икелев ды кудавась ушодыль урнеме:

 Вай, каштом, бояравинем,

Вай, каштом, азоравинем,

Вай, пиди-пани ялгинем

Вай, стряпаиця оинем,

Васолдо ванозь, лов пандат,

Маласто ванозь пор пандат.

Вай, качамот нолдык тон верьга,

А псинеть ливтик тон алга.

Ужо велявтан-чаравтан

Мон Нишкепазонть ней пелев,

Мон Верепазонть икелев.

Вай, течинь чине эдь да

Сизьгемень сисем чачиця,

Сизьгемень сисем кулыця,

Сизьгемень сисем кудораськестэ туиця,

Лия раськес молиця.

Иляк сёрмадо, Нишкепаз,

Иляк сёрмадо чачи юткс,

Иляк сёрмадо кулы юткс.

Тон сёрмадыка, Нишкепаз,

Тетядо-авадо явицякс,

 Омбо раськес туицякс…

 

Каштомонть сюлмсить ёвкстнэнь мартояк: рузонь, эрзянь – ялатеке. Ёвксонь Емелянть вечкевикс тарказо - каштом лангось. Колоньгемень колмо иеть аштесь-лужалесь каштом лангсо Илья Муромец богатыресь – вийть пурнась. Лия ёвкссонть верьгизэнть эйстэ сеялевкстнэнь тагояк идинзе каштомось.

Каштомонть вельде минек покштянок-сырькаенек озность толонтень, толонь Пазонтень:

 

Толонь паз, толонь покш,

Толонь паз, налки паз,

Толонь паз, чары паз!

Вармавтомо тон налкат,

Кошткевтеме тон чарат.

Ламо виеть тонь, валот.

Ламо лезэть ды парот,

Тонь вийнесэть, валнэсэть

И пидетяно, и пантяно,

Якшамодо а пельтяно.

Покштянок-сырькаенек кемсть: се кудонтень, косо лавсьсэ уды потяка эйде, каштомонь трубаванть оймень саеме совсить ведунт. Секскак чачомстонзо саезь, кото таргонь перть эйкакшонть ванстасть апаро вийде: томбалангонь пизынесэ куловонть потс азоравась ёвкстыль пеель.  Седикелень ёвтамотнень коряс, кудонь кирди Юртаваськак «эри» каштомонть ало. Цирькунтнэяк цикныть тесэ. Каштомонть ало каська кургоськак. Сёксестэ саезь каськасо ванстовить эмежть: модамарть,чурькат ды лият-мезть. Каштомось кази од эрямо – аватне чачтнильть каштлангсо. Сонзэ пси кевтнень (кирьпецтнень) лангсо сэредицятне-резыцятне пансесть ормаст.

 

Каштомось пурнылизе кудораськенть вейс.
Телень якшамо чокшнетнень свал ютавтнесть лембе каштом лангсо. Морасть лужаня
морот, чулгонесть чиньжарамот, сырькайтне ёвтнесть нуцькатненень ёвкст. Каштом
икеле аватне кодасть цюлкат, варьгат, викшнесть панарт-руцят, цёратне кодасть
карть, керсесть чувто ланга. Вечкилизь каштомонть сыренек-однэк. Сон кельмиль
ансяк кудоюртонть кадомадо мейле.

 

Каштомонть лезэзэ покш неень шкастояк.


Сон уштови пенгсэ, торфсо ды газсо. Сехте парт пенгтне. Кирвазтьксэкс килеень
пенгестэ човинестэ лазновить чевкст эли ваткавить гигерть. Пенгетне, бути
начкт, вачкамат каштом кияксонтень каршо чокшнестэнть – кенерест коськеме.

Вачкамс истя: кавто цюркат путома карадо-каршо, лангозост трокс-трокс - таго кавто цюркат, сынст лангс – эштё ниле-вете. Сисемшка рядт теема, лисьмань срубокс лисезэ. Алост сыремтемат чевкстнэ. Кирвазтемадост икеле васняяк панжови трубань кенкшкесь, потстонзо таргави кшнинь пачалгось: качамось лисезэ аволь кудос – трубаванть ушов. Явамодо мейле трубанть пекстама ансяк зярыя шкань ютазь – а иредемс. Каштомо кургонтькак пекстамс кшнинь лазсо (заслонсо) – лембесь каштомсо аштезэ ды эждезэ кудопотмонть. Куловтне мейле нардавить томбалангонь кавто ёнга пизынетнева, потсост кирдсть палыця-липниця уголият. Сынст пек ванстасть, секс мекс пицькатне (паряк, пицемс, пидемс валтнэстэ) питнеельть, а весенень рамавильть. Шабранень ченярдыця уголиятнень азоравась макснесь  ансяк мекев велявтомга-пандомга.

 

Седикеле трубат арасельть, секс уштомсто качамось лисиль кудопотс.   Тень эйстэ потолоконь лазтнэ ды стенань чочктне вельтявильть тусто содсо, конань аватне коцькерилизь-шлилизь Инечиде икеле. Виде, качамонть лисемга стенас пелильть вишка варине, кона уштомадо мейле лембень кирдемга потомдавиль нуласо. Кой-кить неть варинетненьгак эзть пельне, секскак весе качамось кадовиль кудос. Кизэнь шкасто ве сеськеяк а совиль. Тараканткак, кендялткак арасельть. Чочкотне коптямодонть эзть наксале, теевильть седеяк нардевекс.

Крепостной шкасто трубасто лисиця качамонть кис сайсть покш каявкс. Арась труба – качамояк арась. Секс кажовсто эрицятне качамонть «нильнесть» комсеце пингес. Ансяк сестэ кудотнень пряс ушодсть стявтнеме чувтонь трубат. Виде, лезэсь эйстэст аламоль: лембесь эзгаст туиль, толонь кондямо псиденть чувтонь лазтнэ калявильть. Тень кувалма ламо кудот палсть. Седе сюпав ломантне кемголмово-кемнилее пингетнестэ уш вачксесть кирьпецень трубат.

Превеельть покштянок-сырькаенек, содасть, кона чувтось максы лембе, кона качамо. Пичень пенгетнеде лембеськак аламо, качамоськак байтяк, паломстост уголиятне ливтнесть-пукштяесть эрьва ёнга. Секскак анокстасть килеень, поень ды лепень пенгеть.

Каштомсо пансть кши, прякат, пачалксеть, пидесть ямт, кашат, модамарть, парясть дураккуярт, пуштасть алт, костясть оршамопельть-карсемапельть, анокстасть кудоракшанень ярсамопель, эждясть ведь. Скалонь вазыямодо мейле топоськак пидевиль каштомсо. Каштомовтомо а кодаль ютавтомс свадьбаяк, ильтямс ломаненть меельце киланговгак. Каштлангсо кирдсть-якавтсть пуренть, конаньстэ нолдыльть ченьксэнть. Каштомось банянь таркаскак ульнесь: явамодо мейле урядылизь седтнень-куловтнень, каштомкияксонть ваньксстэ тенсилизь, ацылизь олгосо, путыльть пси ведь чугун. Шлицясь-парицясь совиль каштомонтень, мадиль олготнень лангс - прязо томбалангонть ёнов. Каштомо менелентень пургильть лакавтозь тикше ведь эли поза, ды адя килеень тенстьсэ рунгонть ланга «киштеме». Те коське псись – шумбрачинь максыця-казиця.

Кшинь панемстэ каштом кияксстонть седтнень айгшесызь каштом лазонть малас. Трубанть кеменьшка минутас пекстнесызь. Зярдо каштом потмось пек псистэ эжи, седтнень нардасызь пизынес.
Чапаксонть чувтонь коймесэ туронь-туро озавтнесызь пси каштом кияксканть. Часошкань ютазь тантей, судоварянь куцтиця чинесь пачти – кшись анок. Таргсема,шляма, ладсема  каштом икеле эземга ды вельтяма ванькс коцтсо эли нардамосо. Ней – ярсак, эжнек. Кие куш весть варчнинзе каштомсо панезь кшинть, прякатнень, пачалксетнень, пидезь чапамо ловсонть, ямонть, кашанть (келеть сэвемстэст нильсак!), се зярдояк а стувтсы сынст танстест.

 

 Ансяк а содави, мекс каштомось, кода лия тевтне-валтнэяк, лемдезь рузонь каштомокс – «русская печь». Каня сон эжди-анды ансяк рузтнэнь? Каштомонть эрямопингезэ, учёнойтнень ловомаст коряс, ушодовсь ламо тёжат иеде икеле, кевень пингестэ саезь, зярдо ломанесь васенцеде ёвкстызе толонть каштомо менеленть алов…

 

                                                                                Н. Родионова.

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования