Uralistica

Эрзянь цёрань пряспутомка. - Головной убор мужчин народа Эрзя.

Эрзянь цёрань пряспутомка.

Кувать вешнынь, кодат ульнесть эрзянь цёратнень пряспутомкатне? Косояк сынь тень эзть вастовкшно. Эрзянь аваньсетнеде минь парсте содатано. Сынь парсте ванстовсть. Неень шкатнестэяк аватне эйсэст  тейнить ды кандтнить.

А вана кодамо ульнесь эрзянь цёрансесь, эрзянь цёрань пряспутомкась Теде а сёрмадовкст, а лецтнемат, а ванмот-фотот… Теке арасельтькак сынь. Теке марто, сынь ульнесть. Кода сынстемест минек аволь пек лембе Эрзянь Масторсонок? Нама, сынь ульнесть!

Ансяк кодат сынь ульнесть? Кодамо неявксост-парцуност сынст ульнесь? Койсэм, сынь ульнесть телень, ульнесть сёксень-тундонь (экше шкань), ульнесть кизэнь. Теленсетне, нама, ульнесть понав кедень, лембеть. К.Абрамов «Пургаз» кезэрень пингеде ёвтамосонзо сёрмадсь кендень чапкадо. Теке марто, кодат сынь ульнесть, седе кияк зярс эзь сёрмале.

Койсэм, сынь ульнесть кодаткак лият лия раськенсетнень коряс, ульнесть аволь истят, кодат ульнесть шабра раськетнень, аволь истят, кодат ульнесть печказтнэнь, ветькетнень, мокшотнень, рузтнэнь. Мекс истя арсян? Вана мекс: эрзянь весе оршамотне пек явить неть раськетнень оршамотнестэ. Секскак, койсэм, явильть эйстэст эрзянь цёрань пряспутомкатнеяк.

    Нама, телень пряспутомкасонть эрявить пилеть. Кодат сынь ульнесть? Кувакат? Нурькинеть? Теинеть? Келейть? Кие соды… Ульнесь-арась коняксост (козырёк)? Ульнесть-арасельть пиле ведьмест? Эли путовильть повнэс, сюлгамос?

 Кодат ульнесть кендень пряспутомкатне? Вейке кенде панкссто теезельть? Эли зярыясто? Ульнесть сынь конякс марто, эли конякстомо? Ульнесть лапштанят, эли сэрейть? Кие соды?

Мезе путнесть прязост эрзятне кизна, пси шкане, сестэ, зярдо эзь пачкоде тенст фабрикасо сустазь картузось?

Ульнесть-арасельть умонь шкане кедьсэ кодазь пряспутомкат, истят, кодат ней кандтнить од ломантне? Койсэм, эрзянь аватне пек кедьсуров кодыцят ульнесть. Сестэ мезе, вейкеяк эрзянь сырявинень пряс эзь сакшно мелесь кодамс мирденстэнзэ, цёранстэнзэ, эйденстэнзэ кодазь пряспутомка? А кеман тенень. Эрзянь аватне пек превейть. Секскак, койсэм, истяткак, кедьсэ кодазтнеяк, ульнесть.

Пшкадян неень шкань эрзянь аватненень: - Ават, кияк кодадо тень кодазь пряспутомка эрзянь тешкс марто! Питнензэяк пандса, кандтнемензэяк паро мельсэ карман. Ней, витькстан, кандтнян истямо пряспутомка омбомасторонь тешкске марто. Кодамо покш мельсэ кандлевлинь пряспутомка эрзянь тешкс марто! Кие кунды тень кодамо эрзянь пряспутомка эрзянь тешкс марто, ёвтан, покшолмазо улевель 55-це.

  Вай, ков мелем оргодсть…

   Таго поладса кортамонть эрзянь цёрань пряспутомкадо. Окойники Алёшин Паол И-вальмастонзо неинь ташто ванмо (фото). 20-це пингень ушодксто. Тосо невтезель цёра эрзянь пряспутомкасо. Нама, аволь пек кезэрень, ялатеке, тосо парсте неяви парцунозо (форма). Неяви, сон эли кендень, эли эчке коцтонь. Сустазь. Пилензэ аволь кувакат, кавтос апак явто. Неяви, сон – телень. Ялатеке, неяви, сонзэ экше шкастояк кандтнильть. Ломантне – тарваз марто. Лисни, те нуема шка. Шкась аволь якшамонь, нама. Ялатеке, лисни, уцильтькак паксясо те шкастонть, секскак суманест-чапкаст мартост паксяв сайнильть.

  Паро улевель, кияк кундаволь одс тейнеме-сустамо эрзянь цёрань пряспутомкатнень. Кеман, ламот рамавольть. Канднемакскак, лецтнемакскак…

Эрюш Вежай

26.11.2014

Просмотров: 152

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования