Uralistica

28-тӥ-30-тӥ шуркынмонэ Комиысь Кулӧмдӥнь (Усть-Кулом) ёросысь Помӧсдӥнь (Помоздино) черкогуртын калыккуспо FUROR орум ортчиз. Отчы люкаськылӥзы Финляндиысь, Эстониысь, Удмуртиысь, Марий Элысь, Мордовиысь, Ханты-Мансийск но Ямало-Ненецкой автономной округъёсысь, Пермь улосысь, Санкт-Петербургысь но Комилэн пӧртэм ёросъёсысьтыз 120 пала егитъёс.

Туэ FUROR куинетӥзэ радъяськиз. Но нырысетӥзэ фин-угоръёс комиос дорын, куноос сямен, улӥзы (азьвылъёсыз форумъёс Ыб черкогуртын но Сыктывкарын ортчизы).Радъясьёс азьвыл ик Помӧсдӥнь черкогуртысь калыкен герӟаськиллям, ӵапак соос дасяськон ужлэсь бадӟым люкетсэ асьсэ вылэ басьтӥллям: сиён-юон пӧраллям, черкогуртсыя тунсыко шудон но экскурсия радъяллям, шулдыр концерт но пӧртэм мастер-классъёс дасяллям но мукет.

Ӵукнаосы форуме лыктэмъёс  «Чеччаланка» нимо зарядкае потазы, нуназеосы пленарной заседаниосы но секциослэн ужазы пыриськизы, ӝытъёсы концерт учкизы, «ТУТУРУТУ» этнодискотекаын асьсэды возьматӥзы (презентовали) но эктӥзы, тылскем дорын шудӥзы но ӵошатскизы, мастер-классъёсы пыриськизы, нимысьтыз дасям FUROR-2014 фаер-шоу учкизы, коми-пермяк эшъёссылэсь «Стая» спектакльзэс дунъязы.

Зэмзэ верано ке, та спектакль троссэ паймытӥз. Со туж туала, зол, малпаськытӥсь пӧрмем. Пуштросэз но аспӧртэм: ӟучомем дышетскисьёс лагере шутэтскыны мыно. Соос пӧлын – Андрей коми-пермяк пияш но, кудзэ мукет дышетскисьёс палэнто, эш чотын уг лыдъяло. Ӝытъёсы, вожатойёс адӟымтэ дыръя, егитъёс, нюлэскысь палаткае пегӟыса, пӧртэм духъёсыз ӧтьыло. Одӥгаз ӝытэ соос Андрейлэсь амулетсэ лушкало но нош ик духъёсыз ӧтё. Коми-пермяк куре берыктыны семьяязы возиськись арбериез, угось амулет выжыысь выжые (из поколения в поколение) сётӥське, соин изъянтыны уг яра, ато, утем интые, со уродзэ ваёз. Та пиналъёсын но озьы пӧрмиз: доразы вуизы чудьёслэн духъёссы, суразы пиналъёслэсь сюрессэс, шутэтскисьёс йыромизы. Соку Андрей коми-пермяк кылын вераськиз вашкала, кемалась бырем калыкъёслэн лулъёсыныз, огкыл соосын шедьтыны быгатӥз но егитъёсыз лэзизы. Нош спектакль пумын тодмо луиз, та ваньмыз вӧт гинэ вылэм шуыса.

Адӟыны кулэ вал, макем зол шудӥзы коми-пермяк эшъёсмы! Соос артистъёс ӧвӧл ке но, ас мылкыдзыя та спектаклез пуктоно кариськиллям но туж усто пӧрмытӥллям. Вань пӧлазы школаын дышетскисьёс но, студентъёс но, ужасьёс но, но тросэз соос Кудымкаре пӧртэм гуртъёсысь лыктӥллям. Туж бадӟым ужез быдэстӥз тылэн вырись но. Со сцена вылэ ӧз пота ке но, сотэк спектакль ӧз пӧрмысал: сцена вылын тыл я шуак кысылӥз, я ворекъяз пӧртэм сямен, я лыз, я горд луылӥз – со учкисьлы валаны юрттӥз, туала яке вашкала вакыт возьматӥське.

Туэ, кылем аръёсын ӵошатыса, секциосын уж но тунсыкогес но пайдаёгес ортчиз: тросэз отчы лыктэм егитъёс докладъёс лыдӟизы, ӵектонъёссэс веразы, мукет улосъёсысь югдурез асьсэлэнэныз ӵошатъязы, резолюцие дэмланъёссэс кельтӥзы.

Ужазы 3 секциос: «Уксё утчан но проектъёсыз улонэ пыӵатон», «Фин-угор кылъёсыз но сям-йылолъёсыз туала вакытэ утён но азинтон» но «Экология. Тазалык. Выжы калыкъёслэн азьланез». Котькудаз та секциос пӧлысь удысэз валась нуисьёс вал, ӵапак соос огъя ужез радъязы.

Тужгес трос калык люкаськылӥз кылъёсыз но сям-йылолъёсыз утёнъя но азинтонъя секцие. 2 нунал ӵоже отынпӧртэм темаосъя 21 доклад лыдӟемын вал. Кин ке мадиз улосазы яке гуртазы анай кылэз дышетон, мукетъёссы – газет-журналъёссы сярысь, куинетӥосыз веразы нимысьтыз проектъёссэс. Пусъеме потэ, ӵапак та секция форумлэн резолюцияз ӵектон пыртӥз, «Удмуртлык» огазеяськонлэсь удмурт филология факультетэз утён сярысь петицизэ быдэстыны курыса. Туж шумпотымон, Россиысь мукет фин-угор калыкъёс асьмелэсь трос юанъёсъя адӟем каро, визь-кенешъёслы вазисько, дунъяло шуыса. Петициез кылдытӥсьёсыз но ушъязы (секциын пукисьёс пӧлысь тросэз со улэ гожтӥськиллям вылэм ини).

Инкуазез утёнлы но тазалыклы сӥзем секциын адямиез ӧжытгес вылэм но отчы лыктэмъёс бадӟым саклык висъяллям куазьлэн воштӥськемезлы, нюлэсъёслэн быремзылы но пужейёсыз вордонэн кылдӥсь шуг-секытъёслы (пусйыны кулэ, Комиын, Ямалын но Ханты-Мансийск автономной округын оленеводъёс трос шуыса).

Проектъёсыз азинтонъя секциын докладъёс ӧз лыдӟе: нуисез куриз егитъёсыз уксё потттон амалъёсыз вераны (секцие люкаськемъёс тросэз проект ужен выро), аслэсьтыз кескич амалъёссэ шараяз. Но ваньзы ӵош малпаськизы, кыӵе луыны кулэ проект, солы коньдон мед висъялозы шуыса.

Котькудӥз 3 секциос пӧлысь форумлэн валтӥсь документаз – резолюцие – ӵектонъёссэс шараязы. Табере соос бордын малпаськоз на нимысьтыз быръем ужась группа.

FUROR-2014 пӧрмиз. Отчы люкаськемъёслы со выль эшъёс, выль малпанъёс, выль кужым, вунонтэм тодэ ваёнъёс кузьмаз. Со понна сюлмысь тыршизы радъясьёс: коми егитъёслэн «МИ» союзы но Помӧсдӥнь черкогуртын улӥсьёс – ӵапак соос асьсэ коркаосазы шуныт пумитазы матысь но кыдёкысь лыктэм финн-угор кунооссэс, лэсьтӥзы ваньзэ, соослы мед кельшоз шуыса.

Просмотров: 248

Комментарий

Вы должны быть участником Uralistica, чтобы добавлять комментарии!

Вступить в Uralistica

Комментарий от: Лена Рябина, Декабрь 10, 2014 в 6:51am

озьы) ас мылкыдзыя спектакль пуктиллям.

Комментарий от: Ortem, Декабрь 9, 2014 в 3:55pm

соос профессионал луисьтэмъёс, озьы-а?

Комментарий от: Лена Рябина, Декабрь 9, 2014 в 1:55pm

Артём, оскомы, возьматозы ай шуыса. Форумын спектакльлэн премьераез вал.

Комментарий от: Ortem, Декабрь 9, 2014 в 1:05pm

туж тунсыко спектакль! зэмос бадзым театрын возьматоно

Комментарий от: Pochash Chupin, Декабрь 8, 2014 в 8:31pm

аттьӧ репортаж понда!

© 2021   Created by Ortem.   При поддержке

Эмблемы  |  Сообщить о проблеме  |  Условия использования