Uralistica

Кода эрзятнень рузонь церькувас лемдясть....

Кода эрзятнень рузонь церькувас лемдясть.

 (Ташто ёвтнема.)

Кода велесь кармась пуромомо ды пуромс покшссто ветесядт ломанть, сестэ кармасть силком лемдявтомост. Тейсть тест церькува ды мерсть тест: -«Рамседе пазават». Сынь рамсесть весе Микилат ды мерсть тензэ рузынь Верепаз. Попось кармавтнесь эйсэст озномо, а сынь эзть озно. Истя тевесь куватьс мольсь.

Попось мезть думась пономарензэ марто? Вана кода сон тейсь. Сонсь совик удов ломанентень, а пономарензэ кекшсы пазава уголонть экшс. Сови кудонтень, кевкстсы кудо азоронть: -«Ознокшнат рузонь Верепазонтень?» Те мери: -«Ознокшнан.» - «А маньчат эйсэнь?» - «Арась, кевксик сонсензэ.» Те ары конилка лангс, чеки-поки ды серьгеди: - «Микола милостивый, скажи мне, молится тете сей раб с чадами, или нет?»

А се уголонть экшсстэ мери: - «Нет!» Сестэ попось се ломаненть пельде сат веете целковойть сень кис, мекс сон а озны. А зярдо омбоцеде сы, сестэ кемень.

Вейке ломань мезть тейсь?

Попось кода тусь эйстэнзэ, сон кежень пачк Микиланть сельмензэ саинзе ды таргинзе. Попось сась, ванны Микиланть сельмензэ таргавт. Сестэ попось сайсь пельдензэ комсьветее целковойть ды тусь. Рамавтсь од пазава. Те рамась од. Попось сась, ванызе:

 –«Рамить?»

 - «Раминь.»

- «Ознат?»

- «Ознан.»

Попось таго кевкстизе Микиланть. Таго мери: - «Нет!» Кеветее целковойть пельдензэ сайсь. Мейле те мезть тейсь те ломанесь? Саизе пазаванть, ливтизе кардазов. Сонзэ ульнесть андомасо колмо тувонзо. Сон се пазаванть тувонь пильгалов каизе. Попось сась, пазава арась. Кевкстни: - «Ды пазават косо?» - «А ки содасы? Чей мон эйсэнзэ а кирдян, сонсень пазонь олязо, ков думи, тов моли.» Попось педясь эзэнзэ: «Биди,- мери,- а тусак тей, сядо целковойть пельдеть саян.» - «Ды косто мон сайса? Видь мон Верепазонть марто а яксян. Кие содасы, ков сон тусь? Вейкеть неизь буто сонзэ, иссяк якась кардазга, а ков тусь, а содан. Адядо, инеськеть, вешнесынек.»

  Лиссть, кармасть вешнеме: вешнесть, вешнесть, арась косояк. Попось ды мери: - «Кода содат ведник ды муик, а биде а мусак, сестэ сядо целковойть пельдеть, макст нейке.» Те вансы, тевть апарт. Мольсь кардонть малас ды сергедсь: - «Вантта, бачка, оно се лазнэ ужинесь, рудайсэнть, аволь ва сон?» - «Таргика!» Таргизь, ваныть, алкукс сон. Попось мери: - «Ды тон мекс тезэнь каик?» - «Арась!»-, те мери. – «Ды, эно, мекс сон тесэ?» - «Ды видь монь аздаса; ванык, гуляясь веть, ды кудов самсто кудыкельксэсь эзь муев, совась те кенкшентень ирецтэнть пачк ды прась рудазонтень; а тувотне кодатт! Сынь шайтянгак чалгсить! А мон думан, кода сынь эзизь сэве корьминеценть!»

Попось ды мери: - «Мезть кенгелят? Минек Верепазонок винадо а сими». – «Сестэ, эно, угориясь ды лиссь венелев.» - «Таго кенгелят, видь сон чувтонь, ансяк сёрмадовт ломанекс, а сон а сими, а ярсы, а угори, а яки.» - «А мекс, эно, корты – а чувттнэ а кортыть, а сон а кенгели теть, буто мон а ознан тензэ.» Седе мейле попось пандя истя кевкстнемс.

Просмотров: 151

Эта запись блога закрыта для комментариев

Пусъёс

© 2020   Created by Ortem.   При поддержке

Эмблемы  |  Сообщить о проблеме  |  Условия использования