Uralistica

"Эрзянь Ойме" эрзянь сёрмадома шкинемань Казнесь максозь омбоцеде. / Состоялось второе вручение эрзянской литературной премии "Эрзянь Ойме".

«Руця» эрзянь Лезэпаргонть

2015 иень «ЭРЗЯНЬ ОЙМЕ» эрзянь сёрмадома шкинемань Казнень максомадо мельяволявтомазо.

 

«Руця» эрзянь Лезэпаргось 2014 иестэ саезь ютавты эрзянь сёрмадома шкинемань Казнень максомат.  Тедиде, те 2015 иестэнть, неть Казнетне максозельть Эрзя раськенть эрямопингензэ перть  омбоцеде.

Те Казнесь, мазый Арневкс марто, максозель сеть эрзянь сёрмадейтненень, кинь шкиневкстнэ-сёрмадовкстнэ те иестэнть седе пек вечкевсть эрзятненень.

Ледстясынек, 2014 иестэнть Казнетне ды Арневкстэ максозельть истяня:

Арневкссэ (диплом) ды сисемень-сисемень тёжань целковоень Шнамоказнесэ казезельть:

 - Журавлёв Числав, пек парсте содавикс эрзянь сёрмадеесь, «Пингень цецине» валморонзо кис,

-  Подгорнова Алина, однэ эрзянь валморонь сёрмадеесь, «Тюштя» валморонзо кис.

Арневкссэ ды кемень тёжань целковоень Прявтказнесэ казезель:

- Боляень Сыресь, ушодый валморонь сёрмадеесь, «Оймень пшкадема» валморонзо кис.

 

2015 иень Казнес ванкшновсть эрзянь кельсэ сёрмадозь кинигатне ды сёрмадовкстнэ, конат нолдазельть сельмс 2013-2014 иетнестэ.

2015 иестэ саезь эрьва иень эрзянь сёрмадома шкинемань Казнентень путозь мазый лем: «ЭРЗЯНЬ ОЙМЕ».

Ярмактнэнь «ЭРЗЯНЬ ОЙМЕ» Казнентень пурнызь эсь мельсэ ансяк сынсь эрзянь ломантне. Кирдивиесь эрзянь сёрмадома шкинемань Казненть туртов ярмакт а явты.

Тедиде «ЭРЗЯНЬ ОЙМЕ» Казнес путсть ярмакт ансяк кавто эрзят. Те аламо. Секскак Казнетне ярмаконь коряс лиссть аволь покшокс. Пурнавсть ансяк 30000 целковойть. Ялатеке сынст питнест - а онкставикст. Сынь пурназь ды путозь Эрзя раськенек культурас эрзянь покш оймев ломанень пельде.

«Руця» Лезэпаргось сась те иестэнть истямо мельс:

Тедиде максомс кавто Шнамоказнеть, конатнес явомс сисемень-сисемень тёжань целковойть, ды вейке Прявтказне, конас явови кемнилее тёжат целковойть. Колмо кадовт тёжатне нолдавить Арневкстнэнь анокстамос ды цецянь пусмос.

Казнес ванкшовиця сёрмадовкстнэ-шкиневкстнэ ульнесть путозь эрзянь ломанень сельме икелев «Эрзянь вал» эрзянь ломанень вастнема Интернет-куросонть, козонь совасть 8000-до ламо эрзянь ломанть. Ниле ковонь перть ломантне путнесть эсь мелест, кинень максомс Казнетнень.

Ванкшномас путозельть неть шкиневкстнэ:

 «Масторов нолдасынек сюкпрянок», Маризь Кемаль.  Кисэнзэ мелест ёвтызь ломантнестэ 29,9%.

«Тесэ ты Тосо», Нуянь Видяз. Кисэнзэ мелест ёвтызь ломантнестэ 20,7%.

«Ратор чирева», Боляень Сыресь. Кисэнзэ мелест ёвтызь ломантнестэ 14,9%.

«Калмазь ледстнема», Боляень Сыресь. Кисэнзэ мелест ёвтызь ломантнестэ 24,1%.

"Каргонь кинь ломанть», 3-це пельксэсь , Брыжинский В. С. Кисэнзэ мелест ёвтызь ломантнестэ 10,4%.

 

Тень лангс ванозь, «Руця» Лезэпаргось сась мельс, 2015 иень «ЭРЗЯНЬ ОЙМЕ» эрзянь сёрмадома шкинемань Казнетнень максомс истя:

 

Арневксэсь ды сисем тёжань целковойсэ Шнамоказнетне максовить:

- Боляень Сыреснень «Калмазь ледстнема» валморонзо кис,

- Нуянь Видязнэнь «Тесэ ты Тосо» покш ёвтамонзо кис.

 

Арневксэсь ды кемнилее тёжань целковойсэ Прявтказнесь максови:

- Маризь Кемальнень «Масторов нолдасынек сюкпрянок» кезэрень ды неень шкань эрзянь койде-иладо сёрмадовкс пусмонзо кис. 

Арневкстнэ ды Казнетне максозь чадыковонь 16-це чистэнть Саран ошсо, Эрзянь келень Чинтень алтазь эрзянь промкссо.

 

Эрзят, кие эзинзе ловно весе неть виевде виев сёрмадовкстнэнь, конатнесэ пси толсо палы эрзянь ломанень ды эрямонь Оймесь, муинк ды ловнынк! Сынь – Эрзя раськенть питнчист!

 

Эрюш Вежай, «Руця» эрзянь ломанень Лезэпаргонь тевветиесь.

Просмотров: 115

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования