Uralistica

Кода кармасть тейневеме эрьва иень эрзянь ковкерькстнэ?/ Как стали выпускаться ежегодные эрзянские календари?

Апак прядо (арсевиця) 2016 иень эрзянь ковкерьксэсь.

Кода кармасть тейневеме эрзянь ковкерькстнэ?

Мольсть ютазь пингень 90-це иетне. Сестэ эрзянь интеллигенциясь ульнесь апак рама кирдивийсэнть. Тейсь сень, мезезэ сатылть виензэ, ломанензэ. Арасель истямо лепштямо кулялопатнень, ковставкстнэнь (журнал) лангс. Сеть иетнестэ вастовкшнынь Маризь Кемалень марто, кона пек виевстэ аштиль эрзянь тевенть кис. Кортынек мартонзо эрзянь тевде. Тешкставсь кевкстемась: - Мекс арась эрзянь «календарть»?

Ковкерькс валось сетэ арасель… Арасельть эрзянь кельсэ ковонь лемтне, чинь лемтне, таргось лемдявкшнось рузонь кельстэ «недля» саевкссэнть. Кортамонок ульнесть аволь кувакат, ансяк кадовсть превсэм.

Мекс арасельть эрзянь ковкерькст?

Тувталтнэ зярыят. Арасельть те тевентень эрзят, кундыцят. Арасель лемвалонь-терминологиянь теицятне. Арасельть ярмакт. Кирдивиенть (сестэ те валоськак арасель!) арасель мелезэ тейнемс ЭРЗЯНЬ ковкерькст. Келя, мейсь, зярдо весе эрзятне кортыть-ловныть рузокс? Истямос пачкодсь Эрзя раськесь. Васенце эрзянь ковкерькстнэ печатазельть «Чилисемасо», конань лопатнесэ Маризь Кемаль вешнесь-мучкась ковонь лемтнень, таргонь читнень лемтнень. Муинек вал «календарь» валонть таркас. Сон теевсь кавто эрзянь валсто: КОВ ды КЕРЬКС. Ульнесь мель лемдямс «календаренть» КОВРИСЬМЕ валсонтькак. Ялатеке, та-кода «сонсь» совась эрзянь кельс «ковкерькс» валось…

 Таргонь чинь лемтнень весе вешнынзе Маризь Кемаль. Ковонь лемтненьгак. А стяко ульнесь филологияс содыцякс, «Чилисема»-со важодицякс. Аволь ансяк пародо паро валморонь сёрмадеекс. Сон нейгак видестэ ловови эрзянь келень ине содыцякс.

Васень коверькстнэнь кувалма ульнесть а чарькодематкак, пеедькшнематкак. Невтемакс: А.Лежиков васня раксесь лангсост. Сёрмадсь: те мень, келя ковонь лемть – АЦАМКОВ, ПАНЖИКОВ…. Сестэ ЛЕЖИКОВ валонтькак путомка ков лемтнень юткс?! Истят ачарькодемат ульнесть мик эрзянь ойме марто ломантнень ютксо…

А мезть кортамс «официальной мордовской» прессадонть. Сон тунь а неи неть од тевтнень мик неень шкас. Комсь иеть нолдневить эрзянь ковкерькстнэ, косо ковтнэ-читне лемдязь ЭРЗЯКС, ансяк, «мордовской правдатне» яла лемдить ды лемдить сынст рузокс… Келя, неть валтнэ «интернациональнойть», сынь чарькодевить весенень, а вана эрзянь од валтнэ-лемтне, келя, ЭРЗЯТНЕНЕНЬ а чарькодевить… Вана мезес пачкодсть «мордватне» Эрзя раськень ды эрзянь келень «вечкемасост». …

Ялатеке, тевесь мольсь икелев. Мон кундынь васня тееме вишка ковкерькскеть, конат зепсэ кандневить. Васенцесь ульнесь алтазь вельмевтезь Раськень Озксонтень. Ульнесь вишкине, сон коморос кельгиль. Ярмакон тунь арасельть покшос…  Мейле тейнинь А-4 покшолмасо, чова конёвнэ лангсо. Седе мейле карминек тейнеме ковкерькст паро конёвсо, мазый тюссо.

Весе нолдавксонть-тиражонть макснинек «Эрзянь Мастор» кулялопань редакцияс. А покш ярмактнэ, конатне сайневльить ковкерьксэнь микшнемастонть, весе максовильть «ЭМ»-нть нолдамос. Те коесь нейгак ванстови-топавтови.

Састыне муевсть лездыцят. Сюконямот сеть эрзятненень, конат эсь пенсиянь ды важодькс пандомань ярмакстост явтыльть зяронь-зяронь апокш ярмаккеть те эрявикс эрзянь тевентень. 

Ней, меремс, эрзянь эрьва иень ковкерьксэнь теемась стясь пильге лангс. Ламо иень перть сон нолдневи. Эрзятне сонзэ пельде састыне тонавтыть эрзянь ковтнэнь ды читнень лемест. Эрзятне эрзянь ковкерьксэнть вельде кармасть аламнешка содамо эрзянь койтнеде, эрзянь покшчитнеде, эрзянь ломантнеде, Эрзя раськенть мазычидензэ ды тевдензэ-эрямодонзо.

Сы иень ковкерькссэнть невтьсынек эрзянь тейтерень мазычинть. «Эрзянь вал» И-куросонть ютавтозель покш тев: ванмонь-фотонь путнемка ды кисэст мелень ёвтамка-путнемка. Те куросонть  ней пек ламо эрзянь тейтерень-авань ванмот-фотот. Ковкерьксэсь путозь карми ванмось изницясь, конасонть – Лисина Елизавета эрзянь тейтересь. Тейтересь – алкуксонь эрзянь мазыйка-мазыйне. Чачсь-кассь Пиксясь эрзянь велесэ. Инешкипазось, эрзянь тетязо-авазо, казизь Елизаветань а ёвтавикс мазычисэ ды валдо превсэ. Тейтересь, кода эрзятне мерить, сайсь эрьва мейсэ: мазый чамасо, ёлганя рунгосо, ванькс-ашо чама киськесэ, мазый сельмсэ, прячерьсэ… Превензэяк валдот. Прядсь Саран ошсо Раськень культурань тёкшшкола. Важоди морамо куросо. Вечксы эрзянь келенть, моры эрзянь морот, путы превензэ-таланонзо эрзянь культурань, келень ды коень вансомань тевентень.

Вана кодатт эрзянь тейтерть саемкат эрзянь од цёратненень одирьвакс-полакс!

Кадык эрзятнеяк, лия раськень ломантнеяк те ковкерьксэнть лангс варштазь неить – кодамо мазый минек раськесь, кодатт мазыйть ЭРЗЯНЬ ЛОМАНТНЕ….

Ней мелявксом вана кодамо.

Эрявить эрзянь од ломанень туртов эрзянь ковкерькст, конань а виськс понгавтомс школасо, куншкашколасо, тёкшшколасо, эрзянь од ломанень кудосо-нупальсэ…

Эрявить эрзянь эйкакшонь туртов эрзянь ковкерькст, конатне маштовить понгавтнемест кудосо, эйдень кужосо, ушодкс школасо, классо…

Койсэм, сась шка максомс эрзянь ковкерьксэнь нолднеманть эрзянь од ломанень кедьс. Койсэм, од ломантнень те тевесь минденек парсте лиси. Кундадо, эрзянь од ломанть те тевентень. Сон лезэв ды эрявикс. Мон мейсэ маштан, тенк лездан.

Паро мельсэ, Эрюш Вежай. «Руця» эрзянь Лезэпаргонть тевветиезэ. 2015 ие.

Просмотров: 169

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования