Од ие! (Валморо). \ Новый год! (Стих). Эрзянь кельсэ. \ На Эрзя языке.

Од ие!

Од ие, од ие!

Кие инжекс сась, кие?!

Кенкшэть панжик келейстэ,

Совазо инжесь эрейстэ.

Телень весь сась, ёвксонь он -

Пиже кузнэсь кудосом.

Липнить тештть, сияжды ков,

Ловось чевте, прок тодов.

Ловонь поколь коморсон,

Сиянь пикстерькст варьгасон.

Ёвксонь ве - од ие!

Кальцькадсь циньдерькс:

- Сась кие?

Якшам атясь, Ловняськесь,

Инжекс састь, кандыть казнеть -

Ламбаськеть, учонь налкшкеть.

Зяро кеняркст, эльнемат,

Мартост, содак, а кельмат.

Морат моро, ёвтнят ёвкс,

Тень кис – казне. Морак одс!

Кудораськеть кудосо -

Кази иесь кеняркссо.

Од ие, од ие!

Кецявт минек, ёвксонь ве!

Оймень кеняркст, арсемат,

Од уцяскань учомат.

Од ие, од ие,

Телень кеняркс - ёвксонь ве!

***

Эрюш Вежай. Ацамков. 2015 ие.