Uralistica

Кода теевсь ЧЕЕРЬ валось?\ Как "сделалось" слово МЫШЬ?. (Эрзянь кельсэ.\ На Эрзя языке).

ЧЕЕРЬ валдонть мель-вал.

 

     Мазый эрзянь келенек! Эрьва эрзянь валось эйсэнзэ – теке сырнень покольне. Кевери сон кельпрясот. Гайги пилесэть. Эри оймесэть ды прясот.

    Ансяк эрзякс кортыцясь чарькодьсы эрзянь валонть гайтензэ, питнензэ, смустензэ-зэмензэ. Ансяк эрзянь ломанесь чарькодьсы эрзянь валонть а ёвтавикс танстензэ!

 Кодак марясак костояк эрзякс кортыця ломаненть, седеетькак киторк(!) теи. Ойметь ванськады, верев кепети. Вай! Тиринь эрзянь келем!

    Кода арсизь-теизь минек покштятне-сэрдятне эрзянь келенть? Теде кияк а соды. Минек превенек сатныть ансяк сеньс, мезес сатныть. Лиясто арсезеват эрзянь кодамояк эрзянь валдонть, ды тонсь а содат кода сы чарькодема: - Вана косто те валось саевсь! Вана кода се валось теевсь!

Течи ёвтаса эсь мелем ЧЕЕРЬ валонь кувалма.

        Кода сонзэ ёвтасак, те валонть, ЧЕЕРЬ, сеск превсэть леди мель: те та кодамо вишкине, эряза пачине, кона эри паксяваяк, утомга-кудоваяк. Сонстемензэ паксяськак а пакся, утомоськак а утом! Нама, лезэ те пачинеденть ломаннень кодамояк арась. Видьстэ меремс, ансяк зыяннэ. Ялатеке, эрямонок чееренть марто пек сеедьстэ сюлмазь. А стяко, оно зняро ёвкст чеерьденть ломанесь арсесь!

Косто саевсь чееренть лемезэ? Кода теевсь те валось?

Васенце мелесь. Койсэм, вана истя: ЧЕЕРЬ=ЧЕЙ+ЭРИ. Чей ды тикше потмова эри пачинесь, конань неизь кезэрень эрзятне, ульнеськак седикеле, кезэрень шкатнестэ, лемдязель эрзятнесэ ЧЕЕРЬ валсонть.

Омбоце мелесь. ЧЕЕРЬ валось, улема теевсь ЦИРНИ валстонть. Кода чеернесь понги катканть кенжезэнзэ, сон, содазь, пачк цирни. Чарькодеви, мекс….

Лия малавикс кельсэяк те валось пек малавиксстэ гайги-ёвтави. Невтемакс:  hiiri (suom.)=чеерь.

 

Чеерь, чеерь, чеерене,

Чийнят теке штерине,

Кувакине пулыне,

Ёрокат ды эрязат,

Каткантень а кундават!

***

Эрюш Вежай, ацамков, 2015 ие.

Просмотров: 196

Эта запись блога закрыта для комментариев

Пусъёс

© 2021   Created by Ortem.   При поддержке

Эмблемы  |  Сообщить о проблеме  |  Условия использования