Uralistica

Эрзянь пештинеть. \ Эрзянские орешки. (Эрзянь кельсэ. \ На языке Эрзя народа.)

ЭРЗЯНЬ ПЕШТИНЕТЬ

                                                                     (неень шкань эрзянь ёвкс)

Пештинеть…

Кезэрень эрзянь вал. ПЕШТЕ. ПЕШКС. Пек питнейть ЭРЗЯНЬ КЕЛЕНЬ валтнэ! Оймемгак апаркстоми, зярдо неень шкань эрзятне пештинетнень лемдить рузонь валсо – «ОРИШКАТ»…. Мейсь? Мейсь ёртыть ПЕШТЕ валонть эрзянь кельстэнть? Месь кажовтыть те мазый эрзянь валонь  ёртомасонть эрзянь келенть? Вай…

ПЕШКС.

Те рацяня, куракш кондямо чувтынесь эрзянь раськентень пекте пек питней. Эрзятне эрить човорвирень ютксо, косо касыть салмуксов ды лопав чувтот. ПЕШКСЭСЬ – те вирень казне эрзятненень. Те, видьстэ меремс, эрзятненень омбоце, вирень кши. Пек питней ПЕШКС чувтось эрзятненень!

 Пештень раштыця иетнестэ эрзятне кескавонь кескавсо пурныльть пешттнеде, костильть сынст лато прясо ды ванстыльть эйсэст теленть самос.

Пештесэнть ули паро-тантей пеште ой, витаминт, вишка, а неявиця пелькскеть, конатне пек эрявить тельня минек рунгонтень, сонзэ шумбрачизэнзэ.

Секскак, эрзятне пек вечкильть тельня пештте чулгонеме. Ансяк, чулгонемстэст эряви пейтнень ванстомс! Паро азортнэ тень туртов, пештень лазномас, тейнильть чувтонь мушкорт (молоткат), конаньсэнть пештинетне лазновильть. Товтнэ максовильть вишка эйкакштнэнень.

Седе тантеекс теемаст кис, кудазораватне костнильть пешттнень пачалго лангсо. Сестэ пештинетне седеяк тантейгадыть, ды сестэ седе шождасто чулгоневитькак, тапсевитькак.

Тапсезь-мерьказь пештень товтнэнь азораватне нолдыльть пидема-панема тевскак. Пештень товсто теезь почтонть путнильть кашас, сюкорос, прякас, пачалксес. Мик кшискак. Пештте чулгонемась, пештень товтнэ ды почтось - пек лезэв ломанень рунгонтень. Сэстэ эйкакштнэнень а педи ловажань пурднема ормась – рахит, пейсывелень путкотема-таргозема ормаськак а педи. Теде эрзятне содасть.

ПЕШТЕСЬ совась Эрзя раськень эрямо койс-иласкак. Истямо покш питне тензэ путсть эрзятне.

Кодамо те коесь? Истямо.

Роштувадо (Иень Раштамо) икеле чистэнть кудо азораватне панильть пештинеть. Мень седе ламо панят пештинеть, сень седе ламо сы иестэнть раштыть пештть. Рашты пешксэсь – рашты эрзянь раськеськак!

Пештинетнесэ каванить кудораськенсетненьгак, шабратненьгак, инжетненьгак. Явшить кудо вакска-икельга ютыцятненень.

Кудоазоравватне пелькстыльть, кинь седе тантейть пештинеть паневсь. Таньстень салаваксчись ульнесь содавикс: путат чапаксонтень седее ламо велькс, ой, алт – нама, лисить пештинетне тантейде тантейть. Почанят, тантейстэ качадыцят! Путсак кургозот, сон тосо сонсь соламо карми. Корштат ловсынеде – сонсь нилеви!

Кудосо пештинетнеде седе ламо ярснильть ловсо ды ламбамо велькс марто. Чапамо велькс мартояк ярснильть.

Превей-паро эрзянь аватне те коенть нейгак а стувтнить. Ванстыть сонзэ. Эрьва теле панить пештинеть ды каванить эйсэст малавиксэст, инжест, шабраст. Паро эрзянь коесь!

Иень Раштамо Чи марто, эрзят! Раштаст сазь иестэнть пешттне! Раштаст сазь иестэнть эрзятне!

***

Эрюш Вежай, 2016 ие, якшамков.

Просмотров: 171

Эта запись блога закрыта для комментариев

© 2019   Created by Ortem.   При поддержке

Эмблемы  |  Сообщить о проблеме  |  Условия использования