Uralistica

Аштема кудо. \ Посиделки. (Эрзянь кельсэ. \ На языке Эрзя народа.)

                      Аштема Кудо. Эрзянь од ломанень койть.

                               (Г.А. Корнишина. Эрзякс рузонь кельстэ ютавтызе Эрюш Вежай.)

 

         Эрзянь од ломантненень, цёратнень-тейтертнень, 14-15 иестэ саезь, нолднилизь од ломанень чокшнэнь пуромксос – аштема кудос. Неть аштематнесэ эли топавтовильть кодаткак тевть, штердемат-викшнемат,  эли эрсесть истяконь аштемат, зярдо ульнесть ансяк од ломанень налксемат, киштемат-морсемат.

Седе сеедьстэ аштема кудосо ютавтневильть  вейсэнь штердемат. Сынст пурнылизь сеть аватне, кинь кудосост а сатокшныльть аваломанень кедть, кинь кудосо ульнесть седе ламо цёрат эли ульнесть ламо эйкакшт.

Кудазоравась сонсь якиль лиянь кудова ды тердиль тейтерть ды од ават лездамо. Кона-кона велетнесэ терднеме сивеливильть покшке цёрынеть, конат чийнильть куринкатнева, вачкоильть вальма лазга ды ёвтнильть, кие ды зярдо терди штердемас. Кие эрясь васоло куринкасо, эли мик лия велесэ, сетнень мельга тердицянь мирдесь эли покш цёразо сыль алашасо, конасонть усковильть тердезьтне эсь пряхаст-штерест ды понаст-мушкост марто.

Седе сеедьстэ истямо аштемасо лездыльть штердеме мушконь ды понань суреть, лиясто лездыльть лия тевсэяк.

     Меремс, Самара ёнксонь Ташто Шантала велесэ тейтертне кизна лездыльть ацамонь вельтявксонь-тавадксонь сустнемасо, Од Байтермиш велинесэ, Исаклань буесэ, лездыльть варьгань-цюлкань кодамосо. Неть аштематне ульнесть ломаннень лездамокс, конас пурнавильть одт, 15-18 иесэ тейтерть. Аволь секс, мекс неть тейтертнень ульнесь ютко шкаст седе ламо. Неть штердематне-штердематне, кода пачк, прядовкшныльть эльнемасо-налксемасо, конатнесь сакшныльть од цёрат.

     Секскак тейтертне сайнильть аштемас ванькс оршамонь полавтомкат, конатнень оршнилизь важодемадо мейле. Кудазоравась парсте чарькодиль, мезе эряви од ломантненень важодемадо мейле, секскак неть налксематнень а кардыль.

Вейсэнь лездамокс ульнесть тейтерень аштематнеяк, зярдо чиявтозь тейтеренть кудосо пурнавильть ялганзо, конат лездыльть  чиянь тейтерентень анокстамо казнеть-мезть мирдес саема чинтень. Тейтерень ялганзо эрясть-лездасть сонзэ кудосо мик ковонь пель марто видьс.

Чиязь тейтеренть авазо андыль тердезь тейтертнень-лездыцятнень. Те шкастонть тердезтне пачк каванявильть пачалксесэ. Истямо лездамо аштемас якамось лововиль кода мелень ваномань коряс важодемакс, лездамо мелень топавтомакс, малавикснэнень эли шабранень карадо каршонь лездамокс. Ульнесь лияяк вейке пек важов тувтал аштема кудос яксемасонть: самай истямо лездамонь важодемасо, штерднемасо-сустнемасо велень ломантне кармильть содамо – кодамо од ломаненть маштомазо-ёрокчизэ, мезес-кода машты сон. Од эрзянь тейтерень кудораськетнесэ пек пштистэ мелень кундазь-саезь вансть аштеме якамонть лангс.

  А стяко Эрзя раськенть ульнесь аштема кудос якамо коесь. Зярдо тейтересь «совиль иес» (14-15 иеть), сонзэ тельня, ловонь Прамо чистэ саезь Роштувань видьс кучилизь инжекс ве верь кудораськень кудос лия велев, эли лия куринкав. Ва эсь кудососонзо тейтеренть аваломанень кедьтнеде ульнесь сатышка, сестэ тейтересь «инжедиль» малавиксэнзэ кудосо мик кавто ковшка, ды ютыль инжекс вейке кудосто – лияс. Зярдо ильтильть тейтеренть «инжекс», мартонзо максыльть-путыльть сатышка ламо мушкодо ды понадо, конань те «инжесэ» улема шкастонть тензэ штердемаль.

  Нама, те шкастонть тейтерентень меревекшнель яксеме од ломанень аштема кудоваяк. Истя тетянзо-аванзо содавтылизь касозь тейтерест лия од цёра марто, содавтылизь велень эрицятнень сонзэ  тевс  маштоманзо марто.

  Лисни, тейтерень аштема кудос нолднемась ульнесь чарькодевиця «невтемакс» - тейтересь кассь ды анок покш ломанень эрямокоймэ-сэрьсэ эрямос. Сеедьстэ ды ламокссто пурнавкшность вейсэнь аштема кудос эрзянь цёратне-тейтертне эрсиця покшчитнестэ.

   Тейтертне ды од цёратне нолдневильть аштема кудос 14-15 иестэ саезь. Покшке тейтернетне-цёрынетне, 12-13 иесэтне, нолдневильть аштема кудос кода ансяк ве ёндо ваныцякс. Сынь седе икеле туильть кудов, сынст а нолднильть покштнэнь ютксо налксематнес-киштнематнес.

  Се кудораськесэнть, конасонть ульнесть кавто эли седе ламо касозь тейтерть-сазорт, васняяк нолднилизь аштема кудос  седе покш тейтертнень. Седе вишка сазортнэнь кирдильть сынст удало, пек илязт неяво: седе беряньстэ оршнильть сынст, эзилизь невтне лия велестэ сакшныця цёратненень, эльнематнесэ-налксематнесэ сыненст эзь меревкшне ламо киштемс.

                                                                                 ***

 

Просмотров: 209

Эта запись блога закрыта для комментариев

Комментарий от: Erush Vezhai, Январь 23, 2016 в 9:12pm

Аштема кудов!


Ушось якшамо,
Вармине, зэхель,
Суньдерьгадомат…
Седицясь – тескель!
Налкси «майсемат»
Кедьсуров алясь
Ловось чикорды
Карьтнесэ матравсь.
Кие суманьсэ,
Кие шубасо,
Кедьсэть штердемат
Аштемс кудосо.
Эльневти морот,
Пейдьтнемат, морамот,
Гайтев раксемкат,
Вейсэ киштнемат.
Ки тейтертнестэ
Седе пек неявикс?!
Кеняркст сельмтнесэ,
Кецтнемат оймесэ
Колмонест мазыйкат -
Куроконь одирьват!

***
Эрюш Вежай, якшамков, 2016 ие.

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования