Uralistica

Эрямо эрьге. \ Жемчужинка-бусинка жизни. (Эрзянь кельсэ. \ На языке Эрзя народа.)

Эрямо эрьге

(неень шкань эрзянь ёвкс)

          Мезе те истямось, эрямонь эрьгесь-эрьгинесь? Те эрзянь ломаненть эрямосонзо сехте питнеесь, мезесь эрси ломаненть эрямонзо перть. Ломанень эрямось – сон теке сурине, конань лангс сонсь ломанесь керьксни иензэ ды эрямонь перть тевензэ. Мень седе ламо паро-мазый тевть теи-топавты ломанесь, мень седе мазыйстэ-парсте эрясынзе иензэ, сень седе мазыйстэ карми теевеме эрямонь эрьге керьксэзэ…

        Улема, эрзятне теде содасть. Секскак эрзянь аватнень истят мазыйть ульнесть седикеле эрьге керьксэст. Секскак сынь поводешнесть неть мазый эрьге керькстнэнь эсь мазый кирьгазост, мазый мештезэст. Ванодо, ломанть, зяро паро тевть теинь, ванодо, эрзят, кода апародо прям ванстынь, редядо, эрзят, зяро паро чить-иеть эринь!

        Ансяк неть эрьге керькстнэсэяк, эрьгтнень ютксо-куншкасо, эрси истямо эрге-човалине, кона сехте мазый, кона сехте мазый тюссо ципельди-цить мери, конань питнезэ лиятнень коряскак сехте питней. Сон невти се тевенть, се чинть, конаньсэ эрзянь ломаненть неяви оймень сюпавчизе, паро виень путовксозо, конасонть сонсь ломанесь эрямонзо перть сонськак каштангали, лия ломантнеяк питнензэ чарькодить, эйстэнзэ содыть.

Ледстясынек ине эрзянь ломантнень.

Пургаз Инязорось. Сонзэ сехте неявикс эрямо эрьгезэ – Эрзянь Масторось, сонзэ ванстомазо-идемазо.

Эрзямасонь Элена. Те эрзянь ине аванть сехте мазый эрямо эрьгезэ – раскенек кис толпандяс апак пеле совамозо ды минек кис паломазо.

Кузьма Алексеев, Несмеян Васильев – сехте неявикс эрямо эрьгест – раськенек кис пряст максомаст-путомаст.

Неень шкасонокак ламо эрзят улить, кинь эрямо эрьгест валдозо-мазызэ васолдонь васолдояк весеменень неявить.

Невтемакс. Степан Эрьзя, Тимофей Васильев, Анатолий Рябов, Серафима Люлякина, Кузьма Абрамов, Дмитрий Надькин, Йовлань Оло, Александр Арапов. Тоначистэяк сынст валдо тевест невти тенек се кинть-янонть, конаванть молемка тенек.

Эри ломантнень ютксояк содатано ламо ломанть, кинь эрямо эрьгинест невтить минек раськенть мазычинзэ-питнензэ. Маризь Кемаль, Александр Шаронов, Дмитрий Цыганкин, Аношонь Тумай, Нуянь Видяз, Пётр Рябов, Римма Жегалина, Ольга Богданова…Весе неть эрзянь ломантне парсте вешнесть ды муизь эсь эрямо эрьгинест. Муизь, ды невтизь эсь эрьгень мазычист миненек, лия эрзятненень.

Сынст эрямо эрьгест сиянь-сырнень эрьгинекс кумболдыть Эрзя раськень эрямо кирьгакшсонть, эрьге кирькссэнть, сынь невтить тенек, кода миненек эряви эрямс, неень шкань эрзятненень.

Вешнеде паро тевень ютксо, эрзят, эсь эрямо эрьгиненк. Сестэ эрямонь эрьге кирьксэнк карми весеменень неявомо ды кандомо лия ломаннень кеняркс ды эрямонь чарькодема. Кодамо мазый, сюпав ды питней ЭРЬГЕ эрзянь валось! Эйсэнзэ маряви: - Эрь! Эрьде! Эрямо! Эряви! Эрьке! Эрьва! Эрьгедемс! Эрьме! Эряза! Эрзя!

Вешнеде, эрзят,  эрямо эрьгенк. Сестэ, содадо, эрямонк стяко а юты.

***

Эрюш Вежай, 2016 ие, якшамков.

Просмотров: 229

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования