Покштям эйсэм тонавтсь: - Ва, иля капша!
Иля ойсе столекшс, кедеть апак шля!
Варштавксонзо нейгак секе тев ледстнян,
Нуцьканстэнь валонзо сеедьстэ ёвлян…
Авам тень мерекшнесь : - Васов иля туе!
Тиринь кудов янонть эрьва косто муик!
Вармат прясом пувсесть, эзия кунсоло,
Эйкакшпингень кудом эйстэм ней васоло…
Тетям эрямодо пек мартом эзь кортне,
Эзь кардтне, эзь кирдтне: - Верьга иля ливтне!
Ливтнинь эрьва кува, ливтнинь верьга-сэрьга,
Эрьва кува вешнинь мон эрямонь эрьгенть…
Вечкень лелям тонавтсь: - Кургот иля автне!
- Васня леенть онкстык, мейле тов чопавтнек!
Пиле вакска нолднинь тень алтазь валонзо,
Секс а весть печтякшнынь эрямонь томбавкстнэнь.
Ялатеке эрян, мелест-валост ледстнян,
Валдо превспутомаст валморынес керькстнян…
- Верьга иля ливтне! Кургот иля автне!
- Васня леенть онкстык, мейле тов чопавтнек!
Нуцькатне кунсолыть?
Пеедить… Мизолдыть…
***
Эрюш Вежай, 2016 ие, якшамков.
© 2021 Created by Ortem.
При поддержке