Uralistica

ПАЗОНЬ СЕЛЬВЕДТЬ ЦЕЦЯ. = Цветок - Слёзы Инешкипаза (Творца) . Эрзянь кельсэ. = На языке народа Эрзя.

Курок кизэ. Тикшень-люкшань пурнамо шка... Нежедиця Кизэнтень алтави те ёвкскем... Ёвксось алтави вечкевикс Нуянь Видязнэнь (Четвергов Евгений Владимирович), эрзянь сёрмадеентень, пертьпельксэнь содыдеентень.

ПАЗОНЬ СЕЛЬВЕДТЬ (неень шкань эрзянь ёвкс)

Ульнесть шкат, зярдо эрзятне весе тикшетнень-люкшатнень лемдякшность эрзянь валсо. Те сестэль, зярдо эрзянь келенть эрзятне эзть полавтнекшне шабра раськень кельс. Кудосояк, велесэяк, ошсояк кортыльть эрзякс. Вечкильть васняяк тиринь келенть. Лия раськень ютксояк улемстэ эрзятне кортыльть эрзякс кидеяк апак пеле, апак визде, ванькс, мазый, гайтев эрзянь кельсэ. Кияк эрзятнестэ эзь лово эрзянь келенть а эрявиксэкс. Кияк эйстэнзэ эзь нулгоде. Кияк эрзятнестэ эзь сёрмале сёрмат вере озавтозь кирдивиентень, келя, «а эряви тонавтомс эйкакшонок школасо тиринь эрзянь кельс». Вана мезес мик пачкодсть неень шкань кона-кона рузыявтозь-«мордвиявтозь» превсэть эрзятне… Вай… Кезэрень эрзятне ванстыльть эрзянь келенть, кеместэ аштитльть кисэнзэ ды эзть мие эйсэнзэ тантей-ламбамо ярсамкань ды паро эрямонь кис… Ней шкатне полавтовсть. Эрзятне шождасто ёртыть эсь кельстэнть эрзянь валтнэнь, апак арсе полавтыть сынсть шабра раськень валсо. Секскак тиринь авантеньгак мик кармасть мереме «мамай», «шумбра ульть!» эрзянь валтнэнь таркас – «здоров!» ды седе тов… Инзеентень эрзятне кармасть мереме - «малина», чевгелентень – «калина». Мик эрзянь мороскак эрзянь валтнэнь юткс чаулынетне кармасть рузонь «калина да малина моя» шабра раськень валтнэнь тонгонемест… Те – покш зыян, те – эрзянь келенек ёмамос шаштома. Ансяк аволь весе эрзятне чарькодить тень. Ламот а содытькак: эрьва тикшиненть-чувтыненть ули эрзянь лемезэ. Сынст мазый эрзянь лемест арсизь-теизь кезэрень превей эрзятне, неть валтнэнь эрзятненень эрямонь казнекс казинзе превей, ине эрзянь Инешкипазось. Сынст тенек а стувтома, ванстома ды одс неень шкань эрзянь кельс совавтома. Кодат неть валтнэ мазыйть! Ёвтынкая тынсь неть валтнэнь: индерь… инзей… чевгель…. цяпор тикше… нар тикше… баягине … сэняжке … пазонь сельме… пейделька… Марясынк эрзянь танстест-растест?! Сынст ёвтамсто мик неть тикшетнень-чувтнэнь чинесткак марясыть, лопинест-марьнесткак несыть… Ансяк марямост-чарькодемест эряви эрьва эрзянтень маштомс… Течинь эрзянь ёвкскесь ПАЗОНЬ СЕЛЬВЕДТЬ цецинеденть… Ошонь эрзятне, паряк, вестькак эзизь некшнеяк те виздиця орваня тюсонь цециненть. Косто! Сонзэ некшныть ансяк сеть эрзятне, конат вечкить якамо вирьга-лугава, цецянь мазый паксява. Кунсолодо, эйкакшт, саеде превс, пакшат, ПАЗОНЬ СЕЛЬВЕДТЬ неень шкань эрзянь ёвкскенть… Кунсолодо пштистэ, арседе домкасто, ансяк сестэ чарькодьсынк эрзянь ёвкскенть, ансяк сестэ содасынк эрзянь мелявксонть-арсевксэнть… ПАЗОНЬ СЕЛЬВЕДТЬ Цецине. (Ёвкс.) Умоньдо-умонь, кезэреньде кезэрень пингестэ, зярдо Инешкипазось теизе Модамасторонть, теде мейле сон мазылгавтызе сонзэ моданть лангонзо сэрей пандосо, келей лейнесэ, цивтёрдыця эрькесэ, сэнь певтеме иневедьсэ. Моданть мазылгавтызе тусто, пиже вирьсэ, паксятнень – тантейстэ качадыця мазый цецясо. Эрьва чувтынентень, эрьва тикшинентень, эрьва цецинентень эрзянь лемть путсь ды неть мазый, смустев лемтнень ёвтынзе эрзятненень. Кармась эрьва Эрзясь содамо, мезес маштови эрьва чувтынесь, мезес путови-нолдави эрьва цецинесь, кодамо чувтонь-тикшень эрьва пиже лопинесь, кодамо цецянь эрьва панжтось… Ансяк вейке цецинентень сон эзь путо лем, Ансяк вейке пижинентень сон эзь арсе вал. Мерсь Инешкипазось Эрзянтень: - Те цецянть тонсь, Эрзя, лемдясак, Те цецянтень тонсь, Эрзя, валонть арсесак. Кодак несак сонзэ, Эрзя раськенть эрямонзо - чарькодьсак, Монь мелявксом кисэнзэ - марясак… Кевкстизе Эрзясь Инешкипазонть: - Мезень кувалт мон се цецянть лемензэ арсеса, Мезень коряс мон се валонть чарькодьса ды содаса? Инешкипазось мери Эрзянтень: - Зярдо тон, Эрзя, кармат лемем стувтомо, Зярдо тон, Эрзя, кармат эрзянь келеть кадомо, Зярдо тон, Эрзя, кармат эсь леметь полавтомо, Сестэ пек карми оймем стомамо. Карми седеем сэредькс раздеме-ськирямо, Кармить сельместэм сельмень кери сельведьть пракшномо… Сельведем саловт, сельведем сэпейть. Козонь пры сельведь – панжи цецине, Козонь прыть кавто – кавто цецинеть, Козонь прыть колмо – цецянь пусмине… Молят вирев тон, цецясь вастови, Молят паксяв тон – цецясь редяви. Ансяк лемезэ – теть а содави… Зярдо сы се шкась, тон цецянть несак. Несак цецянть тон, валом ледстясак. Ледстясак валом, арсесак лемем, Сестэ лемезэ цецянть арсеви, Сестэ лемвалось теть сеск содави, Сестэ аварьксом теть чарькодеви… Истяня кортась-тейсь Инешкипаз, Истяня превс путсь арсиця Эрзянть. Меленть ёвтызе – менель потс ёмась, Эрзянть кадызе стака арсемас… Ламо пингть ютасть, ламо ийть соласть, Эрзянь раськинесь виемсь ды эрясь. Ульнесть паронзо, ульнесть кажонзо, Течинь эрямос састыньгине шаштсь. Чалгасть пингетне, нежедсть иетне, Конатнень пингстэ стака зыян сась. Кармасть эрзятне келест стувтомо, Кармсть эрзятне лемстэст явомо, Шабра раськень пазнэнь, вай! Ды а эрзякс озномо…. Те стака шкастонь, вейке Эрзя кайсь, Ансяк ськамо сон эрзякс пек содась. Лиятне кармасть човор кортамо, Перть пельксэнь лемтнень валтнэнь стувтомо. Весть мольсь се Эрзясь сэрей пандо пряс, Цецянь паксинес карксамга ваясь. Весе цецятнень сон содасынзе, Весе люкшатнень сон ледстнесынзе. Пурны тикшинеть, сезни люкшинеть. Лемест сынст эрзянь, эрзякс лемдявить. Варштась цёрась тейсь – икеле цеця! Лемензэ сонзэ сон а содасы. Керш ёндо вансы – а содави сон, Вить ёндо нейсы – а ледстяви сон… Ледстявсь Эрзянтень кезэрень ёвксось, Конань ёвлизе тензэ покштязо, Ёвкс эрзянь Паздо, ёвкскесь – цецядо: - Зярдо тон, Эрзя, кармат лемем стувтомо, Зярдо тон, Эрзя, кармат эрзянь келеть кадомо, Зярдо тон, Эрзя, кармат эсь леметь полавтомо, Сестэ пек карми оймем стомамо. Карми седеем сэредькс ськирямо, Кармить сельместэм сельведьть пракшномо… Козонь пры сельведь – панжи цецине, Козонь прыть кавто – кавто цецинеть, Козонь прыть колмо – цецянь пусмине… Молят вирев тон, цецясь вастови, Молят паксяв тон – цецясь редяви. Ансяк лемезэ – теть а содави… Зярдо сы се шкась, тон цецянть несак. Муйсак цецянть тон, валом ледстясак. Ледстясак валом, арсесак лемем, Сестэ лемезэ цецянть арсеви, Сестэ лемвалось теть сеск содави… Эрзясь арсизе, стака эрямонть, Эрзясь онкстызе се эрзянь ёвксонть, Ды чарькодсь Эрзясь цецянть лемензэ, Превезэнзэ сась тикшенть валозо: - ПАЗОНЬ СЕЛЬВЕДТЬ се, ды муезь тикшесь, ПАЗОНЬ СЕЛЬВЕДТЬ се, ды неезь цецясь. Сон аволь покшке, пек а неявикс, Лемезэяк секс, сеск а ледстявикс. Панчзо орвайне, ванкшны састыне… Мезекс сон касы, мезде сон ёвтни? Ансяк эрзятне теде чарькодить… Сеть эрзинетне, конат кель ванстыть, Конат чистэ чис Эрзянь Мель кастыть… *** Эрюш Вежай, 2016 ие, даволков.

Просмотров: 162

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования