Uralistica

А вейкеттяно... (Эрзянь кельсэ. / На языке Эрзя народа.)

А вейкеттяно…

(неень шкань эрзянь ёвтнемине)

    Крым. Пси. Исяк Кожай атясь ильтинзе нуцькатнень Петра ошов. Сынь, теке пачалгосо панезь прякинеть, рунго кистькинест калявсть-тюжалгадсть – ды мекев-кудов! Ней улить зярыя чить, зярдо ули Кожай атянть аламнешка ютко шказо. Эряви топавтомс сеть пурнавозь тевтне, конатне таштавсть нуцькатнень кедьсэнзэ улемстэст. Сынст марто ламо тееме а кенерят, зярс вишкинеть, секскак савкшнось ветнемест экшелямо ведь чирев, лия таркав. Колмо тарготне мартост ютасть истя: сырявась каштом икеле пансь-пидесь ды андсь. Атянть тевезэ – ветнемест нуцькатнень киськень калямо, мазый таркань невтнеме.

 Кожай атя арсесь-тейсь ды сыргась таштыне машинанзо эйкакштнэде мейле шлямонзо-урядамонзо. Мезесь паро – а васоло, сэрей пандонь ало ули машинань витнема-шлямо кардо. Пачкодсь тов. Ваны – улить колмо машинань шлямо таркат. Чаво шлямо тарка учомс тензэ  савсь а кувать. Чамсь вейке шлямо таркась ды атясь аравтызе машинанзо шлямо. Шлицянтень, комсешка иесэ кеме рунго цёрантень мерьсь: - «Инеськеть, цёра,  шлинк  верьксэнть-лангонть ды потьсинк-урядынк машинань потмонть пульде-челькте.» Сонсь озась ве ёно аштиця экшень максыця коцтлатыненть ало. Учомо.

  Панднэнь ютксо венельксэсь курок полавтневи. Панднэнь прясто куроксто кармась валгомо тусто-чопода пиземе пель. Кожай атя копачинзэ лавтовонзо курткасо, паряк, секень вант, пиземе вачкоди… Ансяк кенерсь теде арсеме, кода виевде виевстэ кивчкадсь ёндол ды цярадсь зэрть пургине. Секс кармась лосьсэ валомо менельстэнть. Теке ведрасто!

Атясь кирмицясь коцтлатыненть ало, конань пачккак мик кармась ведь кольгеме-чудеме.  Перькаванзо моданть вельтизе ды кепететьсь чуди пиземе ведь. Седе ды седе сэрейстэ. Пильге серькань-конилкань видьга! Я-а, вана теть, превтеме атя… Эряволь козоньгак лато алов пиземеденть кекшемс… Кода ней? Сави учомс ды начкомс ней тесэ…

Пельчасошка пиземесь валозь валсь. Окойники кармась лавшомомо… Атясь юкснесь, илештинзе понкспильгензэ, чиезь-капшазь, чави ведьганть, чийсь машинанзо ваксс. Максынзе ярмаккетнень машинань шлямонть кис цёрантень, ёвтась тензэ сюконямо валт паро важодеманзо кис. Кармась озамо. Эзь кенере панжомонзо икельць кенкшкенть, кода машинанть икелень стенынесь цятор зэрть марто сезевсь ды машинанть лангс, атянть лангс лондадсь кевень-рудаз ведень бутраведь-сель! Пильгензэ эшкизь кевть, машинанть ланга теке кевень цярахман вачкодсь. Сельмензээ атянть эзть кенере лып мереме! Зярдо срадсь-озась коштстонь рудаз ведень сувось, атясь нардызе рудайсэ ваднезь сельме керензэ, панжинзе сельмензэ… Маряви, пильгензэ кевтнесэ пек эзть томбаво. Варштась машинанть лангс. Капотонть лангсо – покш кевть. машинанть лангсо – кевев рудаз, синтрезь тарадт, чуди бутрат… Вай… Зыян! Модась перть пельга вельтязь тусто, кевев, синтрезь тарадов рудайсэ, бутрасо…

 Атясь таргизе оймензэ, укстась. Мезть тейнемс? Тердизе абунгавтозь шлиця цёранть. Вейсэ тёхмадизь машинанть ушов, седе ванькс таркав. Пурнавсть ломанть, лыкавтсть тей-тов прясост. Вай… Истяяк эрси?! Апак учонь тамаша! Лисни, эрси… Кияк а соды, мень зыян перть пельксэсть теть шкань-шкань канды… Атянть састыне вачкоесть кедь лапушкасост лавтовга, келя, кирдть, атя! Эриксат! Теньсэ парось. Лиясь весе а зыян. Ансяк янксема.

Атясь састыне сайнинзе машинанть лангсто седе покш кевтнень. Макссть тензэ ведра. Састыне валнызе машинанть ведьсэ. Кармась неявомо теезь зыянось. Бамперэсь лазовсь, весе кевень вачкодьксэ. Вачкодьстнэде, коцькердавкстнэдеяк ламо… Моторонь кундось – весе кевев рудаз потсоль… Нама, моторось мик а нолдавияк. Мезесь паро – весе фарань сляникатне апак тапа…

Мольсь атясь витнема-шлямо станциянь прявтонтень. Цёрась од, виев, кеме. Футболкасо. Кутьмереванзо келейстэ сёрмадовкс: - «Крым наш!». Мештестэнзэ – пштистэ ваны Путинэнь чамась пилоткасо. Цёранть кирьгасо поводезь эчке сырнень рисьмес покш, цитниця крёст.

Атясь: - «Шумбрачи, цёра. Вана истя ды истя… Зыян лиссь. Лездатадо тень мейсэяк? Монь ярмаконгак мартом аламнешка улить, машинам а нолдавияк мик… Моторось весе рудаз потсо…»

Цёрась: -« Содат мезе, атя, чумотне аволь минь. Перьтпельксэсь, виев пиземесь. Секскак, атя, азё вешнек лезкс лия таркасо. Азё озномо церькував. Пеняцяк Пазонтень, зыянот лангс. Аволь монень.  Мон а карман теть мейсэяк лездамо. А ютко тень… Азё тестэ!»

Атясь укстась. Превсэнзэ ютась мель: - «Кода полавтовсть неень шкань  ломантне. Кодат минь мартост а вейкеттяно…» Лиссь кабинетстэнть. Ды тусь.

***

Эрюш Вежай. 2016 ие. Аштемков, 30 чи.

 

Просмотров: 172

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования