Uralistica

Кият ды Кията. Кувака ёвтнема. Кият и Кията. Длинный рассказ. ( Эрзянь кельсэ. = На языке Эрзя народа.)

Эрюш Вежай. 

Кият ды Кията

Кувака ёвтнема. ( Алтави Андрей покштянень.)

 

Уцяскав ломань

  Тынь некшниде вестешка уцяскав ломань? Эзиде? А мон вана некшнинь. Уцяскав ломанесь – те мон, Кията эрзянь цёрынесь. Кията – истя тень мерить Кажвелень (Беднота) Алопесэнек.  Кията ды Кията. Цёрынесь мон уш покшкеян, эйзюрковсто тень топодсть сисем иеть. Тедеде, кодак сы сёксесь, мон карман якамо школав. Минек школанть ашине кудынесь о-оно косо ашти, минек кудостонть аволь пек васоло, Осипинь пандо чамасонть. Школав  тонавтнеме якить ансяк покштнэ, ней монгак ютксост карман. Ды те пек кецневти эйсэм. Теде талновтыця арсематне эрьва чистэ мик оймемгак куцтить!

   Тынь кевкстьсамизь, мекс мон уцяскаван? Видькстан тенк, ёвтаса. Монь ули весемем, мезе эряви эрьва паро ломанентень. Васняяк. Монь ули мазыйдеяк мазый эрямо таркам, конань келей элесэ ашти минек Кажвелинесь. Эйсэнзэ – колонькемень колмо кудот-кардазт. Сынст монсь а весть ловокшнынь. Маштан ловомо сядос ды седе тов! Те мастор элеванть сиянь карькскекс чуди минек Сургут леесь, минек ютко шкань сехте вечкевикс ютавтома тарканок. Чуди сон кува састыне, кува шольнезь-чольнезь, кува мик виев салыведекс. Чуди, чуди, кекши нурьгиця тусто кальтнень юткс. Лиси потстост, цитнезеви, ды одс кекши нудейс эли чейпулос.

  Монь улить сехте вечкевикс ломанемгак. Те покштям, сырявам, авам, лелям ды колмо патям-сазором. Тетям вана арась. Ды те мезеяк. Сон симицяль, минек умок кадымизь-ёртымизь. Истямо тетясь миненек а эрявияк. 

  Ули апароськак. Сон вана мейсэ. Мон эйкакштнестэ сехте вишкинеян, веженсеян. Секс монень алкуксонь, покш ломанень тевть зярс а макснить. А теньсэ мень паро? Истя эсь прят цёраломанькс а марят. Мезеяк. Курок ва касан, сестэ-э… несынк кодамоян!

  Кардайсэнек улить кавто скалонок, вейкесь сырявань, омбоцесь – авань. Кавонест вазыязь. Улить ревенек, нешке пиресэнек – кемкавтово нешкенек, ули лияяк ули-паронок. Секскак тевде мелявкстомо нурька шкаскак  а кадоват.

  Я-а… Оно ков васов арсеман оргодсть.  Ульнесь мелем ёвтнемс мекс мон уцяскаван, монсь аволь пек пародояк карминь ёвтнеме…  Илядо пеле. Ялатеке ёвтаса, мекс мон уцяскаван. Вана мекс.  Ч-ш-ш… Покштям ва илязсам маря… Мон мартонзо течи ардан вирев! Аволь ковгак маласо пирев, эли алашань кардазов, кода вишкинестэ. Ви-и-рев!!! Чарькодтядо? Те вана тев! Виде-паро покш ломанень тевс ардан.

Вирев кись

Виресь о-оно неяви икеленек, пелевеёно. Сырнень товзюронь паксянть томбале. Сонзэ чополт-пиже келей киксэсь парсте неяви валдо-валдо сэнь менель чиресэнть. Ардтано минь аволь стяко. Пурнынек-сэрнинек  пенгс-тикшес. Те монень истямо покш, виев кеняркс, мик сеедеемгак мештезэм а кельги, секень вант ва кирнявты эйстэнзэ. Оно кода виевстэ токнозь токны! Ды мон, нама, цёраломанянь, секскак те ине кенярксонть ланга а невтян. Терявтан кекшемензэ ойме потсом. Ды каня сон, истяшкась, кекшеви? Мизолдан, теке чаулынеян, пиледе пилес.

Ардтано тикшень усксема орабасо. Орабась кеме, покш. Сон эсенек, теезь покштянь санов кедьсэнзэ. Мон озадоян покштянь удалонзо, ацазь олго пакшсо. Кеместэ кундынь ды кирдян алдо верев молиця троксткетнес. Понкспильгень илештязь кумажан видьс. Пильгем новольстинь орабанть алов, ков сацтыть. Мелезэм пек тукшны, кода пильгалксом секе тев куцтьнить товзюронь ды тикшень прятне. Сынь теке чиезь чиить орабанть алга удалов.

Кизэнь куншка, тёкшозо. Шожда варминесь сэтьме, лембе. Сон нолштни штапо прям, кепе пильгем. Шкань-шкань пувавтни ашолт мериця, чова, шожда панарнэм. Экшенди эйсэм. Теке банясо шлямодо мейле ёвари эйсэм лембе веднесэ. Варма ялткетне нолштнить чамаумарьнем, са-астыне вешксить пиле варинесэм, лыневтить тей-тов прячерень лыскам, конат коням велькссэ керш ёно аштить стядо, кокорьнекс. Сон кизэнь пси чинть ало тунь олась-ашолгадсь. Те вана кокоресь – монь пек ацирьгавтниця асатыксэм. Сон сеедьстэ эйсэм апаргавтни. Кувалманзо лангсом пеедькшнить  Алопесэ. Келя, те тонь потяка шкастот вазнэ нолштынзеть иржаня кельсэнзэ. Се шкастонть саезь, келя,  нолштазь конясом прячерем дубушки аштить… Содазь, неть пеедькшнематне пек кольстить мелем. Секскак мон эрьва валске, чамань шлямсто, начко кедь лапушкасом, кавто кедьсэ начтнян прячерем ды терявтнян мадстемензэ те иера кокоренть. Сон ялатеке эйсэм «а кунсолы». Кодак коськи, черьтне таго сеск одс верев венемить. Течи паро. А кинень тень кувалма лангсом пеедькшнемс. Кадык варминесь олясонзо лыйневти прячерем! Теяк мелезэм тукшны. Истямо течи вадря, паро чись!

    Олазь менель келеванть ашине коцт панкскекс, апак капша,  уить чуро, валдо пельнеть. Та-косто пек верде, менель ёжостонть, маряви норовжорчонть жойниця морозо. Кува-а-акасто чольть каи… Чольдерьдемань гайтькетне кайсетить эрьва ёнов, тей-тов, верев-алов. Кепетить-кепетить верев ды сеск сезевить-валовить алов, мик мода ёжос. Кунсолан норовжорчонть таймаскадозь. Маряви тень, теке тундонь эрьгела чудикерькске чуди, чольдерьди менельсэнть.

  Варминесь сиземань апак сода панси келей товзюронь паксяванть кувака, сырнень толкунт. Секскак маряви тень, те мон аволь орабасо ардан. Те мон истя уян ёвксонь венчкесэ певтеме сырнень иневедьга. Толкунтнэ апак лотксе кеверить эзганзо мельга-мельцек ды кандыть-салыть эйсэм а содавикс мазый масторов…

   Зярс венельксэсь аволь пек пси. Теке марто чинть эйстэ моли истямо виев, лембе валдо, мик сельмемгак келейстэ а тетькевить. Паряк секскак, кода а терявтан неемензэ норовжорчонть менельстэнть, сон тень кодаяк а неяви. Ансяк морозо маряви! Неия нармушканть ансяк сестэ, зярдо тона прядызе гайтев моронзо ды тей-тов нимилявокс кайсевезь-либордозь, сёлминензэ ды пулынензэ келемтезь, кармась валгомо товзюронь прятнень потс. Товзюрось каясь прят, верев венсти сынст, моли кенерема шказо.

  Кись моли веревпандт. Орабань чаротне чавозь кшнисэ, чарамсто цитнить, шкань-шкань лакоркшныть. Тумонь петькельтне парсте ваднезь салидолсо. Алашась моли-эскели апак капша. Ков седе малавгады виресь, тов яла ламолгадыть алашань карвотне ды промотне. Кареесь кармась седе келейстэ ды сеедьстэ тей-тов ахолямо тусто, раужо пулосонзо. Черьтне пулосонть теке уськеть. 

   Паксянть велькссэ поводсь, либорды вейке таркасо вармазей, вармашке. Мон содан, нармунтнень ютксо ансяк вармазеесь машты либордомо коштсонть вана истя, ве таркасо. Лия нармунтне ливтямсто ве таркасо лотксеме а маштыть. Вармашкесь – машты! А васолдо, сюронть потсто, марявсь кочкодыкень сеерема: - «Коцт кодынь! Коцт кодынь! Коцт кодынь!» Модаванть нолаштсь сулей. Кепедия прям, варштынь верев. Видьстэ прянок велькссэ, пек вере, тейни келей сэтьме кирькст покш вадов, цыпакань салы. Сёлмонзо келейть. Коштось парсте сонзэ кирди. Улема, те самай сон а весть тунда сакшнось велинезэнек цыпакинень-люлякинень мельга. Покштям леднесь лангозонзо, ды эзь понго. Кочкодыкесь лоткась сееремеде. Койсэм, сон эли минек маримизь, эли вадовонь сулейденть тандадсь. Таго маряви ней ансяк чаронь лакордомась, промонь ды мекшень бизнэмась. Пштистэ ваномсто неяви,  кода ламо мекшть ливтить моданть велькска виренть ёнов ды мекев. Цянавнэтне течи ливтнить верьга-верьга, лисни, пиземе чинь перть а карми. Истя сыре ломантне кортнить, а весть теде марсинь.

 Сась покш мелем вешемс покштянь кедьстэ ождятнень ды пек рожодоминь перть пельксэнь ванкшномас. Валсояк а ёвтави, кодамо сон келей ды мазый! Покштям озадо икелем. Алонзо олго пакш, кона вельтязь ташто кескав коцтсо. Вельтявксонть ало неяви кавто кундамкасо деряба. Пеензэ парсте витнезь ды човазь. Мик ашосо цитнить.  Теске паро човазь-вастазь узересь, чавозь пеильмась, сянгот, габрят ды кавто мушконь пикс кесакт. Весе, мезесь карми эрявомо пенгс-тикшес молемстэ. Кедьёнкстнэяк вельтязь ташто нуласо. Аламодо кекшезь. Нама, а весенень содамка-невтемка, мейсь мольдяно алашасо  вирев.

                                                            

Покштям

   Кувака теленть перть патям тонавтымим ловомо-ловномо, секс содан, тедиде Михалов чистэнть покштянень топодить коткемень иеть. Сон ташто картузсо, чополт тюжа, тумо керень тюссо кикс марто панарсо. Лангсонзо тусто качамо тюсонь понкст, пильгензэ карсезь ташто, теке марто кеме кирзань кемс. Покштям – монь модамасторонть лангсо сехте вечкевикс ломанем. Сон эрьва мезде соды, эрьва мезес машты ды зярдояк а сёлны. Сон монь пачк чарькодьсамам. Зярдо ледстнян эсь прям, мон чинь чоп мартонзан, валскестэ саезь чопотемас. Удсянгак мон вакссонзо вейке коник лангсо, удалць кудосо. Мон – стенанть ёжосо, покштям – коникенть чиресэ. Те чувтонь келей коникенть покштям сонсь теизе кеме, санов кедьсэнзэ. Покштянь кутьмерезэ пачк лембе. Матедевемадо икеле мон пек вечкан кирмицякшнеме  ды нежелеме покштянь кутьмерезэнзэ, эжнемест эйстэнзэ кельмезь пильге лапушкам. Покштянень велинесэнек мерить Кият атя. Монь секскак лемдить велень лемсэ - Кият левксэкс. Те эйсэм тунь а покорды. Мон содан, Кият левксэкс улемась  пек паро.

   Ванан покштянь кутьмерезэнзэ. Лавтовонзо аволь келейть. Иетне сынст аламодо костизь ды новольстизь. Ялатеке покштянь коськана рунгозо неяви тень кеме сюлмов-санов селеекс. Неявить панаронть тетьксиця пшти лопатканзо, чисэнть калязь, чова сормсевкссэ вельтязь кирьгазо. Покштям ваны икелев, ялатеке, теке нейса сэтьме чаманзо ды лембе варштавксонзо. Чамазо ваньксстэ наразь пелема нарампеельсэ-бритвасо, конань сон ускизе модамасторонь васенце торпингестэнть. Теине, виде судозо нолдазь алов, валдо сельмензэ ваныть потсто, шержев сельмечирькетнень алдо. Вановтозо сэтьме, арсиця. Кавто домка сормсевкст латкинекс валгить сэрей панжадо конястонзо судо юронь видьс. Лия сормсевкстнэ, аволь домкатне, кикстыть конянзо трокст, верьга. Кургозо покштянь виде, чова турва. Улозояк виде, келей, невти эсь прянь кирдема коронзо. Покштям ламот ды кувакасто зярдояк а корты. Вана нейгак, курок пачкодтяно виренть видьс, сон килангонть перть валгак эзь кая. Ансяк шкань-шкань ноцковтни ождятнень. Ялатеке мон содан, кевкстиндеряса мездеяк, ёвтнесы кевкстемам парстине ды эрьва ёндо. Велинесэнек Кият атядо кортыть: - «Кия татя ломанесь превей. Зярдо меньгак зыян, эли лия а топавтовикс тев лиси, васняяк Кият атянь тердть. Сон превсэнзэ лезды, тевенть топавтсы. Пачк паро превспутомат максы.»

 

Вирьс совамо

 Ват! Зярс монь пертьпельксэнть лангс ванынь ды покштядом арсинь, вана теть, пачкодинек вирь чирентень. Мон содан покштнэнь пельде, те сэрей вирень таркантень мерить Чувар латко. Тестэ таргить ды ускить велев ванькс, тюжа-якстере чувар. Эйсэнзэ мейле човорить сёвонь марто. Се сёвоньсэнть ваднить кардт, кудот. Секе чуварсонть ацыть модакудова масторонть, лия тевскак нолдыть. Зарс чувар оровтось ашти кардайсэ, сон вишка эйкакштнэнень маштови паро налксема таркакс. Лия седе паро налксема тарка а муят! Мезе мелеть, сень чуварстонть тейсаккак, сэрей ошпандот, кить, сэдть, варят-пизэть, «лейть» ды «эрькть», ломанень ды ракшань рунгот.

  Пандо чамась прядовсь. Кись ней моли аволь веревпандт. Тестэ пек парсте неявить весе а онкставикс васолкстнэ, теке перть пельксэсь сонсь келемсь-келейгадсь. Оно тусто каль пулосонть ды чеень-нудеень тусто касовкстнэнь ютксо валдонь невти сляникакс цивтёрды минек Сургут леесь. Сонзэ томбале, вить кедь ёно шабра велень калонь трямо-кастомо сёлтнэ. Ванан видьстэ икелев, чипелев. Тосо неяви лепе пулонь ютксо кекшниця Нупонь лейнесь. Кершев, Эрзянь Адлякува веленть видьс венстявсь Сургут леенть велькска пандо керькс. Алганзо тов моли алашань ки. Те пандо керькссэнть сельмс каяви Якстере пандонть чамазо. Те пандось весемеде сэрей. Прязо лапштаня. Пандо коняванть юты келей, якстере сёвонень ды кевень кикс. Секскак пандонть тесэнь эрзятне лемдизь Якстере пандо. Покш мелем, кодаяк молемс тов ды куземс Якстере пандонть пряс, варштамс, мекс сон истя якстерди. Ды пек васоло те пандось. Ськамон тов а нолдасамизь.

  Совинек виренть потс ды аламошкас лоткинек. Кият покштям валгсь, ютась орабанть перькава, ванкшнынзе цёкушкатнень, супоненть, аеленть, витизе камбразкенть, аламодо свистинзе. Мейле велявтсь виренть ёнов, сюконясь ёнонзо ды ёвтынзе вирьс совамо валтнэнь:

«Вирень кирдий, Вирява!

Нолдымизь вирезэть, эрямо пизэзэть,

Иляк пиря кинек, илямизь ёмавто минек,

Макст тенек мезеть ули,

Зыянокс максозесь теть а ули,

Ламо кедьстэть а сайтяно,

Берянь тонеть а тейтяно,

Паз чангодть! Паз чангодть, Паз чангодть!»

   Мон аштинь тень пингстэ вакссонзо. Одс озынек орабантень, сыргинек седе тов виренть потс. Теине кись ней мольсь чувтнэнь алга. Рацяня тумотне, ёлганя пойтне, сыре пекшетне, сюлмов-рашков селейтне ды уксотне, пондаря килейтне, ламо рашков пешкстнэ тусто лопав прясост, тарадсост сеск кекшизь менеленть ды чипаенть. Теке сундерькст валгсть. Оймемгак а таргави кенярксстонть, лексемам мештезэм а кельги. Окойники мон покш вирьсэян!

  Эсь пачкавам монгак кавксть-колмксть покштянь койсэ ёвтынь вирьс совамо ознома  валтнэнь. Терявтан арсеме, кодамо сонзэ чамазо-чачозо Виряванть? Мазый? Кежей? Койсэм мазый, кодамо сонсь виреськак… Судоваринень тетьксезь никстнян вирень ванькс, летьке, экше кошткенть. Сон шожда, эйсэнзэ марявить ташто лопань ды пангонь чинеть. Лексян кошттонть, теке чопавтынь эзэнзэ. Кодаяк  а пештяван эйсэнзэ. Эрьва кодат чинень танстть улить вирень коштсонть, балягань, арво тикшень, медень, керень, наксавт тикшень, шкерьгень, кстыень.  Прямгак те тантей чинень човорксстонть велякадсь, чаракадсь.

 

Вирьга

  Вирьга ардомасонть ули аволь пароськак. Сеськтне. Сынь теке азаргадсть! Кармасть пицезь пицеме. Теке пиципалакссо секе тев пицить штапо пильгем, кирьгам, кедем. Курокке нолдынь алов илештязь понкспильгтнень, лопав тарадкесэ карминь мезе вийть ахоламо сеськтнеде, терявтан пансемест перькавам ды велькскам бийниця-цийниця «яттнэнь». Покштямгак сеедьстэ вачкои эсь прянзо сявдикска, кирьгава, кутьмерева. –«Прах саевлинзе неть идемевстнень!», - моткоди тень пингстэ сон. – Вантая, кода сускить, верень потийтне!»  Ялатеке сеськтнеяк паро потмо ёжом а колыть. Цидярдан. Перькавам – вирь. Ансяк мезе тесэ а неят! Кенерть ваномо, редямонзо мезенть неят, мезе марят,  ды сайть неезенть-марязенть  мелезэть.

   Вана эчке, рацяня тарадстонть, кона венстинзе «кедензэ» вельксканок кинть трокст, ванны лангозонок ды чуросто, прянзо чиремкшнезь, гугукшны тургулькась, вирень гулькась: - «Тур гуль! Гу-гук! Гу-гук! Гу-гук!» Теке кармавты: -«Пой мук! Гуй мук! Вирь мук!». Те сон минек неемизь, ды Вирявантень минденек ёвтни. Та-косто васолдо марявсь куконь кукордома. Кинь иетнень сон лови? Монсетнень? Покштянсетнень? Кие соды... А те кие, минек икельга ливтни апак пеле? Те кувака пуло, уськине пуло уськиреесь видьстэ алашанть пильгензэ юткова панси промотнень мельга. Кундась! Ды сеск кекшсь вергизмарькс куракшонть потс.

  Кинек вети Карго леенть ды Олак лисьманть томбалев. Тосто, Овто латконть чирестэ вирень ваныесь, Адлякува велень эриця эрзянь ломанесь, явтсь покштянень чочкокс кеветеешка кенерезь ды коське чувтот. Явтозь чувтнэ, ёвтась покштям, тешкстазь вирь ваныенть узере сакалсо. Теезь чапинеть. Покштям соды кода муемест сеть чувтнэнь, кува сынь аштить. Сон виренть пек парсте содасы, келеде келес, трокст-кувалт  а весть ютнизе ялго  эрямонзо перть. Секскак мон мартонзо вирьсэнть тунь а пелян. А ёмамодо, а вирень пачадо, а Вирявадо.

 - «Пакшт! Пакшт! Пакшт!» - апак учо лажакадсь виевстэ пря велкссэм. Мон мик кирмицявинь-кукорьгадынь, прямгак кекшия те лашттонь эйстэ кавто кедьсэм. Я-а… Вана теть «мездеяк а пелян»… Тарск-сорк теинь, тандадомадонть мик сельмемгак конинь. Те истя тумонь тарадстонть кепететьсь коштс покш, атякшошка вирень нармунь, ды келей сёлмосонзо лап-лап! виевстэ тейнезь  ёмась виренть потс. Паро, кенеринь неемензэ. Те вана нармунь тык нармунь! Истямо мон вестькак те шкас эзинь некшне. Мик алашанокак тандадсь. Савсь тенек лоткамс, зярс тандадозь алашась оймась. Сонензэяк те вастовомась ульнесь апак учонь. Оно кода пелязкалезь ней варштни раужо сельмсэнзэ вирев.  Теке кевкстни, ней ва мезеяк тосо пелемка арась?

 -«Мезе, левкскем, тандадыть аламнешка?» - варштась удалов, лангозом, покштям. – «Аламошка ули, покштяй,» - пек тандадомам апак невтне, сорныця вайгельсэ састыне видькстынь мон. Ды сеск кевкстия: - «Те кие истямось ульнесь?»

 - «Вирьсараз. Неик кодамо сон покш? Пелемс  эйстэнзэ а мезть. Сон нармунесь сэтьме. Ярсы ансяк вирень марьде ды пургондавкссто, эрьва мень видьмеде. Ломаньс а каявкшны. Сонсь пели эйстэнек. Тандавтынек. Минь тонь марто уцяскавтано. Ней эйстэст вирьсэнек аламо кадовсь. Седикеле пек ламольть. Ней леднемкатнеде ломанень кедьсэ ламо. Леднить вирьсаразтнэнь превтеметне апак жаля. А ваныть икелепелев эрямонтень. Леднить,  мездеяк а арсить…» Покштянь меельце валонзо апаркстомтымизь, колызь потмо ёжом. Мейсь истя ломантне тейнить? Мейсь неень шкань ломантне апак арсе истожить истямо мазый вирень  нармуненть? Тенст мезе, ярсамс а мезде? Мекс сеть апаро ломантнень Вирявась а кардасызе?

  Ледстявсь тень, покшям ёвтнесь, келя, ней эрзятне ламот лоткасть эрзянь Инешкипазонтень озномо, лоткасть Верепазонтень кемеме, кацтасть Инешкипазонть койдензэ, иладонзо, лоткасть сынст ванстомост ды мельсэ кирдемест. Неть ломантненень ней эрямоваст ветицякс Идемевсесь ашти. Сон неть ломантнень оймевтемекс, превтемекс теи. Эрямонь чарькодемаст саи. Секскак истят ломантне чаво прясо эрить, идемевсень тевть топавтыть, перть пельксэнть превтеме колыть. Неть нусманя мелявксом курок нардавсть превстэм лия, паро неявкссо, конат понгонесть каршонок.

 

Карго лей

   Пачкодинек Карго леенть видьс. Тесэ прязо, тестэ сон ушодови. Кувалмонзо коряс леесь аволь кувака. Пры Сургутс. Эйстэдензэ марсинь покштнэнь пельде. Ней вана неса эсь сельмсэм. Човинька, теинька. Чуди, шольни састыне куракш ды тусто, сэрей тикше потсо. Косто саевсь истямо мазый лемезэ? –«Карго лей, Карго лей…»  - теке кснавнэть кеверькшнян неть валтнэнь кель прясом. – «Карго лей, Карго лей…» - тошкан неть валтнэнь, теке морыне моран. Нама, лейненть лемезэ сюлмазь карготнень марто. Монсь маласто каргтнэнь зярс эзинь нее. Ансяк менельстэ некшнынь сынст, тунда ды сёксня, зярдо неть покш, кувака кирьга нармунтне мазый ужокссо ливтить минек велиненть велькска пек верьга. Тосто, менельстэ ансяк нусманя курномаст маряви: - «Кур-лы… Кур-лы… Кур-лы…».

 -«Покштяй, мекс те лейнентень Карго лей мерить?»

 - «Мекс, кевкстнят?» - покштям таго ноцковтынзе ождятнень. Алашась тусь седе эрязасто.

- «Вана мекс. Седикеле тесэ эрясть ламо каргот. Тесэ ульнесь келей чеядавкс, сильдей марто. Вишка пингстэнь монськак карготнень  тесэ а весть некшнынь. Весть ардтано тия тетянь марто алашасо. Тундо. А сынст тунда, се шкане, ульнесь пизэнь теема, алыямо шкаст. Ванан. Кинть эйстэ аволь васоло, ташто штеминенть перька яксить кавто каргот. Чарькодинь, те атяка ды авака. Атякась седе покш, пулозо седе пондаря. Сравтни эйсэнзэ. Карго атякась алужкали, панси аваканть мельга. Аволь кода атякш саразонь мельга, эли атяка дига гала мельга. Атяка каргось васня кувать важовсто якси карго аваканть перька. Рестеи ды келейстэ ахоли икелензэ сёлмосонзо. Кальцькаи кувака кувосонзо, мазыйстэ меньчни чова, ёлганя, кувака кирьганзо. Прянзо верьга канды. Виде-паро, киштезь кишти аваканть икеле сэрей пильгензэ лангсо. Сонсь тень пингстэ тензэ мазый моро моры. Кирнявты штеминенть лангс . Тосто, верде, ве таркасо киштезь: - «Тур-лу-тут! Тур-лу-тут! Тур-лу-тут!» Ды кода мазыйстэ тень пингстэ кишти! Кирнявтни верев. Сюкони модас. Пильгензэ пивтезь пивтить-эвтить.

  Покштям ёвли карготнень обуцядост седе тов. Монень мик маряви, те мон монсь эсь сельмсэм неинь неть киштиця каргтнэнь ды эсь пилесэм маринь сынст тундонь алужкалема шкань морынест.

 

Олак лисьма

 

  Шкаськак тень эзь марявояк кода ютась, пачкодинек Олак лисьмапрянть видьс. Ламо ёвтнемат сонзэдензэ маринь. Сон иневанькс, ловови Инешкипазонь лисьмакс. Ашти  кавто покш ды колмо вишкине эрзянь велень ютксо. Велетнень лемест: Захарка, Адлякува, Покровка, Микольской, Беднота. Лисьмапрясь чави мазый вирь кужосо. Те кужось – перька аштиця велень эрзятнень покшчистэ вастневема тарка. Тесэ ютавтневить озномат. Тесэ ютавтневи сехте мазый кизэнь покшчись – Кизэнь вастома чись. Мон тезэнь пачкодинь васенцеде. Зярс тей покштнэ вестькак эзимизь сайне. Вишкинеян. Лисьмапрясь велинестэнек васоло.

  Лоткинек. Мон  чиинь лисьмантень, ванкшнан эйсэнзэ. Кода а ванкшномс? Мейле сондензэ эряви ёвлемс ялганстэнь. Лисьмантень теезь чочконь кундо. Кундозь вельтязь кундамка марто лангакссо. Лопат-мезть иляст певере лисьмантень. Вельтявксонть лангс путозь чова карькскесэ сюлмазь татаянь симема ваканка. Ташто. Лазовкс марто. Ялатеке ванькс. Симемс маштови.

  Лисьманть вакссо касы сыре, эчке, латяня тумо. Ламот иензэ! Ламо эрясь, ламо ломанть нейсь, ламодо соды. Маштоволь кортамо ломанькс, ламодо ёвтневель…  Лисьмась псиденть кекшсь сулеензэ алов. Кизна тумонть ало седе экшэ, тельня, мекевланк, седе сэтьме ды лембе. Тумонть ало путозь ташто, валакавтозь мукорь чочко. Ломантненень сон оймсема эзем. Тумось теке терди ютыця ломаненть: -«Озак, ломань. Оймсек. Оймавтык аламнес ойметь. Корштак ванькс, экше веднеде. Лепамтыть потсот палы мелявксот. Весе юты. Пароськак. Апароськак. Монь иневанькс лисьма ведем вийть максы. Арсик эрямот ды седе шождасто эскельдяк икелев». Тумонть ало раужо модась ацавсь мелянь лопасо ды сэрясо. Тумось певердинзе.

  Саия кедезэм татаянь ваканканть, панжия лисьма лангонть. Вай, лисьма ведесь кода маласо. Венстязь кедьсэ сацтави. Лисьмастонть моли экше, ванькс кошт. Экшенди псилгадозь, ливезькадозь чамам, прям. Коминь, венстия кедем ведень чавачамонтень, «лазыя» сонзэ ваканкасонть, амольдинь ведьте. Корштынь. Пеемгак кармасть лазнотомо кельмедензэ.

  Покштям симди алашанть. Менстинзе кшнинь онкстьнень, иляст меша алашантень симеме. Мон коминь лисьма кундонть трокст, кувать ванан чопода лисьма потмаксос. Сельмем тонадсть чоподантень. Карминь неемест потмакстомо варинетнень, конатнень эйстэ моданть потсто виевстэ  чави ванькс ведесь. Вана неть варя прятнестэ саевияк те лисьмась. Лисьма варятне туить та-ков моданть потс, велькссэст, чавиця ведьсэнть, киштить ванькс чувар паморькскеть, кев  пелькскеть, тарадкеть, вишка лопинеть. Ведь лангстонть, теке чавачамосто, парсте неяви монь чамамгак, валдо менелеськак.

  Покштям тердимим озамо орабас. Шкась а ютко. Сацтнемс-таргсемс сонзэ а мезть. Содан, покштям кувака сэзнэмат а вечки. Питне путы шкантень. Вановлинь ды вановлинь лисьманть потмаксос, кода тосто ведесь чави. Ды эряви ардомс  седе тов. Амольдинь васонькоморосо ведь, таго корштынь, ёвардыя чаминем.  Ведесь теке эрексия! –«Нейке чиян, покштяй!» - рангстынь ды ношкстынь озамо. Ды вана мон таго озадоян таркасон.

 

Овто латко

  Тестэ ней аволь васоло Овто латкось. Овто латко… Зярдо неть валтнэнь ёвтат, мик та-кодамо пелема ёжо потмоват юты. Мик пелема сайтянзат. Койсэм, сонсь «овто» валось чова, чевте вайгельсэ а ёвтавияк. Парсте сон ёвтави ансяк эчке, казямо,  кирьга парьсэ калдордыця вайгельсэ. Вана истя: -«О-овто-о…»

  Овто латкось ловови минек виртнесэ сехте пелема таркакс. Седикеле, кортыть, те покш латкосонть эрясть овтт. Ней кияк а соды, ламо-аволь эйстэдест тосо ульнесть. Ней арасть. Ансяк латконть лемсэ кадовсть. Латкось домка, вирев, лондавкс марто. Эйсэнзэ чувтнэ, пешкстнэ, торлатне, овтоумарькстнэ  ды лия куракштнэ касыть истя тустосто-сеедьстэ, пачкаст мик а ютаваткак.  Весе оршамот сезнесыть  панксонь панкс латконть печтямсто. Латко потмакссонть пачк чопода, читькак. Ёвтнить, латкосонть верьгизткак некшнесть.

   Латконть видьс пачкодезь, пурдынек кистэнть кершев. Ардтано эль неявиця вирень яннэва. Тарадтнэ ней секе тев «кундсить» орабантень, терявтнить понгомо мик чамаваяк.

 

Пенгень керямо

    Пачкодинек. Лоткинек. Тесэ миненек явтазь вирень керямо таркась. Покштям перьгавтызе алашанть. Тертизе ды нолдызе теске, а покш кужинес, потьмежа тикшеде ярсамо. Мейсэ маштан, лездан покштянень. Таргинь кескав коцтонть алдо узеренть, дерябанть. Карсинь сандалят. Пильгем аволест лазново-пупсеве мейсэяк пштисэ. Ды секе тев комсян тия-тува якстердиця кстыйтнень мельга. Кодат тантейть!

 - «Адя эно!», - терди эйсэм покштям. Узерень, дерябань саезь сыргинек вешнемест керямос тешкстнезь чувттнэнь. Неть чувттнэ – коскезь тумот ды пойть. Сынь эрявсть банянь алце венецьтнень  полавтомас ды лияс мейс. Вана муинек сэрей, эчкела тумине. Сон тешкстазь эрявикс чапинесэ. Покштям эрьва ёндо ваннызе сонзэ сэрьс. Моли-арась сон тенек? – «Туи!» - вачкодизе кедь лапушкасонзо чувтонть. Анокстынек сявордемензэ.

 -«Сайсынек седе алга, мода ёжова. Сэрей мукорь а кадномка. Сон стяко наксалеме карми. Дерябанть кирдть кавто кедьсэ. Видестэ, апак мендя.» - тонавты эйсэм покштям. – «Иля лепштя дерябанть. Пеензэ пштить, сынсь кармить пезнамо чувтос. Сизят, ёвтак. Оймсетяно. Капшамс тенек а ков. Чизэ вере. Кенертяно.» Мон комавтнян прям: - «Чарькодинь!» Оймем пешксе кенярксов лембе ёжосо. Покш ломанень тевс кундан!

  Кода покштям мерьсь, истя тевенек молияк. Дерябань пейтне шождасто порить кеме тумонь мукоренть. Монень маряви, теке покштям ськамозо дерябанть мекев-васов ускси. -«Жой-жой, жой-жой, жой-жой…» - истямо сонзэ морозо. Дерябавкстнэ тюжа кандерьксэкс певерить мода лангс, ацыть эйсэнзэ. Дерябинек чувтонть  эчкензэ пеле видьс. Дерябась «жойк!» тейсь. Пезнась, лоткась. Монь ёнов тень кодаяк а ускови. –«Саты, - мерьсь покштям,» - оймсетяно. Оймсинек аламнешка. Ней дерябатано чувтонть омбоце ёндо. Таго эчкензэ пелевидьс. Кадовсь аламнешка. Зярс тумось сорккак эзь тее. Покштям мерьсь тень арамс  ве ёнов. Илязсан понго чувтонть правтомсто  алонзо. Сайсь рашков олога. Тёхмадизе чувтонть. Тумось кармась састыне чиремеме. Коське тарадонзо лакшторсо синтрезь, стака увт марто варцодевсь модас! Модаськак алонзо мик сырк-сорк тейсь. Сыре чувтось. Мукорьсэнзэ тень лововсть ниленькеменьшкадо ламо иень кирькст.

  Ней тевесь муевсь пшти узерентень. Покштянь виев кедензэ ёнсто керсить тарадтнэнь. Сынь маштовить паро пенгекс. Мон вачкан эйсэст ве таркас. Вана чувто пряськак керязь. Тумось теевсь паро чочкокс. Покштям сюлмась мукорь пезэнзэ пикс. Пиксэнть вельде, уцорсо, ускинек чочконть орабанть вакс.

  Истя, оймсекшнезь, апак капша сявордынек кеветеешка чувтт. Тумот, пойть, пекшеть. Мон усксинь, вачксинь тарадтнэнь. Покштям – чочктнэнь. Покштям моненьгак макснизе узеренть чова тарадонь керсеме. Невтизе, кода кирдемс  эряви узеренть, кода келейстэ  эряви кирдемс тарадонь керсемстэ пильгтнень. Илязо мене пильгс  узересь. –«Тарадонть эряви керямс  мукорень пенть ёндо. Аволь касоманзо каршо. Истя сон седе шождасто керяви. Керямс эряви чувтонть ёжова, моргонь апак кадно, - тонавтсь эйсэм покштям. – Узере кечкенть кирдть кавто кедьсэ, куншкастонзо, илязо мене кедьстэть.» Келем ливтезь, турвань сускозь мон топавтан покштянь превспутоманзо. Кедем курок сизильть стака узереденть. Покштям прядылизе тевенть.

   Оймсемстэ ярсынек сывель курникте. Лисьма ведьсэ човазь сузма марто. Федай сырявам тантей ярсамкат путсь тенек. Ярсат, келетькак нильсак.

  Усксинек, вачксинек чочктнэнь, пенгтнень. Шказо ламо ютась. Покштям кенерьсь ледеме аламнешка тикшедеяк а васолонь кужинетнева. Чизэ кармась ландямо чивалгомав. Сыргинек кудов. Улавонок вадрясто вачказь, кеместэ свистязь эчке пикссэ. Чочктнэ ало. Лангаваст путозь пенгтне. Пенгтнень велькса вачказь чевте тикшесь. Теке тёшак. Виев кедьсэнзэ покштям «ливтявтымим» верев, улавонть пряс. Максынзе тень кшнань ождятнень: – «Ветяк!» Сонсь карми молеме ялго, кирдеме алашанть панст ведьмень вельде.  Лутктнева-латктнева улавось пачк ветяви истямо лувсо. Зярдо лисинек валаня ки лангов, кузсь ваксозон.

 

Кись кудов

 Састыне ардтано, валгтано вирьстэнть веленть ёнов. Сиземась састыне сутямты эйсэм. Сельмем сынсь кармасть конявомо. Зярс эзинь нувсезеве, кевкстия покштянь: - «Покштяй, а косто саевсь минек велесь? Косто саевинек минь, эрзятне?» Покштям зярыяксть козкстась, таргизе кувакасто оймензэ. Кармась стамбарнэ ёвтнеме.

    Эрзянь Мастордо. Тосо кезэрень шкатнестэ эрясть весе эрзятне. Эрясть эсь  мельсэ, эсь койсэ, эсь прявт, инязоронь марто. Сынь парсте ванстсть эсь Масторост, кеместэ аштесть кисэнзэ, а весть идекшнызь ятто. Покштям ёвтнесь мазый эрзянь койде, иладо. Эрзянь покшчитнеде, моротнеде. Мон кунст мадезь удалонзо ванынь валгиця чипаенть лангс, сэньшкадыця менельс. Кунсолынь покштянь ёвтнеманзо, кода, кудов кинть марязь, паркстни алашанок. Састыне лакоркшныть сталмодонть орабань петкельтне, каштордыть алом пенге тарадтнэ.

   Покштянь вайгелезэ кармась марявомо тень теке тодовонь пачк, ёвтнемазо марявсь тень кувака морокс:

 - «Удока, цёра, удока,

Валдо сэнь сельметь конитька,

Кадыть мелявксот, сэредьксэть,

Сестэ неят тон ютазь шкантень сэдь.

 

Эзгансо ютамс тон иля капша,

Ютавтык васня айгрот-алашат,

Мейле ютавтык вашинеть,

Илязо пеле сон раужо ведтенть.

 

Ва илить стувто сялгот, налчирькеть,

Маштовить сынь теть тосо чить ды веть,

Сестэ пачкодят тон шумбрасто,

Се Масторонтень, састь эрзят косто.

 

Сонзэ велензэ пек мазыйть ульнесть,

Лангозонзо вансть сявадыця сельмть,

Чилисемасто, чивалгомасто,

Чипельдеяк вансть аволь чуросто.

 

Эрзянь ломантне ламо пингть цидярдсть,

Валдо уцяскась весть эйстэст велявтсь,

Торпаксясо прасть алят, андямот,

Вирьтнева сравтнезь ульнесть пек ламот.

 

Се шкастонть нельгизь раськенть лемензэ,

Пинксызь оймензэ, пекстызь сельмензэ,

Теде эряви эрьвантень содамс,

Тенк а ков ней удалов потамс.

 

Ванока, цёра, ды тонсь арсека,

Мекс ёми раськеть, вай, апак лотка,

Учи идиця, учи ванстыця,

Раськенть лемензэ кепедиця.

 

Те тевесь, цёра, пек аволь шожда,

Ансяк вийть максы тенек эсь модась,

Удок, цёрынем, парсте оймсека,

Виеть парстине покш тевс пурнытька.

  

   Сыргозинь, зярдо покштям панжинзе удалць ортатнень. Совавтызе улавонть кардайс. Валгсть сундерькстнэ. Визьксэсь якстерьгавтынзе чама умарьнем. –«Вана теть покш ломанян! Кода истя кеместэ матедевинь?» Ёртынь ождятнень покштянень. Эйсэнек учость весе кудосотне.

  Улавось курок чамдозель. Алашась перьгавтозель ды ветязель алашань кардазов. Сырявам андомизь. Мон симинь пряс пешксе покш симема вакан ансяк педязь ловсодо. Кодак мадинь тарказом, сеск ваязь ваинь домка онс. – «Кодамо течи ульнесь кувака ды паро чись… Кодамоян мон уцяскаван. Покш ломанень тевс якинь!» - кенерсь ютамо превгам тантей арсема. Кие вельтимим чевте  вельтявкссо ды вадяштымим лембе кедьсэнзэ, мон эзинь маря…

                                                                              ***

 

 

 

Валкс.

 

аель - подпруга

андямо – кезэрень вал,  рузокс «мОлодец»

верьгизмарькс – рузокс «волчья ягода»

деряба – рузокс «пила»

дерябамс – рузокс «пилить»

дерябавкст – рузокс «опилки»

иера – рузокс «упрямый»

иневанькс – рузокс «святой»

иржаня – рузокс «шершавый»

кандерькст – цярахманонь вишка пелькскеть, чова цярахман, эрси сеедьстэ сёксня, ловонть

                          прамонзо икеле, кельмезь пиземе

кундо – рузокс «сруб»

модакудо – рузокс «землянка»

оровт – рузокс «ворох, куча»

сузма – эрзянь «сыр», тееви салтазь  топосто

татая – рузокс «фарфор»

ужокс – рузокс «косяк»

штеме – рузокс «копна»

 

Просмотров: 164

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования