Эрзякс кортамодонть ды рузокс арсемадонть

Украина лангс рузтнэнь каявомась явизе шканть кавтов:

- теде икеле ды теде мееле.

Лазовсть юртнэ, каладсть перть пелькстэнть, ванновкстэ-арсематне. Турьгадсть аволь ансяк содавикстнэ ды ялгатне, натой патятнень-лелятнень юткова панжовсь потмакстомо лазкс.

Колмо иетькак эзть юта ялгаксчиденть, кенярдома вастоматнеде.

Весе полавтовсь.

Ды кода истя? Минь секетьтяно! Лемтне, чаматне… Мезе теевсь мартонок ды косто саевсь те мекевланг арсемась, шожда кевкстематнень а чарькодемась?

Кода истя бойкасто сэрьс кайсь лия ломанень чавомадонть шождасто арсемась?

Косто саевсь те превень сювордома - тертямо Чопода Виесь?

Ялгат, сон ульнесь свал потсонок.

Учось, кайсь, ды пурнась вийть минек полавтомантень.

Пурнавсть! Ды косто саевсть?

Кортынек теде аумок Ожомасонь Кирдя марто.

Ды такода апак учо, теке валскень ашолдома мельга манеесь, гайнезевсть прясон Маризь Кемалень валонзо: «Кортадо эрзякс, ялгат, кортадо эрзякс»! Валдолгавтызь сундерьгадомасо ёмазь яннэнть ды сась чарькодема кодамо смустенть путсь Маризь Кемаль нет валтнэс. Энялдомадо башка те ульнесь икелев сялдома! Вай, кода ламо эрзят те шкас а чарькодить мейсэ самай пештязь сонзэ валтнэ.

Неть валтнэсэ минек Идемась, миненек Лездамось, минек Кемемась, минек Виесь.

Неть валтнэсэ кекшезь самай се салмукс марто алось.

Эрзятнень снартнить рузыявтомост ламо пингеть. Ламот эрзятнеде, полавтызь «Эсь Раськесэнть уцяскав эрямонть лия раськесэ кенярдома эрямонть лангс». (Ожомасонь Кирдя)

Миизь -полавтызь эсь Раськенть, эсь Койтнень, эсь Раськеойменть «седе шожда эрямо лангс». Ансяк мезеяк стяко а юты. Сынь теевсть празекс. Сынь ды эйдест -буёсткак.

Те вейсэ кенярдоманть юрось ичезь лия раськетнень лепштямосто- ичемасто.

Нама, паряк, шожда: весе вейсэ, теке вейке мекердезь, «УРААА», чавт, леднек, ваявт, пултак, кискат узыявтт…. Сон а минек кондямо»!

Кирдивиень алгоритмась ульнесь ды кадовсь секенсекс: - исяк эрзя, течи «мордвин», ванды – руз, вандыде мейле – кияк.

Вана истя, кие тандавтозь, кие эсь мельсэнзэ, минь аламонь-аламонь теевинек «рузонь» раськекс.

«Ды, аштек», марян, «минь вана, эрзят! Панаронок эрзянь, койтнень вансттано, эрзякс кортатано» (Раськень озксов пачкодезь L).

Теяк истя, ялгат. Ды, кажотеиця Чопода Виесь, имперецэнь койсэ арсемась, ваны потстонок минек сельметнева теке вальмава.

Ялгат,те кода истя?!

Украинань раськесь кепедевсь кремлянь урныця едем гуенть каршо, кона каявсь Украинань лангс, Украинань раськесь прась минек, эрзятнень, свалчинь ятонть марто, тюремас.

Кода Разин таколи.

Кода Эрзямасонь Олёна, Кузьма Алексеев, Несмеян Васильев…

Весе сынь ульнесть изнязь Московсто сыця мельсэнть–кармавтомасонть. Те ульнесть минек сэрдятне. Минек сантнэва тешкас чуди сынст вересь. Кунсолока, токны.

Ды, седе тов, саемс комсеце пингенть колоньгеменьце иетнень…

Самай те кирдивиесь алтась минек эрзянь сехтей- сехтейтненень панжиця умарьпирень икелечи, алтась раськень вельмевтема.

Ды зярдо, теке толпандя кепететсь эрзянь ёжось, зярдо ульнесть анокстазь ды лиссть кеменьшка эрзянь кулялопатне ды журналнэ, зярдо кармасть эрявомо тёжат ды тёжат эрзянь келентень тонавтыцят, ды тень туртов ульнесть панжозь кемколмово -кемветее педучилищат…

Сестэ кирдивиесь рангстась – саты!

Рангстась, кода свал, панжизе нерензэ, штавтынзе уропеензэ ды ульнесть изнязь минек рябовтнэ–васильевтнэ, нефёдовтнэ-кулдуркаевтнэ ды, мартост, тёжат ды тёжат эрзят, весе чумост конатнень ульнесь эрзякс улеме бажамосонть! Истовтовсь.

Кие истовсь? Истя ульнесь!

Косто саевсь эрзянь ёжосонть те лия раськетнень лангс верьга ванномась?

-«чуркат, хохолт, грызунт,…» Вана апак прядо валрисьмесь, конань шождасто поладыть «рузтнэнь» мельга эрзятнеяк!

Косто те саевсь? Кирдивиенть кельстэ!

Сультекс канды шка вармась минек атятнень-сэрдятнень пельде энялдома –пшкадема: кортадо эрзякс, эйдеть, кортадо эрзякс!

Мейсь сисем эрзят, вейке рузонь пингстэ, анокт нимилявокс кирнявтомс эрзякс кортамонь ванькс чирестэнть рузонь келень чеядавксос?

«Да он не панимаит», - марян.

А мейсь, ёвтадо, сон «не панимаит»?

Веньксэсь укшны ланга – а покшкавтни сон минек! А вечксамизь.

Сон, паряк, ломанеськак паро, ансяк минь сонзэ туртов алсетне, сетне, конат «сонзэ ало», конатнень эряви лепштямс… (ловнок седе тов икеле сёрмадозенть).

Минек кажось пек ламо шка рузокс кортамосонть. Эрзякс кортамось теевсь таго мезень омбоце сортонь кисодымезекс. Те рузонь келенть марто сови минек потмоёжос колы пелесь–морямкась.

Кажостонть лисема кенкшесь минек вейке. Кадомс, туемс яттонть кортамо паксясто. Кортатано эрзякс, ялгат. Кортатано эрзякс.

«А как же мы? Это дискредитация по языковому признаку, это фашизм» - учодо пижнемат. Учодо ансяк илядо пеле.

Венькстядо: - Кода? Минек кондякс. Минек кияк эзь кевкстне, минь минсь тонавтынек рузонь келенть, ней тынь эрзянь келенть тонавтынк!

Весе.

Кортатано эрзякс! Вансынк, кода рузонь кельтементь сезялокс лиси потстонок уречись, азортомо кадовомс пелемась! Кода видемить кутьмеретне, ды пандолгадыть мештетне. Кода кепедевить прятне!

Кортатано эрзякс. Варштынк кода виевгады потмоёжось, зярдо тон Хамонь «бальшой начальник»-енть сельмс ванозь сэтьместэ мерят: - «А чарькодьса келеть, кортак эрзякс». Вансак, кода сон азаргады, ливтить лангстонзо «великой руской культуранть» калгавкстнэ–лушктнэ, ды невтьсазо сон алкусонь потмоёжонзо, кона пештязь самай се Чопода Вийсэнть!

Сон азаргады –тон виевгадат. Виесь видечисэнть!

Ули мелесь? А пелят? Икелев!

Кортатано эрзякс, ялгат, кортатано эрзякс!

Кортамось аволь ансяк ёвтнемапель. Кортамосонть кекшезь лувось-кодось, кона канды раськень Инесмустенть, вансты Инетёкшмеленть. Кортамось лиси раськестэнть, касы раськенть марто, сюлмазь Раськенть марто ды башка а эри.

Сюрдов–сардов рузонь келесь, тестэ-тосто пурназь–салазь лия кельтнестэ канды урень ёжо. Мейсь? Те празьтнень ды празьтнень эйдетнень кель! Сон чачсь, лись уре ютксто, кайсь уре марто, сотазь уре ёжосо ды канды уре ойме! Те потмакстомо латко. Латкось пешксе Чопода Вийсэнть, конась кармавты ломаненть пижнеме: - «Загадочная русская душа», «мы никагда ни на каво не нападали», «мы нисём культуру ВАМ».

Те миненек. Миненек?!!! Миненек, конатнень кельсэст ванстовсть кезэрень шкатнестэ «ловномс, сёрма, сёрмадомс, ловомс» валтнэ?

Те миненек, кинь «видьме» валстонть «кши» валонтень весе процесстнэ пештязь эрзянь валсо, эрзянь зэмесэ-смустьсэ, эрзянь лемсэ, эрзянь моросо? Те миненек, эрзяванок марто? Ды, вейке эрянь аванть оршамостонть кемень «русский национальный костюм»т лисить, а сынь миненек «культуру несут»).

Илядо ракавто, а шка!

Сынь чарькудить.

Содыть.

Кодаткак сынь а «старший брат»т.

Ансяк «абидна признать». Чопода Виесь а максы. Те Чопода Виесь кармавты ваномо лия раськетнень лангс верде.

Мезе, эрзянь оймесь «незагадочная»? Эли азербайджанецэнть, эли Украинасо эрицятнень?

Кортатано эрзякс, ялгат, кортатано эрзякс! Теньсэ минек икелечись!

Кие минек покшкавтни - карми кортамо эрзякс.

Кинь мелезэ арась - сень покшкавтнемадонть арсемскак а мезе!

Кортатно эрзякс, ялгат, кортатано эрзякс, сестэ ультяно теке Пазтнэ, ды празьтнень а лиси ноцковтомс минек ды ускомс алов эсест юткс.

Икелев сялгома: рузонь кельс ютавтомась ванстазь авторонь а меремасонть.

Боляень Сыресь