Uralistica

Орькскал. (Акула). Л.Н. Толстой эрзякс.

Л.Н. Толстой эрзякс. Орькскал (Акула).

ОРЬКСКАЛ
(Ёвтнема)
Минек иневенчесь аштесь венчкечказонь потмаксос каязь аволь васоло Африкань иневедь чиренть эйстэ. Чись ульнесь пародо паро. Иневеденть келестэ пувась эряза, шожда варма. Ансяк, чивалгома ёнов венельксэсь полавтовсь. Теевсь опаня, теке парсте уштозь каштомсто лангозонок пувазевсь пси коштсо Сахара чуварпаксястонть.

Чинть ландямодонзо икеле венч прявтось лиссь венч кияксонть лангс. Рангстась: «Экшелямо!» Вейке шка ювксос венч ушмантнэ чопавтсть ведьс. Нолдасть ведьс вармамевть, сюлмизь сонзэ паймес, тейсть ведьс нолдазь вармамевтенть эйстэ уймо.
Иневенчсэсть мартонок ульнесть кавто цёрабайть. Цёрынетне сехте икелев кирнявтсть ведьс. Ансяк тенст аламо марявсь таркась вармамевтьсэнть, секскак тенст сась превезэст мель: укшномс сасамнесэ апак куродо ведьсэ.
Кавонест, теке метьказт, венемкшнесть чова рунгинест ведьсэнть ды мезе вийть уйсть то ёнов, косо укшнозь венчкечказонть велькссэ таркань невтиця лагуннэсь.
Вейке цёрынесь васня икельдизе ялганзо, ансяк мейле кармась кадовомо удалов. Цёрыненть тетязо, сыре ледьмепочкосто ледниця, аштесь венч киякссонть ды мельспаросо вансь цёрынензэ мельга. Зярдо цёрынесь кармась кадовомо удалов, тетязо рангстась тензэ:
- Иля максо пря! Седе виевстэ!
Апак учо венч кияксстонть та-кие рангстась: «Орькскал!» - ды минь весе неинек ведьсэнть иневедень орькспачань кутьмере.
Орькскалось уйсь видьстэ цёрынетнень ёнов.
- Ва! Ва! Велявтодо! Орькскал! – пижакадсь сыре почкстоледниесь. Ансяк цёрынетне эзть маря сонзэ, уйсть яла седе васов, ракасть, элякалесть ды пижнесть эсь юткова седеяк виевстэ.
Почкстоледниесь ловташкадсь теке ашо коцт, таймаскадсь, ваны эйкакштнэнь лангс.
Венч ушмантнэ валгстасть ведь лангс вишка венчке, кирнявтсть эзэнзэ ды, милетнень эль а синтрезь, мезе вийть каявсть цёрынетнень ёнов. Ялатеке, сынь ульнесть васоло эйкакштнэнь эйстэ, зярдо орькскалось пачкодсь малазост комсешка эскельксэнь туро.
Цёрынетне васня эзть маря, мезе тенст пижнесть ды эзть нее орькскалонть. Ансяк мейле вейкесь эйстэст варштась удалов, ды минь весе маринек пилень сезиця цирьнема, ды цёрынетне каявсть уеме кавто ёнов.
Те цирьнемань пижнемась теке пувтызе почкосто ледницянть. Сон каявсь таркастонзо ды чийсть ледьмепочкотненень. Велявтызе вейке почконть, прась лангозонзо, норовась ды каподизе палыцёконть.
Минь весе, зяро ульнинек, чувтоминек тандадомадо, учинек мезе карми седе тов.
Каятотсь ледемась, ды минь неинек, кода почкостоледниесь прась ледьмепочконть вакссо ды кекшизе чаманзо кедьсэнзэ. Мезе теевсь орькскалонть марто, цёрынетнень марто, минь эзинек нее, мекс качамось керинзе ды вельтинзе сельменек.
Зярдо качамось срадсь веденть велькска, эрьва ёндо васня кармась марявомо ломанень састо моткодема, мейле моткодемась виевгадсь ды, окойники, эрьва ёндо каятотсть виев, кенярксов лажт.
Сыре почкосто ледницясь саинзе кедензэ чамастонзо, стясь ды варштась иневеденть лангс.
Толкунтнэнь прясо лымбакстнесь маштозь орькскалонть тюжа-ожо пекезэ. Зярыя меньютконь ютазь вишвенчкесь пачкодсь цёрынетнень видьс ды ускинзе сынсь иневенчентень.
***
Л.Н. Толстой (Эрзянь кельс ютавтсь Эрюш Вежай, 2016 ие.)

Валкс
Вармамевть – парус
Венелькс - погода
Венчкечказ - якорь
Венч киякс - палуба
Венч прявт - капитан
Венч ушман - матрос
Вишвенчке - шлюпка
Иневедь - море
Иневенч – корабль
Ледьмепочко - пушка
Меньютко – минута
Миле - весло
Моткодема – ропот, бормотание
Орькскал – акула
Орькспача – чудовище
Палыцёко - фитиль
Почкосто ледниця – артиллерист
Толкун – волна
Уймо – купальня, бассейн
Цирьнема – визг
Чуварпакся – пустыня
Шкаювкс - мгновение

Просмотров: 95

Эта запись блога закрыта для комментариев

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования