Uralistica

Степан Эрьзя. Курок, ожоковонь 27 чистэнть, топодить 140 иеть чачомачистэнзэ. / Степан Эрьзя. Скоро, 27 октября, исполнится 140 лет со дня рождения.

Степан Эрьзя. Мейсэ сонзэ питнезэ эрзянь раськенть туртов?

Ледстнемат сёрмадозь «Руця» Лезэпаргонть пелькстамос, кона алтави Степань Эрьзянь 140 чачома чинтень, кона топоди 2016-це иень ожоковонь 27-це чистэ.

Кинь ули мелезэ ледстямс Степан Эрьзянь ды путомс арнема те ине эрзянь ломанентень, инескеть, сёрмадынк те кевкстеманть коряс эсь меленк-арсеманк. Аволь кувакасто. Колмо-ниле валрисьместэ саезь конёв лопа ёнксонь видьс, аволь седе покшсто.

Сёрмадовксонк кучинк минек лемс: erush2002@mail.ru. 01.10.16 видьс.

----------------------------------------------

- Раськентень, кона ламо тувталонь коряс кармась стувтнеме эсь лемензэ – виензэ, инечинзэ, – эряви кемемань штатол. Истямо штатол, конань валдозо ютави сехте cэрей-кеме пирявксонь-кородовксонь пачк, конань саты виезэ токамс ломантнень оймест, сыремтемс потсост каштанчинь сятко. Сятко, кона шкань ютазь касы толокс, потсо палыця толокс, кона а мадстеви кодамояк варманень-даволнэнь. Те толонтень мерить раськень ёжо. Сонтемензэ керяви пингеде-пингес таргавиця рисьмесь, кона вейсэнди вейке раськень ломантнень. Сонтемензэ раськенть а ули вандынь чизэ. Эрзятнень ули истямо штатолост. Сон палы се ломаненть оймевийсэ, кона пингензэ перть бажась изнямс масторлангонь авидечитнень, кона эсензэ шкинемасо тюрсь сы шкань валдо эрямонть кис. Сон весе модамасторонть келес верьга вайгельть яволявтызе эсь раськензэ лементь – васенцекс ды вейкинекс. Сон содавикс ды малавикс ламо раськетненень, ансяк васняяк сон – минек, сон – Эрьзя!

Людмила Рябова

---------------------------------------------

- Ламо паро валт ёвтазь Степан Эрьзядо, ине эрзянь ломанденть. Мон чачинь 1955 иестэ, зярдо сон эрясь. Карминь содамо Степан Эрьзядо ансяк иев ломаньстэ, сестэ, зярдо тень топодсть 30-де ламо иеть. Мекс? Истя эйсэнек тонавтсть, истя кирдивиесь кекшсь Степан Эрьзянь лемензэ эрзятнень эйстэ.

Нейгак рузкс кортыця, эрзякс а чарькодиця ломантненень рузонь СМИ-сэ сёрмадови истя: «Степан Эрьзя – великий русский скульптор». Манчема? Нама. Ды кодамо… Ней чарькодтядо, эрзят, мекс эряви содамс эрзянь келенть? Арази эрзякс сёрмадови «Степан Эрьзя – ине рузонь керсиця»? Эрзякс те манчемась сеске неяви! Ансяк эрзянь келенть а содыцятне манявить истямо сёрмадовкссо. Эрзятне, конат содасызь эрзянь келенть, седе превейть, мекс сеск чарькодить: Степан Эрьзя – те эрзянь керсицясь, эрзянь ине ломанесь, кодамояк аволь рузонь. Нама, Степан Эрьзя эрясь Россиянь империясо, СССР-сэ. Те чарькодеви. Ансяк ломанесь, керсицясь сон васняяк ЭРЗЯНЬ, кодамояк аволь «русский». Сонзэ чачтызе эрзянь ава, эрзянь раськесь. Истя шабра раськенек салы Степан Эрьзянь ине лемензэ эстензэ, теи сонзэ «русскойкс». Терявты кадомс Эрзя раськенек эрзянь ине ломантеме.

Мейсэ ине питнезэ Степан Эрьзянь эрзя раськенть туртов? Сеньсэяк, эрзят: сон эрзятнестэ васенцесь, кие ёртызе эсь лангстонзо «мордва» псевдолементь. Сон васняяк мерьсь эстензэ: - «Мон – Эрьзя!» Ды те минек раськень лементь гайтевстэ невтизе-кепедизе весе Модамасторонть келес!

«Мордватне» манчить эйсэнек: келя, минек Модамасторонь келес содасамизь кода «мордва», секскак эряви миемс-ёртомс-кадомс-стувтомс Эрзя леменек ды лемдямс эсь прянок «мордва» псевдолемсэнть. Те визькстэме манчема! Весе Модамасторось содасы Эрьзя валонть! Пильгс-модас тень кис сюконяма тенек, эрзят, васенце эрзянь ломанентень, кона мерсь: «Мон—Эрьзя!» Те эрзянь ломанесь – Степан Эрьзя. Содадо теде, эрзят. Теньсэяк – сонзэ ине питнезэ Эрзя раськенть туртов.

Кода Степан Эрьзя эзь пеле эсь прядонзо сёрмадомс-меремс – ЭРЬЗЯ 110 иеть теде икеле, истя эрьва эрзянтень мерема апак пеле нейгак, неень стака шкатнестэ: Мон – ЭРЗЯ! Сестэ раськенек а ёми…

Эрюш Вежай

Просмотров: 123

Эта запись блога закрыта для комментариев

Комментарий от: Erush Vezhai, Август 18, 2016 в 4:11pm
Модань ломантнень мазычист тон невти.
Эрзянь раськенть лемензэ кепедик. 
Ине Эрьзя, сон теть модас сюкони.
Од шкань эрзятне теть сюкпря ёвтыть.
                          Римма Жегалина.

Пусъёс

© 2019   Created by Ortem.   При поддержке

Эмблемы  |  Сообщить о проблеме  |  Условия использования